ສ.ເກົາຫຼີ - ສປປ ລາວ ເສີມຂະຫຍາຍການຮ່ວມມື ໃນຕໍ່ໜ້າໃຫ້ແໜ້ນແຟ້ນຂຶ້ນກວ່າເກົ່າ

ເນື່ອງ​ໃນ​ໂອ​ກາດວັນສ້າງຕັ້ງສາຍພົວພັນການທູດ ລະຫວ່າງ ສາ​ທາ​ລະ​ນະ​ລັດ ເກົາຫຼີ ແລະສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນລາວ ຄົບຮອບ 28 ປີ (25 ຕຸລາ 1995-25 ຕຸລາ 2023); ທ່ານ ຈອງຢອງຊູ ເອກອັກຄະລັດຖະທູດ ສ. ເກົາຫຼີ ປະຈຳ ສປປ ລາວ ​ໄດ້​ມີ​ຄຳ​ເຫັນຕໍ່ການພົວພັນທາງການທູດ ລະຫວ່າງ ສ.ເກົາຫຼີ - ສປປ ລາວໃນໄລຍະ 28 ປີທີ່ຜ່ານມາໂດຍ​ທ່ານ​ໄດ້​ກ່າວ ​ວ່າ:

  1. 1. ການພົວພັນຮ່ວມມືສອງຝ່າຍ ໂດຍລວມ ໃນໄລຍະ 28 ປີ ຜ່ານມາ

ວັນທີ 25 ຕຸລານີ້ ແມ່ນວັນ ທີ່ ສ. ເກົາຫຼີ ແລະ ສປປ ລາວ ສ້າງຕັ້ງສາຍພົວພັນການທູດນຳກັນຄືນໃໝ່ ຄົບຮອບ 28 ປີ. ສ. ເກົາຫຼີ ແລະ ສປປ ລາວ ໄດ້ສ້າງຕັ້ງສາຍພົວພັນການທູດຄືນໃໝ່ໃນວັນທີ 25 ຕຸລາ1995, ຊຶ່ງເຫັນໄດ້ວ່າໃນໄລຍະເວລາອັນສັ້ນໆບໍ່ທັນເຖິງ 30 ປີ ມານີ້,ສາຍພົວພັນທາງດ້ານການເມືອງ,ເສດຖະກິດ,​ ວັດທະນະທຳ, ການແລກປ່ຽນ ຢ້ຽມຢາມ ເຊິ່ງກັນ ແລະ ກັນ ແລະ ຂະແໜງການຮ່ວມມືອື່ນໆ ລະຫວ່າງສອງປະເທດ ແມ່ນໄດ້ເຕີບໃຫຍ່ຂະຫຍາຍຕົວ ຢ່າງໄວວາ, ໂດຍເດັ່ນກວ່າໝູ່ ການຮ່ວມມືທາງດ້ານການລົງທຶນ ຊຶ່ງເຫັນໄດ້ວ່າ ສ. ເກົາຫຼີ ກວມເອົາອັນດັບ 5 ໃນບັນດາປະເທດທີ່ມາລົງທຶນຫຼາຍກວ່າໝູ່, ກວມເອົາອັນດັບ 4 ໃນປະເທດ ທີ່ມີນັກທ່ອງທ່ຽວ ມາທ່ຽວ ສປປ ລາວ ຫຼາຍທີ່ສຸດ ແລະກວມເອົາອັນດັບ 3 ໃນປະເທດ ຄູ່ຮ່ວມພັດທະນາທີ່ໃຫ້ການຊ່ວຍເຫຼືອທາງການເພື່ອການພັດທະນາ (ODA) ແກ່ ສປປ ລາວ ຫຼາຍທີ່ສຸດ.

ການພົວພັນຮ່ວມມືຂອງສອງປະເທດແມ່ນໄດ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງໂດຍໃນປີ 2023 ນີ້ ສອງປະເທດກໍ່ສືບຕໍ່ຮ່ວມມືກັນຢ່າງບໍ່ຢຸດຢັ້ງຊຶ່ງໃນວັນທີ 7 ກັນຍາຜ່ານມາການນຳຂັ້ນສູງຂອງສອງປະເທດນຳໂດຍທ່ານ ປະທານາທິບໍດີ ຢຸນຊອກຢ່ອນ ຂອງ ສ. ເກົາຫຼີ ແລະທ່ານ ນາຍົກລັດຖະມົນຕີ ສອນໄຊ ສີພັນດອນ ຂອງ ສປປ ລາວ ໄດ້ພົບປະສອງຝ່າຍ ຢູ່ອິນໂດເນເຊຍ, ຊຶ່ງສອງຝ່າຍໄດ້ປະເມີນຕີລາຄາ ກ່ຽວກັບການຮ່ວມມື ລະຫວ່າງສອງປະເທດ ໃນໄລຍະຜ່ານມາ ພ້ອມທັງໄດ້ປຶກສາຫາລືກັນ ເພື່ອເສີມຂະຫຍາຍການຮ່ວມມືໃນຕໍ່ໜ້າ ໃຫ້ແໜ້ນແຟ້ນຂຶ້ນກວ່າເກົ່າ. ສະເພາະໃນປີນີ້ ກໍ່ມີທ່ານ ນາງ ບຸນຄຳ ວໍລະຈິດ ລັດຖະມົນຕີກະ​ຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ພຸດ ສິມມາລາວົງ ລັດຖະມົນຕີກະ​ຊວງ ສຶກສາທິການ ແລະ ກິລາ, ທ່ານ ມະໄລທອງ ກົມມະສິດ ລັດຖະມົນຕິີກະ​ຊວງ ອຸດສາຫະກຳ ແລະ ການຄ້າ ພ້ອມດ້ວຍລັດຖະມົນຕີກະຊວງອື່ນໆຂອງ ສປປ ລາວ ລວມກັນ 8 ທ່ານກໍ່ໄດ້ເດີນ ທາງຢ້ຽມຢາມ ສ. ເກົາຫຼີ ເພື່ອປຶກສາຫາລືກັບຝ່າຍ ສ. ເກົາຫຼີ ກ່ຽວກັບທິດທາງເພີ່ມທະວີສາຍພົວພັນໃນຂະແໜງການຕ່າງໆຂອງສອງປະເທດ.

  1. 2. ການພົວພັນຮ່ວມມື ທີ່ພົ້ນເດັ່ນ ທາງດ້ານການຄ້າ, ການລົງທຶນ, ວຽກງານແຮງງານ ແລະຂະແໜງເສດຖະກິດອື່ນໆ

ຄືດັ່ງທີ່ກ່າວມາຂ້າງເທິງນີ້ແລ້ວວ່າ: ການພົວພັນຮ່ວມມືທາງດ້ານເສດຖະກິດນັ້ນ ສ. ເກົາຫຼີ ເປັນປະເທດທີ່ມາລົງທຶນໃນ ສປປ ລາວ ຫຼາຍເປັນອັນດັບ 5 ໂດຍຂະແໜງການລົງທຶນສ່ວນໃຫຍ່ ແມ່ນພະລັງງານ, ການກໍ່ສ້າງ, ການເງິນ ແລະ ຂະແໜງການຍ່ອຍອື່ນໆ ທີ່ປິ່ນອ້ອມ. ການແລກປ່ຽນການຄ້າຂອງສອງປະເທດນັ້ນ ຕາມຂໍ້ມູນ ປະຈຳປີ 2022 ເຫັນວ່າ: ສ. ເກົາຫຼີ ນອນໃນອັນດັບ 8 ທີ່ ສປປ ລາວ ນຳເຂົ້າ ແລະກວມເອົາອັນດັບທີ 12 ໃນປະເທດ ທີ່ ສປປ ລາວ ສົ່ງອອກຫຼາຍທີ່ສຸດ. ສິນຄ້າຫຼັກ ທີ່ ສປປ ລາວ ນຳເຂົ້າມາຈາກ ສ. ເກົາຫຼີ ປະກອບມີ ລົດຍົນ, ອຸປະກອນກໍ່ສ້າງ, ເຄື່ອງສຳອາງ ແລະ ອື່ນໆ. ສ່ວນສິນຄ້າຫຼັກ ທີ່ ສປປ ລາວ ສົ່ງອອກໄປຍັງ ສ. ເກົາຫຼີ ປະກອບມີ : ຖ່ານໄມ້, ເກືອກາລີ ແລະອື່ນໆ. ຂ້າພະເຈົ້າເຊື່ອແນ່ວ່າ: ໃນຕໍ່ໜ້ານີ້, ການຄ້າລະຫວ່າງສອງປະເທດ ແລະການລົງທຶນຂອງ ສ. ເກົາຫຼີ ໃນ ສປປ ລາວ ຈະສືບຕໍ່ເພີ່ມຂຶ້ນຕາມການພົວພັນຮ່ວມມືຂອງສອງປະເທດ ທີ່ນັບມື້ເພີ່ມທະວີຂຶ້ນ.

ສຳລັບການຮ່ວມມືທາງດ້ານຂະແໜງແຮງງານກໍ່ແມ່ນໜຶ່ງໃນຂະແໜງເສດຖະກິດທີ່ສຳຄັນ ລະຫວ່າງສອງປະເທດ ສ. ເກົາຫຼີ ແລະ ສປປ ລາວ. ປັດຈຸບັນມີແຮງງານລາວຈຳນວນຫຼາຍຄົນ ໄດ້ໄປເຮັດວຽກທັງໄລຍະສັ້ນ ແລະ ໄລຍະຍາວ ຢູ່ໃນ ສ.ເກົາຫຼີ ຊຶ່ງໄດ້ປະກອບສ່ວນອັນສຳຄັນ ຕໍ່ເສດຖະກິດຂອງສອງປະເທດ, ໂດຍຕາມຂໍ້ມູນຮອດທ້າຍເດືອນກັນຍາ ປີ 2023 ນີ້ ໃຫ້ຮູ້ວ່າ: ປັດຈຸບັນມີແຮງງານລາວທີ່ໄປເຮັດວຽກຢູ່ໃນ ສ. ເກົາຫຼີ ໂດຍຜ່ານລະບົບ EPS (ລະບົບອະນຸຍາດຈ້າງງານ) ທັງໝົດ 1.863 ຄົນ ແລະ ມີແຮງງານ ທີ່ໄປເຮັດວຽກຕາມລະດູການ ມີເຖິງ 2.351 ຄົນ. ທາງສະຖານເອກອັກຄະລັດຖະທູດ ສ. ເກົາຫຼີ ປະຈຳ ສປປ ລາວ ຈະສືບຕໍ່ຮ່ວມມືກັບລັດຖະບານ ແຫ່ງ ສປປ ລາວ ເພື່ອໃຫ້ໄດ້ແຮງງານລາວໄດ້ໄປເຮັດວຽກຢູ່ໃນ ສ. ເກົາຫຼີ ໃຫ້ຫຼາຍຂຶ້ນກວ່າເກົ່າ.

  1. 3. ທິດທາງການຮ່ວມມື ຂອງສອງປະເທດ ໃນຕໍ່ໜ້າ

ໃນ 2 ປີ ຕໍ່ໜ້ານີ້ຄາດວ່າຈະເປັນໄລຍະເວລາທີ່ສຳຄັນເປັນພິເສດຕໍ່ສາຍພົວພັນຮ່ວມມືຂອງສອງປະເທດ ສ.ເກົາຫຼີ ແລະ ສປປ ລາວ, ເນື່ອງຈາກວ່າ ປີ 2024 ເປັນປີ ທີ່ ສປປ ລາວ ໄດ້ເປັນປະທານອາຊຽນ ແລະ ທັງເປັນປີ ທີ່ ສ.ເກົາຫຼີ ສ້າງຕັ້ງສາຍພົວພັນ ຄູ່ຮ່ວມເຈລະຈາກັບອາຊຽນ ຄົບຮອບ 35 ປີ. ສ່ວນປີ 2025 ແມ່ນປີ ທີ່ສອງປະເທດສ້າງຕັ້ງສາຍພົວພັນການທູດ ຄົບຮອບ 30 ປີ, ໂດຍປີ 2025 ຊິມາເຖິງນັ້ນ ສອງປະເທດ ສ. ເກົາຫຼີ ແລະ ສ​ປ​ປ ລາວ ຈະຮ່ວມກັນທົບທວນ ແລະ ສະເຫຼີມສະຫຼອງຜົນງານການຮ່ວມມືທີ່ສອງປະເທດຍາດມາໄດ້ໃນໄລຍະ 30 ປີຜ່ານມາ ແລະປຶກສາຫາລືເພື່ອວາງທິດທາງແຜນການຮ່ວມມືໃນອີກ 30 ປີຕໍ່ໜ້າ ເພື່ອໃຫ້ການຮ່ວມມືໃນສະເພາະໜ້າມີຄວາມໂດດເດັ່ນກວ່າໄລຍະຜ່ານມາ. ພາຍໃຕ້ຂໍ້ລິເລີ່ມຄວາມສາມັກຄີ ສ. ເກົາຫຼີ - ອາຊຽນ (Korea-Asean Solidarity Initiative: KASI) ຂອງລັດຖະບານແຫ່ງ ສ. ເກົາຫຼີ, ສະຖານທູດ ສ. ເກົາຫຼີ ປະຈຳສປປ ລາວ ພວກເຮົາ ຈະທຸ້ມເທທຸກຄວາມພະຍາຍາມໃນການເສີມຂະຫຍາຍສາຍພົວພັນຂອງສອງປະເທດ ສ. ເກົາຫຼີ ແລະ ສປປ ລາວ ມີບາດກ້າວຂະຫຍາຍຕົວຍິ່ງຂຶ້ນ, ເພື່ອໃຫ້ການຮ່ວມມືໃນຂອບສອງຝ່າຍກາຍເປັນພື້ນຖານທີ່ດີໃນການປະກອບສ່ວນເຂົ້າໃນການເພີ່ມທະວີການຮ່ວມມື ລະຫວ່າງ ສ. ເກົາຫຼີ ແລະອາຊຽນ.

ສຳ​ພາດ​ໂດຍ: ຣັດ​ສະ​ໝີ ດວງ​ສັດ​ຈະ

แชร์