ອັດຕະປື ຈູດທໍາລາຍຢາບ້າ 76 ພັນເມັດ ແລະຢາໄອສ໌ 22 ຖົງ

ໃນວັນທີ 25 ຕຸລາ 2023 ທີ່ຫໍປະຊຸມໃຫຍ່ ແຂວງອັດຕະປື ໄດ້ຈັດພິທີສະຫຼອງວັນແຫ່ງຊາດ ຕ້ານຢາເສບຕິດ ຄົບຮອບ 22 ປີ (12 ຕຸລາ 2001 ຫາ 12 ຕຸລາ 2023) ເປັນກຽດເຂົ້າຮ່ວມຂອງທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ປະທານກໍາມະການກວດກາ ຄວບຄຸມຢາເສບຕິດຂັ້ນແຂວງມີທ່ານ ປອ ບຸນຊູ ສຸລິນັນທອງ ຮອງກອງບັນຊາການປ້ອງກັນຄວາມສະຫງົບແຂວງພ້ອມດ້ວຍແຂກຖືກເຊີນຈາກພາກສ່ວນຕ່າງໆຂອງແຂວງ.

ໃນພິທີທ່ານ ພັນເອກ ອິນທະຫວາ ໂພທິລາດ ຮອງກອງບັນຊາການປ້ອງກັນຄວາມສະຫງົບຫົວໜ້າຫ້ອງຕໍາຫຼວດ ປກສ ແຂວງ ໄດ້ລາຍງານໃຫ້ຮູ້ວ່າ: ຕະຫຼອດໄລຍະ 1 ປີຜ່ານມາ ກອງບັນຊາການ ປ້ອງກັນຄວາມສະຫງົບ ແຂວງ ກໍ່ຄື ຄະນະກຳມະການ ກວດກາຄວບຄຸມຢາເສບຕິດ ຂັ້ນແຂວງ ໄດ້ເຄື່ອນໄຫວເຮັດໜ້າທີ່ວິຊາສະເພາະຂອງຕົນດ້ວຍຄວາມຮັບຜິດຊອບສູງ,ໂດຍການເຄື່ອນໄຫວເຮັດໜ້າທີ່ເກັບກໍາ ແລະ ສັງລວມບັນຊີຊັບ ທີ່ພົວພັນກັບການຄ້າ-ຂາຍຢາເສບຕິດ ສິນທີ່ສານຕັດສິນຮິບເປັນຂອງລັດໄດ້ເຄື່ອນໄຫວເຮັດວຽກງານໂຄສະນາເຜີຍແຜ່ຜົນຮ້າຍຂອງຢາເສບຕິດໄປພ້ອມກັບການປິນປົວ ແລະຟື້ນຟູສຸກຂະພາບຂອງຜູ້ຕິດຢາເສບຕິດວຽກງານສະກັດກັ້ນ 1 ປີຜ່ານມາ ສາມາດທັບມ້າງຄະດີຢາເສບຕິດທັງໝົດ 138 ເລື່ອງ,ກັກຕົວຜູ້ຕ້ອງຫາໄດ້ 288 ຄົນ ຍິງ 31 ຄົນ,ຄົນຕ່າງປະເທດ 5 ຄົນ ຢຶດຂອງກາງ ປະເພດ ຢາບ້າໄດ້ຈຳນວນ 138.493 ເມັດ ເງິນກີບ 81 ລ້ານກວ່າກີບ ເງິນບາດ 100 ບາດ ລົດກະບະ 6 ຄັນ ລົດຈັກ 25 ຄັນ ໂທລະສັບ 151 ເຄື່ອງ ໂມງ 1 ໜ່ວຍ ສາຍຄໍຄ້າຍຄືຄຳ 2 ເສັ້ນ ແຫວນຄ້າຍຄືຄຳ 2 ວົງ ສາຍແຂນ 1 ເສັ້ນ ຕຸ້ມຫູ 3 ຄູ່ ປືນເຊກາເຊ 1 ກະບອກ ໄດ້ສະຫຼຸບຄະດີສົ່ງໃຫ້ໄອຍະການປະຊາຊົນ ແຂວງແລ້ວມີ 61 ເລື່ອງ ມີຜູ້ຕ້ອງຫາ 82 ຄົນ ຍິງ 13 ຄົນ ຄະດີຖືກຊັດມ້ຽນ ຈຳນວນ 1 ເລື່ອງ ຍັງສືບຕໍ່ດຳເນີນ 77 ເລື່ອງ ຜູ້ຕ້ອງຫາ 206 ຄົນ ຍິງ 18 ຄົນ ຄະດີທີ່ສານຕັດສີນແລ້ວ ມີ 124 ເລື່ອງ ມີນັກໂທດ 172 ຄົນ ຍິງ 26 ຄົນ.

ໂອກາດດັ່ງກ່າວໃນພິທີບັນດາແຂກທີ່ເຂົ້າຮ່ວມກໍ່ໄດ້ພ້ອມກັນຈູທໍາລາຍເຄື່ອງຂອງກາງປະເພດຢາເສບຕິດທີ່ສານຕັດສິນໃຊ້ໄດ້ຢ່າງຂາດ,​ ເຊິ່ງມີຢາບ້າ ຈຳນວນ 76.580 ເມັດ ຢາໄອສ໌ 22 ຖົງນ້ອຍນໍ້າໜັກ 10 ພັນກວ່າກຣາມ.

ຂ່າວ: ສີຫົງ ຂ.ອັດຕະປື

แชร์