ທຫລ ແລະ ຮສສ ຮ່ວມມືວຽກງານຄຸ້ມຄອງການໂອນເງິນຂ້າມແດນຂອງແຮງງານ

ພິທີລົງນາມບົດບັນທຶກຄວາມເຂົ້າໃຈລະຫວ່າງ ກົມຄຸ້ມຄອງລະບົບຊໍາລະສະສາງ, ທະນາຄານແຫ່ງ ສປປ ລາວ (ທຫລ) ແລະກົມການຈັດຫາງານ,ກະຊວງແຮງງານ ແລະສະຫວັດດີການສັງຄົມ (ຮສສ) ກ່ຽວກັບ “ການຮ່ວມມືຈັດຕັ້ງປະຕິບັດວຽກງານຄຸ້ມຄອງການໂອນເງິນຂ້າມແດນຂອງແຮງງານລາວຢູ່ຕ່າງປະເທດ ແລະແຮງງານຕ່າງປະເທດຢູ່ ສປປ ລາວ” ໄດ້ຈັດຂຶ້ນໃນວັນທີ 25 ຕຸລາ 2023 ທີ່ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ຮສສ ແລະ ທ່ານ ນາງ ຂັນແກ້ວ ຫຼ້າມະນີເງົາ ຮອງຜູ້ວ່າການ ທຫລ,  ຊຶ່ງຕາງໜ້າລົງນາມໂດຍທ່ານ ມະໂນລິດ ຊຸມພົນພັກດີ ວ່າການຫົວໜ້າກົມຄຸ້ມຄອງລະບົບຊໍາລະສະສາງ ແລະທ່ານ ນາງ ອານຸສອນ ຄຳສິງສະຫວັດ ຫົວໜ້າກົມການຈັດຫາງານ, ມີ ທ່ານ ຈອງ ຢອງຊູ ເອກອັກຄະລັດຖະທູດ ສ.ເກົາຫຼີ ປະຈໍາ ສປປ ລາວ, ຕາງໜ້າຈາກບັນດາກົມພາຍໃນ ທຫລ, ຮສສ, ຕາງໜ້າຈາກທະນາຄານການຄ້າຕ່າງປະເທດລາວ ມະຫາຊົນ, ບໍລິສັດ GLN ແລະ ບັນດາບໍລິສັດຈັດຫາງານເຂົ້າຮ່ວມ.

ການຮ່ວມມື ລະຫວ່າງ ທຫລ ແລະຮສສ ຄັ້ງນີ້ເປັນການຜັນຂະຫຍາຍການຕົກລົງເຫັນດີຂອງຄະນະນຳທັງສອງຝ່າຍໃນກອງປະຊຸມລັດຖະບານເດືອນຕຸລາປີ 2022 ກ່ຽວກັບການຄຸ້ມຄອງ ແລະການອຳນວຍຄວາມສະດວກໃຫ້ແກ່ແຮງງານລາວຢູ່ຕ່າງປະເທດໃນການໂອນເງິນແຮງງານກັບຄືນ ສປປ ລາວ ຊຶ່ງເປັນວຽກໜຶ່ງໃນແຜນວຽກຄະນະສະເພາະກິດ ແກ້ໄຂບັນຫາເຄັ່ງຮ້ອນສະບັບເລກທີ 19/ກມສພ, ລົງວັນທີ 30 ມິຖຸນາ 2023. ປະຈຸບັນ ການໂອນເງິນຂ້າມແດນ ແມ່ນຍັງມີບາງຂໍ້ຈໍາກັດ ເປັນຕົ້ນ: ການເປີດບັນຊີກັບສະຖາບັນການເງິນທີ່ຢູ່ຕ່າງປະເທດຄ່ອນຂ້າງມີຄວາມຫຍຸ້ງຍາກ, ການດຳເນີນເອກະສານການໂອນເງິນກັບປະເທດມີຂັ້ນຕອນຫຼາກຫຼາຍ ແລະຕົ້ນທຶນໃນການໂອນກໍ່ຄ່ອນຂ້າງສູງຊຶ່ງບັນດາຂໍ້ຈໍາກັດ ແລະ ອຸປະສັກດັ່ງກ່າວເຮັດໃຫ້ເກີດມີຊ່ອງວ່າງ ແລະ ບັນຫາຄື: ການໂອນເງິນກັບຄືນປະເທດໂດຍຜ່ານຊ່ອງທາງທີ່ບໍ່ຖືກກົດໝາຍ, ອັດຕາແລກປ່ຽນທີ່ສູງກວ່າອັດຕາແລກປ່ຽນຂອງທະນາຄານເມື່ອໂອນຜ່ານບຸກຄົນຫລືຕົວແທນນາຍຫນ້າທີ່ບໍ່ຖືກຕ້ອງເຮັດໃຫ້ກະທົບຕໍ່ຜົນປະໂຫຍດຂອງແຮງງານລາວຢູ່ຕ່າງປະເທດ.

ເພື່ອເປັນການແກ້ໄຂບັນຫາ ແລະຂໍ້ຫຍຸ້ງຍາກດັ່ງກ່າວ, ທຫລ ແລະ ຮສສ ໄດ້ຮ່ວມກັນຄົ້ນຄວ້າກົນໄກ, ເຄື່ອງມື ແລະຊ່ອງທາງການຊໍາລະເພື່ອສ້າງເງື່ອນໄຂສະດວກໃຫ້ແກ່ຜູ້ອອກແຮງງານທີ່ເຮັດວຽກຢູ່ຕ່າງປະເທດສາມາດສົ່ງເງິນກັບຄືນປະເທດໂດຍຜ່ານລະບົບທະນາຄານຊຶ່ງຈະຊ່ວຍໃຫ້ລັດຖະບານສາມາດຕິດຕາມ, ເກັບກຳຂໍ້ມູນ ແລະກຳນົດນະໂຍບາຍ ແລະກົນໄກໃນການຄຸ້ມຄອງທີ່ເໝາະສົມໃນແຕ່ລະໄລຍະໂດຍໄດ້ເຫັນດີເຮັດໂຄງການຕົວແບບ (Pilot Project) ຊຶ່ງເບື້ອງຕົ້ນໄດ້ເລືອກເອົາ ສ. ເກົາຫຼີ ເປັນປະເທດລິເລີ່ມ ແລະໃນອະນາຄົດອາດຂະຫຍາຍໂຄງການໄປປະເທດອື່ນອີກທີ່ມີແຮງງານລາວຈຳນວນຫລາຍເຊັ່ນ: ປະເທດໄທ ຫຼືຍີ່ປຸ່ນ. ນອກຈາກນີ້ ໃນພິທີ ຍັງມີການເປີດໂຕ“ໂຄງການຕົວແບບການໃຫ້ບໍລິການໂອນເງິນສຳລັບແຮງງານລາວຢູ່ ສ.ເກົາຫຼີ” ຜ່ານລະບົບໂອນເງິນຂ້າມແດນຂອງທະນາຄານການຄ້າຕ່າງປະເທດລາວ ມະຫາຊົນ ຮ່ວມກັບ ບໍລິສັດ GLN ຂອງສ.ເກົາຫຼີ .

ການຮ່ວມມື ລະຫວ່າງ ທຫລ ກັບ ກະຊວງ ຮສສ ແລະການເປີດໂຕໂຄງການຕົວແບບການໃຫ້ບໍລິການໂອນເງິນສຳລັບແຮງງານລາວຢູ່ ສ.ເກົາຫຼີ ໃນຄັ້ງນີ້ ຖືເປັນຜົນສໍາເລັດເພື່ອຕ້ອນຮັບການສະເຫຼີມສະຫຼອງວັນສ້າງຕັ້ງ ທຫລ ຄົບຮອບ 55 ປີ ທັງເປັນຂີດໝາຍ ແລະບາດກ້າວສໍາຄັນໃນການແລກປ່ຽນຂໍ້ມູນ ແລະຮ່ວມກັນຄຸ້ມຄອງການໂອນເງິນຂອງແຮງງານລາວຢູ່ຕ່າງປະເທດ ແລະ ລິເລີ່ມໂຄງການກັບບັນດາປະເທດທີ່ສົ່ງແຮງງານລາວໄປເຮັດວຽກເພື່ອອໍານວຍຄວາມສະດວກໃຫ້ແກ່ແຮງງານລາວທີ່ຢູ່ຕ່າງປະເທດ ແລະ ແຮງງານຕ່າງປະເທດທີ່ຢູ່ ສປປ ລາວ ໃນການໂອນເງິນຄ່າແຮງງານກັບປະເທດຂອງຕົນ, ທັງເປັນການຊຸກຍູ້ການຊໍາລະຜ່ານລະບົບທະນາຄານ, ຄຸ້ມຄອງສະຖຽນລະພາບດ້ານເງິນຕາ ແລະຫຼຸດຊ່ອງວ່າງໃນການຄຸ້ມຄອງຂອງພາກລັດທີ່ອາດສົ່ງຜົນກະທົບຕໍ່ລະບົບເສດຖະກິດຂອງຊາດນໍາອີກ.

 

แชร์