ກຽມສ້າງຂົວຄົນຍ່າງຂ້າມທາງອີກ 3 ແຫ່ງຢູ່ນະຄອນຫລວງວຽງຈັນ

ບໍລິສັດບລູກຣາດສ໌ ດີຊາຍກຣຸບ ຈຳກັດຜູ້ດຽວ ຮ່ວມກັບ ບໍລິສັດກູຣູ ກຽມແຜນຈະສ້າງຂົວຄົນຍ່າງຂ້າມທາງອີກ 3 ແຫ່ງ ຄື: ຈຸດເຂດຫນ້າມະຫາວິທະຍາໄລແຫ່ງຊາດ (ດົງໂດກ) ໃກ້ສີ່ແຍກໄຟແດງໄຟອຳນາດ, ຈຸດເຂດຕະຫລາດເຊົ້າ ຫາ ຕະຫລາດຂົວດິນຄິວລົດເມ ແລະຈຸດຕໍ່ຫນ້າ ພະແນກການເງິນ ນະຄອນຫລວງ ໂດຍຈະເລີ່ມການກໍ່ສ້າງພາຍໃນປີນີ້ ຄາດວ່າຈະໃຫ້ສຳເລັດໃນປີ 2025 ມູນຄ່າການກໍ່ສ້າງປະມານ 1 ລ້ານ 5 ແສນໂດລາສະຫະລັດ.

ທ່ານ ກິຣິຍາ ບັນຈົງພັກດີ ຮອງປະທານບໍລິສັດບລູກາດດີຊາຍກລຸບ ຈໍາກັດຜູ້ດຽວ ໃຫ້ສຳພາດວ່າ: ເພື່ອປະກອບສ່ວນໃນການພັດທະນາພື້ນຖານໂຄງລ່າງ ແລະເຫັນໄດ້ຄວາມສຳຄັນໃນວຽກງານຄວາມປອດໄພຂອງປະຊາຊົນ. ປະຈຸບັນບໍລິສັດບລູກຣາດສ໌ ດີຊາຍກຣຸບ ຈຳກັດຜຸ້ດຽວ ໄດ້ມີການປຶກສາຫາລືກັບຜູ້ຮ່ວມພັດທະນາເພື່ອເລີ່ມການກໍ່ສ້າງຂົວຄົນຍ່າງຂ້າມທາງວ່າຈະເລີ່ມການກໍ່ສ້າງຢູ່ຈຸດໃດກ່ອນ, ຈຸດປະສົງການກໍ່ສ້າງຂົວຄົນຍ່າງຂ້າມທາງແຕ່ລະແຫ່ງແມ່ນເພື່ອອຳນວຍຄວາມສະດວກໃຫ້ແກ່ປະຊາຊົນກໍ່ຄືນັກຮຽນ, ນັກສຶກສາໃນການຮັບປະກັນຄວາມປອດໄພຫລຸດຜ່ອນອຸບັດເຫດ ແລະບໍ່ໃຫ້ການສັນຈອນມີຄວາມແອອັດຕາມທ້ອງຖະຫນົນໃນໄລຍະເວລາຊົ່ວໂມງຮີບດ່ວນກໍ່ຄືໃນໂມງລັດຖະການ.

ທ່ານ ກິຣິຍາ ບັນຈົງພັກດີໃຫ້ສຳພາດຕື່ມວ່າ: ກ່ອນຈະມີແຜນເລີ່ມກໍ່ສ້າງຂົວຄົນຍ່າງຂ້າມທາງ ອີກ 3 ແຫ່ງ ແມ່ນທາງບໍລິສັດໄດ້ສຳເລັດການກໍ່ສ້າງຂົວຄົນຍ່າງຂ້າມທາງແຫ່ງທຳອິດແລ້ວໃນວັນທີ 20 ຕຸລານີ້ ຢູ່ເຂດຫນ້າໂຮງຮຽນມັດທະຍົມສຶກສາສົມບູນລາວ-ຫວຽດນາມ ຫລັກ 5 ຖະຫນົນໄກສອນພົມວິຫານ ມູນຄ່າການກໍ່ສ້າງ 9 ຕື້ກວ່າກີບມູນຄ່າລວມຈໍ LED ໂດຍແມ່ນທຶນຊ່ວຍເຫລືອລ້າຂອງບໍລິສັດ ບລູກຣາດສ໌ ດີຊາຍກຣຸບ ຈຳກັດຜູດຽວ ແລະບໍລິສັດ ກູຣູ.

• 25/10/2023