ທົ່ວຈໍາປາສັກ ມີ 18 ປະເທດເຂົ້າລົງທຶນ, ຈີນຄອງອັນດັບ 1

ປະຈຸບັນ, ມີນັກລົງທຶນຈາກ 18 ປະເທດເຂົ້າໄປລົງທຶນຢູ່ພາຍໃນແຂວງຈໍາປາສັກ , ໃນນັ້ນຫລາຍກວ່າຫມູ່ແມ່ນການລົງທຶນຈາກປະເທດຈີນ, ມີມູນຄ່າການລົງທຶນຫລາຍກວ່າ 1 ຕື້ 500 ລ້ານໂດລາສະຫະລັດ, ມີທັງໝົດ 47 ໂຄງການ, ໃນນີ້ ສ່ວນໃຫຍ່ແມ່ນການລົງທຶນໃນເຂດເສດຖະກິດພິເຂດ ແລະການບໍລິການທ່ອງທ່ຽວ.

ທ່ານ ຄຳຫມ່ານ ຄຸນນະລັງສີ, ຮອງຫົວຫນ້າພະແນກແຜນການ ແລະການລົງທຶນແຂວງຈຳປາສັກໃຫ້ສຳພາດຕໍ່ສື່ມວນຊົນເມື່ອບໍ່ດົນມານີ້ວ່າ: ນອກຈາກການລົງທຶນຂອງນັກລົງທຶນຈາກຈີນທີ່ມີອັດຕາສ່ວນຫລາຍກວ່າໝູ່, ຮອງລົງມາແມ່ນນັກລົງທຶນຈາກປະເທດມາເລເຊຍ ຊຶ່ງມີມູນຄ່າການລົງທຶນຫລາຍກວ່າ 500 ລ້ານໂດລາສະຫະລັດ ໂດຍສຸມໃສ່ຂະແຫນງກະສິກໍາ ເເລະບໍລິການທ່ອງທ່ຽວ. ສ່ວນຫວຽດນາມຈັດຢູ່ອັນດັບທີ 3 ໃນການລົງທຶນ ຊຶ່ງມີການລົງທຶນ 3 ໂຄງການ, ມີຄ່າການລົງທຶນ ຫລາຍກວ່າ 400 ລ້ານໂດລາສະຫະລັດ ໂດຍລົງທຶນເຂົ້າໃນຂະແໜງກະສິກໍາ ແລະອຸດສະຫະກໍາເປັນຕົ້ນຕໍ.

ທ່ານຮອງຫົວໜ້າພະແນກ ໃຫ້ຮູ້ຕື່ມວ່າ: ພາຍຫລັງການລະບາດຂອງພະຍາດໂຄວິດ-19 ໂດຍສະເພາະນັບແຕ່ລັດຖະບານລາວເປີດປະເທດຢ່າງເຕັມຮູບແບບເປັນຕົ້ນມາ ເຫັນວ່າບັນຍາກາດການລົງທຶນຢູ່ພາຍໃນເເຂວງຈຳປາສັກ ມີທ່າອ່ຽງດີຂຶ້ນຢ່າງຕໍ່ເນື່ອງຍ້ອນມີນັກລົງທຶນສະເຫນີຂໍເຂົ້າມາຈົດທະບຽນລົງທຶນໃນຈຳນວນທີ່ເພີ່ມຂຶ້ນ. ນອກຈາກນີ້, ມູນຄ່າການລົງທຶນຢູ່ພາຍໃນແຂວງກໍ່ນັບມື້ເພີ່ມຂຶ້ນເຊັ່ນດຽວກັນເຊີ່ງສ່ວນໃຫຍ່ນັກລົງທຶນໃຫ້ຄວາມສົນໃຈເຂົ້າໄປລົງທຶນໃນຂະແຫນງກະສິກຳໂດຍສະເພາະການປູກພືກຜັກ, ໄມ້ໃຫ້ຫມາກ. ນອກຈາກນີ້, ແມ່ນການບໍລິການທ່ອງທ່ຽວ.

ທີ່ມາ: FM90 ລາຍງານ

แชร์