ຊຸກຍູ້ປະຊາຊົນ 3 ບ້ານ ເມືອງລະຄອນເພັງ ລ້ຽງໄກ່ລາດ

ບໍລິສັດພັດທະນາແຫລ່ງທ່ອງທ່ຽວຕາດເຍືອງ ຫລັກ 40 ເມືອງປາກຊ່ອງ ຈໍາກັດ ຊຸກຍູ້ປະຊາຊົນ 3 ບ້ານ, 325 ຫລັງຄາ, 343 ຄອບຄົວ ຢູ່ເມືອງລະຄອນເພັງ ແຂວງສາລະວັນ. ໃນນັ້ນ, ບ້ານເຕົາຖ່ານ 107 ຫລັງຄາ, 107 ຄອບຄົວ, ບ້ານ ກຸດລໍາພອງ 114 ຫລັງຄາ, 119 ຄອບຄົວ ແລະ ບ້ານ ດອນຂັ່ງ 104 ຫລັງຄາ, 117 ຄອບຄົວ ລ້ຽງໄກ່ລາດ ເພື່ອສະໜອງວັດຖຸດິບໃຫ້ແກ່ຮ້ານອາຫານປິ້ງໄກ່ນາປົ່ງ.

ໃນວັນທີ 23 ຕຸລາ 2023 ນີ້, ທ່ານ ນາງ ສອນທິດາ ອຸນາພົມ ອໍານວຍການບໍລິສັດພັດທະນາແຫລ່ງທ່ອງທ່ຽວຕາດເຍືອງ ຫລັກ 40 ເມືອງປາກຊ່ອງ ຈໍາກັດ ໄດ້ລົງຊຸກຍູ້ປະຊາຊົນ 3 ບ້ານດັ່ງກ່າວ ໂດຍໄດ້ຈັດກອງປະຊຸມຂຶ້ນທີ່ ວັດບ້ານດອນຂັ່ງ ໂດຍມີ ທ່ານ ທອງດີ ຈັນທະວົງ ເຈົ້າເມືອງລະຄອນເພັງ, ທ່ານ ໄຊຊະນະ ສີສະຫວັດ ຮອງເຈົ້າເມືອງ, ຜູ້ຊີ້ນໍາຂົງເຂດເສດຖະກິດຂັ້ນເມືອງ, ມີຫົວໜ້າຂະແໜງລ້ຽງສັດ ແລະ ການປະມົງ ພະແນກກະສິກໍາປ່າໄມ້ແຂວງ, ຫົວໜ້າຫ້ອງການກະສິກໍາ-ປ່າໄມ້ເມືອງ, ຫົວໜ້າຫ້ອງການອຸດສະຫະກໍາ ແລະການຄ້າເມືອງ, ພ້ອມດ້ວຍພາກສວນກ່ຽວຂ້ອງ, ອໍານາດການປົກຄອງ ແລະ ປະຊາຊົນ 3 ບ້ານເຂົ້າຮ່ວມ.

ທ່ານ ນາງສອນທິດາ ອຸນາພົມ ໄດ້ນໍາສະເໜີແນວຄວາມຄິດ ແລະເຈດຈໍານົງໃນການຊຸກຍູ້ ໃຫ້ພໍ່ແມ່ປະຊາຊົນລ້ຽງໄກ່ລາດທີ່ເປັນມູນເຊື້ອເພື່ອຕອບສະໜອງຄວາມຕ້ອງການວັດຖຸດິບ (ໄກ່ລາດ) ໃຫ້ແກ່ການຜະລິດປິ້ງໄກ່ນາປົ່ງ ເຊິ່ງເປັນຜະລິດຕະພັນທີ່ເປັນເອກະລັກ ແລະມີຊື່ສຽງ ຂອງແຂວງສາລະວັນ ໂດຍບໍລິສັດຈະໃຫ້ການສະໜັບສະໜູນ ດ້ານເຕັກນິກວິຊາການ, ຊຸກຍູ້ສົ່ງເສີມ ໃຫ້ພໍ່ແມ່ປະຊາຊົນ ສ້າງສູນເພາະພັນ ແນວພັນໄກ່ກັບທີ່ ເປັນສູນລວມຂອງສາມບ້ານ ແລະ ສ້າງເປັນສູນລວມຕະຫລາດຈໍາໜ່າຍ. ທັງນີ້, ກໍເພື່ອສົ່ງເສີມອາຊີບທີ່ເປັນມູນເຊື້ອ, ສ້າງວຽກເຮັດ ແລະ ສ້າງລາຍໄດ້ໃຫ້ປະຊາຊົນ. ຄຽງຄູ່ກັບການຊຸກຍູ້ການລ້ຽງໄກ່ລາດ, ບໍລິສັດຍັງຈະຊຸກຍູ້ໃຫ້ປະຊາຊົນ ປູກພືດ-ຜັກສະອາດ ເພື່ອນໍາມາສະໜອງໃຫ້ຮ້ານອາຫານປີ້ງໄກ່ນາປົ່ງ ແລະຊຸກຍູ້ຫັດຖະກໍາສີໄມ້ລາຍມື, ທີ່ເປັນມູນເຊື້ອ ແລະເອກະລັກຂອງທ້ອງຖິ່ນ ເພື່ອເຊື່ອມໂຍງວົງຈອນການທ່ອງທ່ຽວ ລະຫວ່າງ ແຂວງພາກໃຕ້ ຈໍາປາສັກ-ສາລະວັນ ແລະກະກຽມຄວາມພ້ອມຮອບດ້ານໃນການຕ້ອນຮັບນັກທ່ອງທ່ຽວ ທັງພາຍໃນ ແລະຕ່າງປະເທດ ທີ່ຈະເດີນທາງມາທ່ອງທ່ຽວ ສປປ ລາວ ໃນປີທ່ອງທ່ຽວລາວ 2024 ທີ່ຈະມາເຖິງນີ້.

ຈາກນັ້ນ, ກອງປະຊຸມໄດ້ປຶກສາຫາລືແລກປ່ຽນຄວາມຄິດເຫັນໃນຫລາຍບັນຫາທີ່ກ່ຽວຂ້ອງ, ຮັບຟັງຄວາມຄິດເຫັນ, ຄວາມຕ້ອງການຂອງອໍານາດການປົກຄອງບ້ານ ແລະ ປະຊາຊົນ ໂດຍເບື້ອງຕົ້ນໄດ້ເປັນເອກະພາບໃຫ້ອົງການປົກຄອງບ້ານນໍາເອົາເນື້ອໃນຈິດໃຈການຊຸກຍູ້ການລ້ຽງໄກ່ລາດຂອງບໍລິສັດໄປເຜີຍແຜ່ໃຫ້ປະຊາຊົນທີ່ບໍ່ໄດ້ເຂົ້າຮ່ວມໃຫ້ຮັບຮູ້. ພ້ອມທັງ, ເກັບກໍາຈໍານວນຄອບຄົວ ຫລື ຜູ້ສົນໃຈການລ້ຽງໄກ່ລາດເພື່ອເປັນຂໍ້ມູນພື້ນຖານໃຫ້ບໍລິສັດໄດ້ດໍາເນີນຊຸກຍູ້ສົ່ງໃນຂັ້ນຕໍ່ໄປ.

• 25/10/2023