ຫລວງພະບາງ ຮຽກຮ້ອງຜູ້ປະກອບການ ໃຫ້ຄວາມຮ່ວມມືໃນການຕິດຕັ້ງປ້າຍ .

ວັນທີ 24 ຕຸລາ 2023, ທ່ານ ຄໍາຜຸຍ ສີຫານາດ ຫົວໜ້າຫ້ອງການຖະແຫລງຂ່າວ, ວັດທະນະທໍາ ແລະທ່ອງທ່ຽວນະຄອນຫຼວງພະບາງ ໃຫ້ຮູ້ວ່າ: ໄລຍະຜ່ານມາຂະແໜງກ່ຽວຂ້ອງ ໃນນະຄອນ ຫລວງພະບາງ ໄດ້ເອົາໃຈໃສ່ກວດກາ ປ້າຍໂຄສະນາຈຳນວນໜຶ່ງ ທີ່ບໍ່ຖືກຕ້ອງຕາມລະບຽບການເປັນຕົ້ນປ້າຍມີແຕ່ພາສາຕ່າງປະເທດ, ບາງປ້າຍພາສາຕ່າງປະເທດໃຫຍ່ກວ່າພາສາລາວ ແລະບາງປ້າຍການອອກແບບ, ສີ, ຂະໜາດບໍ່ຖືກຕ້ອງຕາມລະບຽບການ.

ໄລຍະ 9 ເດືອນປີ 2023 ນີ້, ຄະນະຮັບຜິດຊອບດ້ານວິຊາການໄດ້ລົງຕິດຕາມ,ກວດກາ ໃນຂົງເຂດການຄຸ້ມຄອງຍັງເຫັນວ່າມີບັນດາຫ້າງຮ້ານທີ່ນໍາໃຊ້ປ້າຍໂຄສະນາທີ່ບໍ່ຖືກຕາມລະບຽບການ ເປັນຈໍານວນຫຼາຍ, ເຊິ່ງຄະນະຮັບຜິດຊອບໄດ້ເຮັດບົດບັນທຶກ, ສຶກສາອົບຮົມ ແລະກ່າວເຕືອນຜູ້ປະກອບການພ້ອມທັງຮື້-ຖອນ ປ້າຍໂຄສະນາດັ່ງກ່າວອອກຕາມລະບຽບການ ພ້ອມທັງໄດ້ຮຽກຮ້ອງໃຫ້ຜູ້ປະກອບການ ທັງພາກລັດ ແລະ ເອກະຊົນ, ທີ່ນໍາໃຊ້ປ້າຍ ຈົ່ງໃຫ້ການຮ່ວມມື ໃນການຕິດຕັ້ງປ້າຍໃຫ້ຖືກຕ້ອງຕາມລະບຽບການເພື່ອເຮັດໃຫ້ນະຄອນ ຫລວງພະບາງ ມີຄວາມງົດງາມ ຄ່ຽງຄູ່ກັບເມືອງມໍລະດົກໂລກຫລວງພະບາງ, ນອກນັ້ນຍັງໄດ້ອຳນວຍຄວາມສະດວກບັນດາຜູ້ປະກອບການທຸລະກິດ ໄດ້ເປີດກິດຈະການ-ການບໍລິການເປັນຈໍານວນຫລາຍເພື່ອຮອງຮັບນັກທ່ອງທ່ຽວທີ່ມາທ່ຽວຊົມເມືອງມໍລະດົກໂລກຫລວງພະບາງໃຫ້ມີຄວາມປະທັບໃຈໂດຍມີການວາງລະບຽບການໃຫ້ທຸກຫົວໜ່ວຍທຸລະກິດຜູ້ປະກອບການປະຕິບັດລະບຽບການທີ່ວາງໄວ້ໃຫ້ເຂັ້ມງວດ.

แชร์