ໄຟຟ້າຫົງສາ ມອບ 5 ທຶນໃຫ້ນັກຮຽນ ໄປສຶກສາຕໍ່ ລະດັບປະລິນຍາຕີ

ໃນວັນທີ 23 ຕຸລາ 2023 ນີ້, ບໍລິສັດ ໄຟຟ້າ ຫົງສາ ຈໍາກັດ ໄດ້ຈັດພິທີມອບທຶນການສຶກສາໃຫ້ກັບນັກຮຽນທີ່ຮຽນຈົບຊັ້ນມັດທະຍົມສຶກສາຕອນປາຍ ຢູ່ເມືອງຫົງສາ,ເມືອງເງິນ ແລະເມືອງຊຽງຮ່ອນ ແຂວງໄຊຍະບູລີ ເພື່ອໄປສຶກສາຕໍ່ໃນລະດັບປະລິນຍາຕີ ຈຳນວນ 5 ທຶນ ປະຈໍາປີ 2023, ພາຍໃຕ້ໂຄງການ "ມອບທຶນການສຶກສາສໍາລັບນັກຮຽນທ້ອງຖິ່ນ ລະດັບຊັ້ນມັດທະຍົມສຶກສາຕອນປາຍ ເພື່ອເຂົ້າສຶກສາຕໍ່ໃນລະດັບປະລິນຍາຕີ"(LSSP), ທຶນລະ 55.400.000 ກີບ ໃນສາຂາວິຊາຕ່າງໆ ເຊັ່ນ: ສາຂາວິສະວະກໍາບໍ່ແຮ່ 2 ທຶນ,ສາຂາວິສະວະກໍາໄຟຟ້າ 1 ທຶນ, ສາຂາວິສະວະກໍາສິ່ງແວດລ້ອມ 1 ທຶນ ແລະສາຂາບໍລິຫານທຸລະກິດ 1 ທຶນ ລວມເປັນເງິນທັງໝົດ ຈໍານວນ 277 ລ້ານກີບ. ໃຫ້ກຽດເປັນປະທານຂອງທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ ໂດຍມີທ່ານ ພົມມາ ພົມມະຫານ ຮອງເຈົ້າເມືອງ ເມືອງຫົງສາ, ມີຕົວແທນຈາກຫ້ອງການສຶກສາທິການ ແລະ ກິລາ ເມືອງຫົງສາ ແລະ ເມືອງເງິນ, ພໍ່ແມ່ນັກຮຽນ ແລະພະນັກງານ ກ່ຽວຂ້ອງເຂົ້າຮ່ວມເປັນສັກຂີພິຍານ.

ການມອບທຶນການສຶກສາໃນຄັ້ງນີ້ເພື່ອເປີດໂອກາດໃຫ້ນ້ອງນັກຮຽນທີ່ຮຽນຈົບຊັ້ນມັດທະຍົມສຶກສາຕອນປາຍກໍຄືຜູ້ທີ່ມີຜົນການຮຽນດີ ແລະມີຄວາມປະພຶດດີສາມາດເຂົ້າສຶກສາຕໍ່ໃນລະດັບປະລິນຍາຕີ ໃນສະຖາບັນສຶກສາພາຍໃນ ສປປ ລາວ ຈົນຈົບຫລັກສູດ, ແນໃສ່ຫລຸດຄ່າໃຊ້ຈ່າຍດ້ານການສຶກສາໃຫ້ກັບຜູ້ປົກຄອງ ແລະຄອບຄົວ. ໃນອະນາຄົດຫາກສຳເລັດການສຶກສາໃນລະດັບປະລິນຍາຕີແລ້ວທາງບໍລິສັດຈະມອບສັນຍາການເປັນພະນັກງານຂອງບໍລິສັດໃຫ້ກັບນ້ອງນັກຮຽນເປັນໄລຍະເວລາ 2 ປີ ເພື່ອຮ່ວມເປັນສ່ວນສໍາຄັນໃນການພັດທະນາຄຸນນະພາບຂອງນ້ອງໆ ທີ່ສາມາດນໍາຄວາມຮູ້ຈາກສາຂາວິຊາທີ່ຮຽນຈົບມາໝູນໃຊ້ໃຫ້ເກີດປະໂຫຍດຕໍ່ຕົວເອງ, ຊຸມຊົນ ແລະສັງຄົມຕໍ່ໄປ.

ສໍາລັບປີ 2023 ນີ້, ບໍລິສັດ ໄຟຟ້າ ຫົງສາ ຈໍາກັດ ໄດ້ມີນະໂຍບາຍມອບທຶນການສຶກສາໃນລະດັບຊັ້ນປະລິນຍາຕີ ເຊິ່ງເປັນພັນທະສັນຍາສ່ວນໜຶ່ງທີ່ຈະຕ້ອງປະຕິບັດຕາມພັນທະສັນຍາສໍາປະທານວ່າດ້ວຍການພັດທະນາຄຸນນະພາບຊີວິດ ແລະສັງຄົມອ້ອມຂ້າງ ຈຶ່ງໄດ້ໃຫ້ຄວາມສໍາຄັນ ໃນການພັດທະນາເຍົາວະຊົນ ອັນຈະເປັນກໍາລັງສໍາຄັນ ໃນການພັດທະນາບ້ານເມືອງ ແລະປະເທດຊາດໃນອະນາຄົດ. ດັ່ງນັ້ນບໍລິສັດຈຶ່ງໃຫ້ການສະໜັບສະໜຸນທຶນການສຶກສາໃຫ້ກັບນັກຮຽນທີ່ມີຜົນການຮຽນດີ ໃນລະດັບຊັ້ນປະຖົມສຶກສາຈົນຈົບລະດັບປະລິນຍາຕີມາຕັ້ງແຕ່ປີ 2011 ຈົນເຖິງປັດຈຸບັນເຊິ່ງມີຫລາຍກວ່າ 450 ທຶນ ແລະໃນລະດັບຊັ້ນປະລິນຍາຕີກວ່າ 70 ທຶນ, ພ້ອມທັງເປີດໂອກາດໃຫ້ນ້ອງໆນັກສຶກສາຈາກສະຖາບັນການສຶກສາຕ່າງໆ ພາຍໃນ ສປປ ລາວ ເຂົ້າມາຝຶກງານກັບບໍລິສັດເພື່ອເສີມສ້າງຄວາມຮູ້ ແລະປະສົບການຈາກການເຮັດວຽກຕົວຈິງອີກດ້ວຍ.

แชร์