ຜົນສໍາເລັດກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41

ກອງປະຊຸມຫົວໜ້າຕໍາຫຼວດອາຊຽນຄັ້ງທີ 41 ທີ່ ສປປ ລາວ ເປັນເຈົ້າພາບ ພາຍໃຕ້ຄໍາຂວັນ “ເພີ່ມທະວີການເປັນຄູ່ຮ່ວມໃນການສົ່ງເສີມສັນຕິພາບ, ຄວາມສະຫງົບ ແລະ ຄວາມໝັ້ນຄົງ” ໄດ້ປິດລົງດ້ວຍຜົນສໍາເລັດຢ່າງຈົບງາມ ໃນວັນທີ 19 ຕຸລາ 2023 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ພົຕ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ຫົວໜ້າຕໍາຫຼວດລາວ, ມີບັນດາຫົວໜ້າ ແລະຄະນະຜູ້ແທນຈາກປະເທດສະມາຊິກຕໍາຫຼວດອາຊຽນ, ຄູ່ເຈລະຈາ ແລະປະເທດສັງເກດການເຂົ້າຮ່ວມ.

ໃນກອງປະຊຸມ ຄັ້ງນີ້ ໄດ້ມີບັນດາກອງປະຊຸມປິ່ນອ້ອມທີ່ສໍາຄັນ ເປັນຕົ້ນແມ່ນ ກອງປະຊຸມຄະນະບໍລິຫານງານຕໍາຫຼວດອາຊຽນ ຄັ້ງທີ 12, ກອງປະຊຸມປຶກສາຫາ ລືສະເພາະຫົວໜ້າຄະນະຜູ້ແທນຕໍາຫຼວດອາຊຽນ, ກອງປະຊຸມປຶກສາຫາລືຂອງຫົວໜ້າຄະນະຜູ້ແທນຕໍາຫຼວດອາຊຽນ ແລະ ຄູ່ເຈລະຈາ. ນອກນີ້, ຍັງມີບັນດາກອງປະຊຸມຂັ້ນ ຄະນະອະນຸກໍາມະການ, ກອງປະຊຸມຂັ້ນວິຊາການຈໍານວນໜຶ່ງ ແລະ ຍັງໄດ້ມີການພົບປະຄະນະຜູ້ແທນຕໍາຫຼວດ ລະຫວ່າງ ຄະນະຜູ້ແທນຕໍາຫຼວດລາວ ກັບ ບັນດາປະເທດສະມາຊິກອາຊຽນ, ຄູ່ຮ່ວມເຈລະຈາ ແລະ ປະເທດສະມາຊິກຕໍາຫຼວດອາຊຽນດ້ວຍກັນ, ພົບປະລະຫວ່າງ ປະເທດສະມາຊິກອາຊຽນ ກັບ ປະເທດຄູ່ຮ່ວມເຈລະຈາຕື່ມອີກ, ພ້ອມນີ້ຫົວໜ້າຄະນະຜູ້ແທນທີ່ເຂົ້າຮ່ວມກອງປະຊຸມ ໄດ້ພ້ອມກັນລົງນາມຮັບຮອງເອົາຖະແຫຼງການຮ່ວມ ກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41 ແລະ ມີການມອບ-ຮັບ ສັນຍາລັກຂອງຕໍາຫຼວດອາຊຽນເພື່ອເປັນເຄື່ອງໝາຍໃຫ້ແກ່ປະທານກອງປະຊຸມຫົວໜ້າຕໍາຫຼວດອາຊຽນຄັ້ງທີ 42 ທີ່ ຕໍາຫຼວດປະເທດມຽນມາ ຈະເປັນເຈົ້າພາບ.

ໂອກາດນີ້ ທ່ານ ພົຕ ຄໍາກິ່ງ ຜຸຍຫຼ້າມະນີວົງ ໄດ້ກ່າວປິດກອງປະຊຸມຢ່າງເປັນທາງການຊຶ່ງທ່ານໄດ້ສະແດງຄວາມຊົມເຊີຍຕໍ່ຜົນສໍາເລັດຂອງກອງປະຊຸມໃນຄັ້ງນີ້ ແລະ ຕີລາຄາສູງຕໍ່ຄວາມພະຍາຍາມ ຂອງຄະນະຮັບຜິດຊອບຈັດກອງປະຊຸມ, ກອງເລຂາຕໍາຫຼວດອາຊຽນ ແລະ ອະນຸກໍາມະການທີ່ກ່ຽວຂ້ອງທີ່ເຮັດວຽກງານດ້ວຍຄວາມຮັບຜິດຊອບສູງ ໃນການປະກອບສ່ວນໃຫ້ກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41 ມີຜົນສໍາເລັດຢ່າງໜ້າພູມໃຈ; ໃນໄລຍະ 3 ວັນທີ່ຜ່ານມາບັນດາຄະນະຜູ້ແທນຫົວໜ້າຕໍາຫຼວດອາຊຽນ ໄດ້ມີການປຶກສາຫາລືກັນຢ່າງເລິກເຊີ່ງ ແລະ ກົງໄປ-ກົງມາ, ທັງເປັນການແລກປ່ຽນປະສົບການ, ຂໍ້ສະເໜີແນະ ແລະ ຍຸດທະສາດ ໃນການຕ້ານອາຊະຍາກໍາຂ້າມຊາດທຸກຮູບແບບເພື່ອຫຼຸດຜ່ອນໄພຂົ່ມຂູ່ທີ່ເປັນຜົນກະທົບຕໍ່ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ການພັດທະນາເສດຖະກິດ-ສັງຄົມ ຂອງພາກພື້ນ. ພ້ອມດຽວກັນນີ້, ບັນດາປະເທດສະມາຊິກຕໍາຫຼວດອາຊຽນ ຍັງໄດ້ຮັບຮອງເອົາຖະແຫຼງການຮ່ວມ ຂອງກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41 ພ້ອມທັງກໍານົດທິດທາງແຜນການຮ່ວມມື ໃນການຕ້ານອາຊະຍາກໍາ ລະຫວ່າງ ປະເທດສະມາຊິກອາຊຽນ ແລະຄູ່ຮ່ວມອື່ນໆ ໃນການສ້າງຄວາມເຂັ້ມແຂງໃຫ້ກໍາລັງຕໍາຫຼວດ; ຫວັງຢ່າງຍິ່ງວ່າ ການຮ່ວມມືຂອງບັນດາຄະນະຜູ້ແທນຫົວໜ້າຕໍາຫຼວດອາຊຽນ ຈະມີຄວາມເຕີບໃຫຍ່ ແລະມີຜົນສໍາເລັດ ເພື່ອເປັນການປະກອບສ່ວນສ້າງປະຊາຄົມອາຊຽນໃຫ້ມີຄວາມປອດໄພ. ໂອກາດນີ້, ທ່ານ ພົຕ ຄໍາກິ່ງ ຜຸຍຫຼ້າມະນີວົງ ໃນນາມປະທານກອງປະຊຸມໄດ້ຕາງໜ້າໃຫ້ຕໍາຫຼວດລາວສະແດງຄວາມຂອບໃຈມາຍັງຫົວໜ້າຕໍາຫຼວດ, ຫົວໜ້າຄະນະຜູ້ແທນປະເທດສະມາຊິກອາຊຽນ, ຄູ່ເຈລະຈາ ແລະຜູ້ສັງເກດການທີ່ໄດ້ປະກອບສ່ວນເຮັດໃຫ້ກອງປະຊຸມຄັ້ງນີ້ມີຜົນສໍາເລັດຕາມຈຸດປະສົງ ແລະຄາດໝາຍທີ່ວາງໄວ້.
ທີ່ມາ: ປະຊາຊົນ

แชร์