ເຈົ້າຫນ້າທີ່ ທໍາລາຍຢາສູບ ແລະເຄື່ອງສໍາອາງ 100 ກວ່າແກັດ ທີ່ລັກລອບນໍາເຂົ້າ

ພະແນກສືບສວນ-ສອບສວນ ແລະປາບປາມການລັກລອບໜີພາສີ, ກົມພາສີ ກະຊວງການເງິນ ໄດ້ທໍາລາຍຢາສູບ ແລະເຄື່ອງສໍາອາງໂລຊັນ ທີ່ລັກລອບນໍາເຂົ້າບໍ່ຖືກຕ້ອງ ຢູ່ສະໜາມຂີ້ເຫຍື້ອ ນະຄອນຫຼວງວຽງຈັນ ໃນຕອນບ່າຍຂອງວັນທີ 18 ຕຸລາ 2023, ໂດຍມີ ຜູ້ຕາງໜ້າຈາກກະຊວງສາມາລະນະສຸກ, ກະຊວງອຸດສາຫະກໍາ ແລະ ການຄ້າ, ບໍລິສັດຢາສູບ, ຕໍາຫຼວດເສດຖະກິດ ແລະບັນດາສື່ມວນຊົນເຂົ້າຮ່ວມ.

ທ່ານ ພູເຂົາຄໍາ ວັນນະວົງໄຊ ຫົວໜ້າກົມພາສີ ໃຫ້ຮູ້ວ່າ: ຢາສູບ ແລະໂລຊັນທີ່ມາທໍາລາຍຖີ້ມໃນຄັ້ງນີ້ປະກອບມີ ຢາສູບ ຍີ່ຫໍ PING CHANGE ຈໍານວນ 87 ແກັດ, ເຄື່ອງສໍາອາງປະເພດໂລຊັນ BRIGTY BODY ຈໍານວນ 20 ແກັດ, ເຊິ່ງເປັນສິນຄ້າທີ່ລັກລອບນໍາເຂົ້າບໍ່ຖືກຕ້ອງ ແລະ ໄດ້ຜ່ານດໍາເນີນຄະດີສໍາເລັດ, ເຈົ້າຂອງໄດ້ສະຫຼະສິດ ແລະບໍ່ໄດ້ຮັບອະນຸຍາດຈາກພາກສ່ວນທີ່ກ່ຽວຂ້ອງສິນຄ້າດັ່ງກ່າວຈຶ່ງຕົກເປັນຂອງລັດ; ດັ່ງນັ້ນຈິ່ງໄດ້ມາທໍາລາຍຖີ້ມດ້ວຍການຈູດ ແລະຝັງດິນ.

ໃນໄລຍະຜ່ານມາ, ກົມພາສີ ໄດ້ເນັ້ນໜັກ ແລະລົງເລິກໃນການຊີ້ນໍາໆພາຕໍ່ວຽກງານສືບສວນ-ສອບສວນ ແລະປາບປາມການລັກລອບໜີພາສີໃນຂອບເຂດທົ່ວປະເທດຢ່າງປົກກະຕິ, ໃກ້ຊິດຕິດແທດສາມາດເຄື່ອນໄຫວວຽກງານວິຂາສະເພາະໄດ້ຕາມໜ້າທີ່, ຂອບເຂດສິດທີ່ໄດ້ຮັບການມອບໝາຍຢ່າງມີປະສິດທິຜົນສູງ. ໃນນີ້ແມ່ນການຫັນເອົາວຽກງານດັ່ງກ່າວມາລວມສູນຕາມສາຍຕັ້ງເຮັດໃຫ້ສາມາດສ້າງ: ຂະຫຍາຍຕາໜ່າງຂ່າວ, ກວດກາ, ຈັບກຸມ ແລະ ດໍາເນີນຄະດີບັງຄັບໃຊ້ກົດໝາຍຢ່າງເຂັ້ມງວດໃນຂອບເຂດທົ່ວປະເທດ.

ທີ່ມາ: ຄວາມສະຫງົບ

• 19/10/2023