ອັດຕະປື ຮຽກຮ້ອງໃຫ້ສັງຄົມ ຢຸດເຊົາຂຸດຄົ້ນຂີ້ກະເດືອນທຳມະຊາດ

ກ່ຽວກັບການຂຸດຄົ້ນເອົາຂີ້ກະເດືອນໃນທຳມະຊາດຂອງປະຊາຊົນໃນແຂວງອັດຕະປື ທີ່ໄດ້ດຳເນີນເປັນທຸລະກິດຊື້-ຂາຍ ເພື່ອແປຮູບສົ່ງອອກຕ່າງປະເທດຖືເປັນບັນຫາທີ່ກຳລັງພົ້ນເດັ່ນເຊິ່ງໃນໄລຍະມໍ່ໆມານີ້ໄດ້ມີກະແສຫາງສຽງຜ່ານສື່ສັງຄົມອອນລາຍທີ່ມີຂະບວນການນັກທຸລະກິດຊາວຈີນເຂົ້າມາເກັບຊື້ຂີ້ກະດິນເດືອນທຳມະຊາດ ແລະ ພໍ່ແມ່ປະຊາຊົນເຫັນວ່າມີລາຍຮັບເນື່ອງຈາກຊອກຫາໂດຍບໍ່ໄດ້ລົງທຶນຈິ່ງພ້ອມພາກັນຊອກຂຸດຄົ້ນຢ່າງເປັນຂະບວນກວ້າງຂວາງ ແລະເກັບຊື້-ຂາຍໃນລາຄາສູງສົມຄວນຕໍ່ກິໂລ.

ທ່ານນາງ ວົງເດືອນ ຟອງສະໝຸດ ຮອງຫົວໜ້າພະແນກກະສີກຳ ແລະປ່າໄມ້ແຂວງ ອັດຕະປືໃຫ້ຮູ້ວ່າ: ການດຳເນີນກິດຈະການຂຸດຄົ້ນ ແລະໃຊ້ເຄື່ອງມືທັນສະໄໝຂຸດຄົ້ນເອົາກະດິນເດືອນທຳມະຊາດ ເພື່ອໄປຂາຍໃຫ້ຜູ້ປະກອບການເກັບຊື້ຢູ່ຕາມຈຸດຕ່າງໆແມ່ນໄດ້ຂະຫຍາຍອອກສູ່ວົງກວ້າງ, ໃນຄະນະດຽວກັນເມື່ອເປັນບັນຫາສັງຄົມເກີດມີຄວາມຕ້ອງການຕໍ່ຄຸນຄ່າລາຄາຂອງຂີ້ກະເດືອນທາງພະແນກກະສິກຳ-ປ່າໄມ້ແຂວງ ອັດຕະປື ໂດຍໄດ້ຮັບການຊີ້ນໍາຈາກຂັ້ນເທິງ ກໍ່ໄດ້ອອກແຈ້ງການ ຫ້າມເກັບກູ້ ແລະຊື້-ຂາຍ ຂີ້ກະເດືອນທຳມະຊາດ, ເຫດຜົນທີ່ອອກແຈ້ງການດັ່ງກ່າວ ຍ້ອນເຈົ້າຫນ້າທີ່ກ່ຽວຂ້ອງຂອງແຂວງກວດພົບມີຊາວຕ່າງປະເທດຈໍານວນຫນຶ່ງນໍາເອົາເຄື່ອງມືທັນສະໄຫມມານໍາໃຊ້ເຂົ້າໃນການຊັ໊ອດເກັບກູ້ຂີ້ກະດິນເດືອນ ເຮັດໃຫ້ມີຄວາມສ່ຽງສູງທີ່ຈະສູນພັນ ແລະບັນຫາອື່ນໆກໍ່ອາດຈະເກີດຂຶ້ນໃນລັກສະນະເຊັ່ນດຽວກັນ ແລະພໍ່ແມ່ປະຊາຊົນຍັງມີຈຳນວນຫຼາຍບໍ່ທັນໄດ້ຮັບຮູ້, ເຂົ້າໃຈເທົ່າທີ່ຄວນ ຫຼືບາງຈຳນວນອາດຈະຮັບຮູ້ແຕ່ວ່າມັນເປັນສິ່ງທີ່ຊອກຫາຢູ່ໃນທຳມະຊາດໂດຍບໍ່ໄດ້ລົງທຶນຫຼາຍ ແລະຂາດການຄຳນຶງເຖິງຜົນເສຍຫາຍຕໍ່ສິ່ງແວດລ້ອມຈິ່ງມີການດຳເນີນຢ່າງຫຼວງຫຼາຍ.

ຜ່ານການກວດກາ ມີຂໍ້ມູນຈຸດລັກລອບເກັບຊື້ຢູ່ 3 ເມືອງຄື: ເມືອງສາມັກຄີໄຊ ມີ 2 ຈຸດ, ເມືອງໄຊເສດຖາ ມີ 2 ຈຸດ ແລະເມືອງສະໜາມໄຊມີ 3 ຈຸດ, ການຂຸດຄົ້ນເອົາຂີ້ກະເດືອນໃນຮູບແບບຕ່າງໆ ມີຜົນກະທົບຕໍ່ພື້ນທີ່ດິນນາ, ຮົ້ວສວນ ແລະຜົນລະປູກ ຂອງປະຊາຊົນ, ບຸກຄົນ ຫຼື ນິຕິບຸກຄົນ, ຮ້າຍແຮງໄປກວ່ານັ້ນຍັງມີການມ້າງຮົ້ວໃນເນື້ອທີ່ດິນຂອງຄົນອື່ນແບບຊະຊາຍ, ເຮັດໃຫ້ພະນັກງານ ແລະ ພໍ່ແມ່ປະຊາຊົນຈຳນວນໜຶ່ງໄດ້ຮ້ອງຮຽນຫາພາກສ່ວນກ່ຽວຂ້ອງຊ່ວຍແກ້ໄຂບັນຫາທີ່ເກີດຂຶ້ນ ແລະ ໃນກໍລະນີຜູ້ລະເມີດດັ່ງກ່າວເຈົ້າໜ້າທີ່ກໍ່ໄດ້ສ້າງບົດບັນທຶກກັບລາຍບຸກຄົນໃຫ້ຢຸດຕິກ່ອນຊົ່ວຄາວ ຫຼືເຊົາເລີຍເປັນທີ່ຮຽບຮ້ອຍແລ້ວ.

ສະນັ້ນ, ໃນໜັງສືແຈ້ງຕອບຈາກກົມປ່າໄມ້ກະຊວງກະສິກຳ-ປ່າໄມ້ ຈຶ່ງເຫັນໃຫ້ ປະຕິບັດຕາມແຈ້ງການຂອງພະແນກກະສິກຳ ແລະປ່າໄມ້ ແຂວງອັດຕະປືສະບັບເລກທີ 1934/ກປຂ, ລົງວັນທີ 13 ກັນຍາ 2023 ຢ່າງເຂັ້ມງວດ. ເພາະການຂຸດຄົ້ນ, ຊື້ຂາຍຂີ້ກະເດືອນໃນປ່າໄມ້ ແລະທີ່ດິນປ່າໄມ້ ເປັນພຶດຕິກຳທີ່ສົ່ງຜົນກະທົບອັນບໍ່ດີຕໍ່ລະບົບນິເວດປ່າໄມ້ ແລະ ເຊື່ອມຄຸນະພາບຂອງດິນ, ຂີ້ກະເດືອນມີຄຸນປະໂຫຍດຫຼາຍຕໍ່ການປັບປຸງໂຄງສ້າງຂອງດິນ ແລະເພີ່ມຄວາມສົມດຸນໃຫ້ແກ່ສິ່ງແວດລ້ອມ ແລະຍັງເປັນການຍ່ອຍສະລາຍຂອງທາດອິນຊີໃນດິນ, ສ່ວນມູນຂອງຂີ້ກະເດືອນຍັງເປັນປຸ໋ຍທີ່ສຳຄັນຕໍ່ກັບພືດ ແລະປ່າໄມ້ອີກດ້ວຍ.

ແນວໃດກໍຕາມລັດຖະບານຍັງຊຸກຍູ້ ແລະສົ່ງເສີມບຸກຄົນ,ນິຕິບຸກຄົນໃຫ້ລ້ຽງເພື່ອເປັນທຸລະກິດໂດຍການສ້າງຕັ້ງເປັນຟາມ,ເປັນກຸ່ມການຜະລິດໂດຍນຳເອົາຂີ້ກະເດືອນຈາກທຳມະຊາດມາຂະຫຍາຍພັນແລ້ວຈິ່ງສາມາດຄ້າຂາຍໄດ້ແຕ່ການອະນຸຍາດດໍາເນີນທຸລະກິດ ແລະການສ້າງຕັ້ງນັ້ນຕ້ອງໃຫ້ສອດຄ່ອງຕາມກົດໝາຍ ແລະໃຫ້ປະຕິບັດຕາມລະບຽບການທີ່ກ່ຽວຂ້ອງຢ່າງເຂັ້ມງວດ.

ທີ່ມາ: ຂ່າວສານອອນລາຍ ອັດຕະປື

แชร์