ຮ້ານປີ້ງໄກ່ລາດນາປົ່ງ ເມືອງຄົງເຊໂດນ ແຂວງສາລະວັນ ມີຄວາມພ້ອມຮອບດ້ານ ເພື່ອບໍລິການ ຕ້ອນຮັບແຂກພາຍໃນ ແລະຕ່າງປະເທດ ທີ່ຈະເດີນທາງເຂົ້າມາທ່ອງທ່ຽວຢູ່ ສປປ ລາວ ກໍຄື ບັນດາແຂວງພາກໃຕ້, ພ້ອມທັງຮັບປະກັນດ້ານຄຸນນະພາບໃໝ່ ໂດຍແມ່ນ ບໍລິສັດ ພັດທະນາແຫລ່ງທ່ອງທ່ຽວຕາດເຍືອງ ຫລັກ 40 ເມືອງປາກຊ່ອງ ຈໍາກັດ ທີ່ໄດ້ຮັບອະນຸຍາດຈາກອຳນາດການປົກຄອງແຂວງສາລະວັນ ກໍຄື ເມືອງຄົງເຊໂດນ ເພື່ອມາສົ່ງເສີມ ແລະຍົກລະດັບມາດຕະຖານປີ້ງໄກ່ລາດນາປົ່ງຄຸນນະພາບໃໝ່ໂດຍເລີ່ມເປີດໃຫ້ບໍລິການ ມາແຕ່ວັນທີ 16 ຕຸລາ 2023 ຢູ່ບ້ານນາປົ່ງ ເມືອງຄົງເຊໂດນ ແຂວງສາລະວັນ, ທັງເປັນການກະກຽມຄວາມພ້ອມຕ້ອນຮັບນັກທ່ອງທ່ຽວທ້າຍປີ 2023 ແລະປີທ່ອງທ່ຽວລາວ 2024 ທີ່ຈະມາເຖິງນີ້.

 

ໃນວັນທີ 16 ຕຸລາ 2023 ນີ້, ໄດ້ມີກອງປະຊຸມສືບຕໍ່ປະຕິບັດຕາມຂໍ້ຕົກລົງ ສະບັບເລກທີ 333/ຈມຄດ ລົງວັນທີ 5 ກໍລະກົດ 2023 ວ່າດ້ວຍອະນຸຍາດຈາກອໍານາດການປົກຄອງ ເມືອງຄົງເຊໂດນ ແຂວງສາລະວັນ ໃຫ້ບໍລິສັດ ພັດທະນາແຫລ່ງທ່ອງທ່ຽວ ຕາດເຍືອງ ຫລັກ 40 ເມືອງປາກຊ່ອງຈໍາກັດ ມາສົ່ງເສີມຍົກລະດັບມາດຕະຖານປີ້ງໄກ່ລາດນາປົ່ງ ໃຫ້ມີຄຸນນະພາບໃໝ່ ໂດຍມີທ່ານ ສົມຈັນ ຈັນທະພູທອນ ຮອງເຈົ້າເມືອງຜູ້ຊີ້ນໍາເສດຖະກິດ ເມືອງຄົງເຊໂດນ ແຂວງສາລະວັນ, ທ່ານນາງ ສອນທິດາ ອຸນາພົມ ຜູ້ອໍານວຍການພັດທະນາແຫລ່ງທ່ອງທ່ຽວ ຕາດເຍືອງ ຫລັກ 40 ເມືອງປາກຊ່ອງຈໍາກັດ ແລະ ພາກສ່ວນກຽວຂ້ອງເຂົ້າຮ່ວມ.

 

ທ່ານນາງ ສອນທິດາ ອຸນາພົມ ຜູ້ອໍານວຍການບໍລິສັດພັດທະນາແຫລ່ງທ່ອງທ່ຽວ ຕາດເຍືອງ ຫລັກ 40 ເມືອງປາກຊ່ອງ ຈໍາກັດ ໄດ້ໃຫ້ຮູ້ວ່າ: ປັດຈຸບັນ ບໍລິສັດ ພັດທະນາແຫລ່ງທ່ອງທ່ຽວ ຕາດເຍືອງ ຫລັກ 40 ເມືອງປາກຊ່ອງ ຈໍາກັດ ຮ່ວມກັບອໍານາດການປົກຄອງເມືອງຄົງເຊໂດນ ໄດ້ຊຸກຍູ້ສົ່ງເສີມໃຫ້ ພໍ່ແມ່ປະຊາຊົນລ້ຽງໄກ່ລາດ ຢູ່ເມືອງຄົງເຊໂດນ ມີຢູ່ 4 ບ້ານຄື: ບ້ານໂຮງເລື່ອຍມີໄຊ, ບ້ານນາປົ່ງ, ບ້ານດິນກອກ ແລະບ້ານຄຸດມີໄຊ, ມີ 1009 ຫລັງຄາເຮືອນ, 1302 ຄອບຄົວ ສະໜອງໄກ່ລາດໃຫ້ຮ້ານປີ້ງໄກ່ນາປົ່ງ 2.700 ໂຕຕໍ່ເດືອນ, ພ້ອມນີ້, ຍັງມີໂຮງປອກໄກ່ບ້ານນາປົ່ງ ໜີບໄມ້ປີ້ງພ້ອມສົ່ງສໍາເລັດຮູບ, ປັບປຸງປີ້ງໄກ່ລາດຄຸນນະພາບໃໝ່ ໃຫ້ແຕ່ລະຮ້ານມີໄສ້ກ້ຽວຕີນ, ມີຕັບ-ໃຕຢູ່ໃນ1 ປີ້ງ. ພ້ອມທັງຕັ້ງກອງທຶນໃຫ້ແກ່ປະຊາຊົນ 4 ບ້ານດັ່ງກ່າວ.

 

ສໍາລັບການພັດທະນາຮ້ານປີ້ງໄກ່ນາປົ່ງທີ່ມີຄຸນນະພາບໃໝ່ໃນຕໍ່ໜ້າ ແມ່ນຈະໄດ້ປັບປຸງຫລາຍດ້ານໂດຍສະເພາະປັບປຸງໜ້າຮ້ານໃຫ້ມີສີສັນຈົບງາມ, ຫ້ອງນໍ້າສະອາດ ແລະອອກແບບຮູບຊົງ ຮ້ານທີ່ເປັນເອກະລັກ ປະຈໍາບ້ານໃນຮູບຊົງລາວເດີມພ້ອມທັງອອກໃບຢັ້ງຢືນໃຫ້ຮ້ານດ້ານວັດທະນະທໍາ ຟື້ນຟູປັບປຸງປີ້ງໄກ່ລາດໃຫ້ມີຄຸນນະພາບໃໝ່.