ເປີດໂຄງການ “ປິ່ນປົວຫົວໃຈເດັກນ້ອຍ ຂ້າມຂອງ”

ໂຄງການປິ່ນປົວຫົວໃຈເດັກນ້ອຍຮ່ວມກັນຂອງສອງຝັ່ງຂອງໄດ້ເປີດຂຶ້ນໃນວັນທີ 13 ຕຸລາ 2023 ຜ່ານມານີ້ ທີ່ໂຮງໝໍມະໂຫສົດ ນະຄອນຫຼວງວຽງຈັນ, ໂດຍການເປັນປະທານຂອງ ທ່ານ ເຕດ ບຸນນາດ ເລຂາທິການສະພາກາຊາດໄທ ແລະທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ສປປ ລາວ, ມີທ່ານນາງ ມໍຣະກົດ ສີສະຫວັດ ເອກອັກຄະຣາຊະທູດໄທ ປະຈຳ ສປປ ລາວ, ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ, ພ້ອມດ້ວຍຜູ້ອຳນວຍການໂຮງໝໍມະໂຫສົດ, ຜູ້ອຳນວຍການໂຮງໝໍຈຸລາລົງ ສະພາກາຊາດໄທ, ຄະນະຜູ້ບໍລິຫານຈາກຄະນະແພດສາດ ຈຸລາລົງກອນມະຫາວິທະຍາໄລ, ມູນນິທິເພື່ອສະໜັບສະໜູນການຜ່າຕັດຫົວໃຈເດັກ ແລະມູນນິທິເກື້ອຝັນເດັກ ເຂົ້າຮ່ວມດ້ວຍ.

ໂຄງການ “ປິ່ນປົວຫົວໃຈເດັກນ້ອຍ ຂ້າມຂອງ” ເປັນການຮ່ວມມືລະຫວ່າງສະຖານເອກອັກຄະຣາຊະທູດໄທ ປະຈຳ ສປປ ລາວ, ສະພາກາຊາດໄທ, ໂຮງໝໍຈຸລາລົງ ສະພາກາຊາດໄທ, ຄະນະແພດສາດຈຸລາລົງກອນມະຫາວິທະຍາໄລ, ມູນນິທິເພື່ອສະໜັບສະໜູນການຜ່າຕັດຫົວໃຈເດັກ ແລະມູນນິທິເກື້ອຝັນເດັກ ກັບກະຊວງສາທາລະນະສຸກ ສປປ ລາວ ແລະໂຮງໝໍມະໂຫສົດມີວັດຖຸປະສົງເພື່ອໃຫ້ທີມແພດຮ່ວມກວດຄັດກອງເພື່ອນຳຜູ້ປ່ວຍພະຍາດຫົວໃຈເດັກຈາກ ສປປ ລາວ ໄປຜ່າຕັດຮັກສາທີ່ປະເທດໄທ ແລະເພື່ອພັດທະນາສັກກະຍະພາບບຸກຄະລາກອນທາງການແພດດ້ານການຜ່າຕັດຫົວໃຈເດັກໃນ ສປປ ລາວ ໂດຍເນັ້ນສົ່ງເສີມໃຫ້ເກີດການຮ່ວມມືໃນການຮັກສາພະຍາດຫົວໃຈເດັກໃນ ສປປ ລາວ ຢ່າງຍືນຍົງ.

• 18/10/2023