ສຄອ ຈຳປາສັກແຕ່ງຕັ້ງຄະນະບໍລິຫານງານຊຸດໃໝ່

 ອໍານາດການປົກຄອງແຂວງຈໍາປາສັກໄດ້ອະນຸມັດແຕ່ງຕັ້ງທ່ານ ນາງ ບຸນເຮືອງ ລິດດັງ ເປັນປະທານສະພາການຄ້າ ແລະອຸດສາຫະກໍາຊຸດທີVIII ພ້ອມປະ ກາດຢ່າງເປັນທາງການຄະນະບໍລິຫານງານຊຸດໃໝ່ເພື່ອເສີມສ້າງ ແລະຍົກລະດັບມາດຖານການຊຸກຍູ້ສົ່ງເສີມພາກທຸລະກິດພາຍໃນແຂວງໃຫ້ມີການເຕີບໃຫຍ່ຂະຫຍາຍຕົວຍິ່ງຂຶ້ນ.

  ກອງປະຊຸມໃຫຍ່ຄັ້ງທີ VIII ແລະພິທີປະກາດປະທານ ແລະຄະນະບໍລິຫານງານຊຸດໃໝ່ຂອງສະພາການຄ້າ ແລະ ອຸດສາຫະກໍາແຂວງຈໍາປາສັກ,ໄດ້ມີຂຶ້ນໃນວັນທີ 5 ເມສາຜ່ານມາ, ທີ່ນະຄອນປາກເຊ ແຂວງຈໍາປາສັກ, ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ສົມສະໜິດ ວຸດຕິວົງ ຮອງເຈົ້າແຂວງໆຈໍາປາ ສັກ, ມີທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກໍາແຫ່ງຊາດ, ທ່ານຫົົວໜ້າພະແນກອຸດສາຫະກໍາ ແລະການຄ້າແຂວງ ແລະບັນດາ ທ່ານແຂກຜູ້ໃຫຍ່ທີ່ກ່ຽວຂ້ອງພ້ອມດ້ວຍບັນດານັກທຸລະກິດພາຍໃນແຂວງເຂົ້າຮ່ວມຢ່າງພ້ອມພຽງ.

  ສະພາການຄ້າ ແລະອຸດສາຫະກໍາ ແຂວງຈໍາປາສັກ ແມ່ນອົງການຈັດຕັ້ງທາງສັງຄົມຂອງນັກທຸລະກິດ, ເປັນຂົວຕໍ່ລະຫວ່າງອົງການຂອງລັດກັບຫົວໜ່ວຍ ທຸລະກິດ, ເປັນຕົວແທນໃຫ້ແກ່ຜູ້ໃຊ້ແຮງງານ, ສະມາຄົມ-ນັກທຸລະກິດ, ປະເພດວິສາຫະກິດຕ່າງໆທີ່ສ້າງຕັ້ງ ແລະ ເຄື່ອງໄຫວຕາມລະບຽບກົດໝາຍຂອງ ສປປ ລາວ, ມີພາລະບົດບາດໃນການປະກອບແກ່ລັດຖະບານກ່ຽວກັບທຸລະກິດ, ປຸກລະດົມຂົນຂວາຍ, ສຶກສາອົບຮົມ, ນໍາພາຈັດຈັ້ງ, ເຕົ້າໂຮມນັກທຸລະກິດເພື່ອພັດທະນາເສດຖະກິດ, ການຄ້າ-ອຸດສາຫະກໍາ, ການເງິນ ແລະການບໍລິການ, ປົກປ້ອງສິດຜົນປະໂຫຍດອັນຊອບທໍາຂອງວິສາຫະກິດ ແລະນໍາພາການເຄື່ອນໄຫວທຸລະ ກິດໃຫ້ຖືກຕ້ອງຕາມລະບຽບກົດໝາຍ.

  ສໍາລັບການປະກາດແຕ່ງຕັ້ງປະທານ ແລະຄະນະບໍລິຫານງານຊຸດໃໝ່ຂອງສະພາການຄ້າ ແລະອຸດສາຫະກໍາແຂວງຈໍາປາສັກຊຸດທີ VIII ໄດ້ມີການຕົກລົງ ເຫັນດີ ແລະເປັນເອກພາບກັນດັ່ງນີ້: ແຕ່ງຕັ້ງທ່ານ ນາງ ບຸນເຮືອງ ລິດດັງ ເປັນປະທານສະພາການຄ້າ ແລະອຸດສາຫະກໍາ, ທ່ານ ໄຊຍະເພັດ ອະພິໄຊ ເປັນຮອງ ປະທານ, ທ່ານ ນາງ ແກ່ນຕາ ບຸດດາວົງ ເປັນຮອງປະທານ, ທ່ານ ສາລິວົງປະຊາ ເປັນຮອງປະທານ, ທ່ານ ປະຈິດ ນໍລະແສງ ຮອງປະທານ ແລະທ່ານ ລັດສະໜີ ຮຸ່ງໄຊຍະສິງ ເປັນຮອງປະທານ ແລະ ແຕ່ງຕັ້ງຄະນະປະຈໍາອີກ 7 ທ່ານ ແລະ ແຕ່ງຕັ້ງປະທານ ແລະຮອງປະທານຈໍາ ນວນ 4 ທ່ານ.

ຂ່າວ: ໂພທິຣາຊ  

• 10/04/2019