ສປປ ລາວ ເປັນເຈົ້າພາບຈັດກອງປະຊຸມຫົວໜ້າຕໍາຫລວດອາຊຽນ ຄັ້ງທີ 41

ກອງປະຊຸມຫົວໜ້າຕໍາຫລວດ ອາຊຽນ ຄັ້ງທີ 41 ໄດ້ໄຂຂຶ້ນຢ່າງເປັນທາງການ ທີ່ນະຄອນຫລວງວຽງຈັນ ໃນວັນທີ 17 ຕຸລາ 2023 ນີ້, ພາຍໃຕ້ຄໍາຂັວນ “ເພີ່ມທະວີການເປັນຄູ່ຮ່ວມໃນການສົ່ງເສີມສັນຕິພາບ, ຄວາມສະຫງົບ ແລະ ຄວາມໝັ້ນຄົງ”. ໃຫ້ກຽດເຂົ້າຮ່ວມຂອງ ທ່ານ ພົນເອກ ວິໄລ ຫລ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ.

ໂອກາດນີ້, ທ່ານ ພົນເອກ ວິໄລ ຫລ້າຄໍາຟອງ ໃນນາມປະທານກອງປະຊຸມໄດ້ກ່າວວ່າ: ກອງປະຊຸມຫົວໜ້າຕໍາຫລວດອາຊຽນ ຄັ້ງທີ 41 ໄດ້ໄຂຂຶ້ນໃນເງື່ອນໄຂສະພາບແວດລ້ອມທີ່ມີທັງສິ່ງອໍານວຍຄວາມສະດວກ ແລະສິ່ງທ້າທາຍທົດສອບຫລາຍດ້ານ, ກອງປະຊຸມຄັ້ງນີ້, ຍັງເປັນກອງປະຊຸມໜຶ່ງທີ່ສໍາຄັນ, ເພາະເປັນການສືບຕໍ່ເຈດຕະນາລົມແຫ່ງການຮ່ວມມືດ້ານວຽກງານຕໍາຫລວດ ລະຫວ່າງບັນດາປະເທດສະມາຊິກ ຕໍາຫລວດອາຊຽນ, ຄູ່ເຈລະຈາ ແລະປະເທດສັງເກດການເພື່ອແກ້ໄຂບັນຫາອາຊະຍາກໍາຂ້າມຊາດເປັນຕົ້ນແມ່ນການລັກລອບຄ້າ-ຂາຍຢາເສບຕິດ, ການກໍ່ການຮ້າຍ, ການຄ້າມະນຸດ, ການຄ້າ-ຂາຍອາວຸດ, ການຄ້າ-ຂາຍສັດປ່າ ທີ່ຜິດກົດໝາຍ, ອາຊະຍາກໍາທາງທະເລ, ອາຊະຍາກໍາທາງດ້ານການຄ້າ ແລະ ການປອມແປງບັດເຄຣດິດ, ການສໍ້ໂກງຂ້າມຊາດ, ການປອມແປງເອກະສານເດີນທາງ, ອາຊະຍາກໍາທາງຄອມພິວເຕີ ແລະອາຊະຍາກໍາອື່ນໆ ທີ່ເປັນໄພຂົ່ມຂູ່ຕໍ່ສະຖຽນລະພາບທາງດ້ານການເມືອງ,ຄວາມໝັ້ນຄົງທາງດ້ານເສດຖະກິດ ແລະການພັດທະນາທາງດ້ານວັດທະນະທໍາ-ສັງຄົມ ຂອງພາກພື້ນ ແລະ ສາກົນ. ດັ່ງນັ້ນກອງປະຊຸມໃນຄັ້ງນີ້ແມ່ນມີຄວາມສໍາຄັນຢ່າງຍິງຕໍ່ກັບການເພີ່ມທະວີການຮ່ວມມືທັງໃນລະດັບພາກພື້ນ ແລະສາກົນ ໃນການຕອບຕ້ານຄືນບັນຫາອາຊະຍາກໍາຕ່າງໆ ເພື່ອແນໃສ່ເຮັດໃຫ້ພາກພື້ນກໍຄືປະຊາຄົມໃນທົ່ວໂລກມີສັນຕິພາບ, ຄວາມສະຫງົບ ແລະໝັ້ນຄົງ.

ທີ່ມາ: ຂປລ.

• 17/10/2023