ສປປ ລາວ ຢຶນຢັນເຂົ້າເຖິງການລ້າງມື ແລະສຸຂະອະນາໄມທີ່ດີສຳລັບທຸກຄົນ

ລັດຖະບານ ແຫ່ງສປປ ລາວ ເເລະອົງການອຸຍນີເຊັບ ໄດ້ຢືນຢັນຄືນເຖິງຄວາມມຸ່ງໝັ້ນຂອງທັງສອງຝ່າຍເພື່ອຮັບປະກັນການເຂົ້າເຖິງການລ້າງມື ແລະສຸຂະອະນາໄມ ທີ່ດີສຳລັບທຸກຄົນໃນໂອກາດວັນລ້າງມືສາກົນເພື່ອເປັນຂີດໝາຍຄົບຮອບ 50 ປີ ຂອງການຮ່ວມມືລະຫວ່າງລັດຖະບານແຫ່ງ ສປປ ລາວ ແລະອົງການອຸຍນີເຊັບ. ວັນລ້າງມືສາກົນ ແມ່ນໄດ້ສະເຫລີມສະຫລອງ ໃນວັນທີ 15 ຕຸລາຂອງທຸກປີ ໂດຍມີຈຸດປະສົງເພື່ອສ້າງຄວາມເຂົ້າໃຈກ່ຽວກັບບົດບາດອັນສຳຄັນຂອງການລ້າງມືໃນການປ້ອງກັນພະຍາດ ແລະຮັກສາຊີວິດເຊິ່ງຫົວຂໍ້ຂອງວັນລ້າງມືສາກົນປີນີ້ແມ່ນ “ມືທີ່ສະອາດສໍາລັບທຸກຄົນ" ທີ່ໄດ້ເນັ້ນໜັກໃສ່ສິດທິຂອງທຸກຄົນໂດຍສະເພາະເດັກນ້ອຍ ໃນການເຂົ້າເຖິງນໍ້າສະອາດ ເເລະສິ່ງອຳນວຍຄວາມສະດວກດ້ານສຸຂະອະນາໄມ.

ໃນໂອກາດວັນລ້າງມືສາກົນ 2023, ທ່ານ ກອງຄຳ ມີບຸນ ຜູ້ອໍານວຍການນໍ້າສະອາດ, ໄດ້ແບ່ງປັນກ່ຽວກັບການປ່ຽນແປງໃນວຽກງານດ້ານນໍ້າສະອາດ, ສຸຂາພິບານ ແລະສຸຂະອະນາໄມໃນ ສປປ ລາວ ໃນທົດສະວັດທີ່ຜ່ານມາໂດຍຊີ້ໃຫ້ເຫັນ ໃນປີ 1975, ຄາດວ່າມີພຽງ 292.000 ຄົນ ໃນ 1000 ບ້ານ ທີ່ມີນໍ້າສະອາດໃຊ້ ແລະຫລາຍໆໂຮງຮຽນກໍບໍ່ມີສິ່ງອໍານວຍຄວາມສະດວກດ້ານສຸຂາພິບານທີ່ເໝາະສົມ. ພະຍາດທີ່ມັກເກີດຂຶ້ນ ເຊັ່ນ: ໄຂ້ທໍລະພິດ, ທ້ອງບິດ, ຖອກທ້ອງ ແລະ ແມ່ທ້ອງ ກໍແຜ່ຫລາຍໃນໄລຍະນັ້ນຈົນກາຍເປັນສາເຫດຂອງການເສຍຊີວິດອັນດັບຕົ້ນໆໃນປະເທດ. ແຕ່ມາຮອດມື້ນີ້, ຫລາຍກວ່າ 5 ລ້ານຄົນ ໃນ ສປປ ລາວ ສາມາດເຂົ້າເຖິງນໍ້າທີ່ສະອາດ ເເລະປອດໄພໄດ້ເເລ້ວເຊິ່ງຈະຊ່ວຍສ້າງອະນາຄົດທີ່ດີຂຶ້ນໃຫ້ກັບເດັກນ້ອຍຫລາຍໆຄົນ ແລະຄອບຄົວ.

ອົງການອຸຍນີເຊັບ ແລະລັດຖະບານ ແຫ່ງ ສປປ ລາວ ໄດ້ຮ່ວມມືກັນເພື່ອເຮັດວຽກແກ້ໄຂບັນຫາດ້ານນໍ້າສະອາດ, ສຸຂາພິບານ ແລະສຸຂະອະນາໄມ ໃນທົ່ວປະເທດຢ່າງບໍ່ຮູ້ອິດເມື່ອຍມາເປັນເວລາ 5 ທົດສະວັດ ໂດຍນັບຕັ້ງແຕ່ປີ 1973 ເປັນຕົ້ນມາ,ອົງການອຸຍນີເຊັບໄດ້ຮ່ວມມືກັບພາກສ່ວນທີ່ກ່ຽວຂ້ອງໃນລະດັບທ້ອງຖິ່ນເພື່ອສະໜອງນໍ້າສະອາດ ແລະສິ່ງອໍານວຍຄວາມສະດວກດ້ານສຸຂາພິບານໃຫ້ແກ່ບ້ານ, ໂຮງຮຽນ ແລະໂຮງໝໍຕ່າງໆໃນສປປລາວ. ນອກນັ້ນ, ຍັງໄດ້ສະໜັບສະໜູນການສ້າງທັກສະຄວາມສາມາດ ແລະໃຫ້ການຝຶກອົບຮົມ ແກ່ພະນັກງານສາທາລະນະສຸກພ້ອມຍັງລິເລີ່ມການໂຄສະນາເຜີຍແຜ່ແຄມເປນເພື່ອປູກຈິດສຳນຶກຂອງຊຸມຊົນກ່ຽວກັບວິທີຮັກສາສຸຂະອະນາໄມ ເຊັ່ນ: ການລ້າງມືເຊິ່ງເປັນວິທີທີ່ທັງງ່າຍ ແລະມີປະສິດທິພາບສູງໃນການຊ່ວຍຮັກສາຊີວິດ.

ທ່ານ ດຣ. ນາງ ເພຍເຣເບນ ໂລບຣິໂຕ ຜູ້ຕາງໜ້າອົງການອຸຍນີເຊັບ ປະຈຳສປປ ລາວ ໄດ້ຖືໂອກາດຄົບຮອບ 50 ປີຂອງການຮ່ວມມືລະຫວ່າງ ລັດຖະບານແຫ່ງສປປ ລາວ ແລະ ອົງການອຸຍນີເຊັບເພື່ອເນັ້ນໜັກເຖິງບົດບາດອັນສຳຄັນ ຂອງການລ້າງມື “ການລ້າງມືດ້ວຍສະບູ ບໍ່ແມ່ນແຕ່ພຽງວິທີຮັກສາສຸຂະອະນາໄມແບບງ່າຍໆເທົ່ານັ້ນ, ມັນຍັງເປັນມາດຕະການໜຶ່ງ ທີ່ມີປະສິດທິພາບສູງໃນການປ້ອງກັນພວກເຮົາຈາກພະຍາດຕ່າງໆ. ການລ້າງມືສາມາດຫລຸດຜ່ອນຄວາມສ່ຽງ ຕໍ່ພະຍາດຖອກທ້ອງໄດ້ເຖິງ 30%ແລະ ພະຍາດຕິດເຊື້ອ ທາງເດີນຫາຍໃຈໄດ້ເຖິງ 20%. ໃນ 50 ປີຂອງການຮ່ວມມືລະຫວ່າງລັດຖະບານແຫ່ງສປປ ລາວ ແລະ ອົງການອຸຍນີເຊັບ, ພວກເຮົາໄດ້ເຫັນເຖິງຜົນສຳເລັດຕ່າງໆ ໃນການສະໜອງນໍ້າສະອາດ ແລະ ສົ່ງເສີມສຸຂະອະນາໄມທີ່ດີ ໃຫ້ແກ່ຊຸມຊົນທົ່ວປະເທດ. ມາຮອດປັດຈຸບັນ ເຖິງເວລາແລ້ວທີ່ພວກເຮົາຈະຕ້ອງເພີ່ມທະວີຄວາມພະຍາຍາມອີກ ເພື່ອຊ່ວຍສປປ ລາວ ຢຸດຕິບັນຫາການຖ່າຍຊະຊາຍໃຫ້ສຳເລັດພາຍໃນປີ 2025.
ເມື່ອບໍ່ດົນມານີ້, ແຂວງບໍລິຄຳໄຊ ໄດ້ກາຍເປັນແຂວງທຳອິດໃນສປປ ລາວ ທີ່ໄດ້ຢຸດຕິການຖ່າຍແບບຊະຊາຍ, ພາຍຫລັງຈາກນັ້ນບໍ່ດົນ, ນະຄອນຫລວງວຽງຈັນ ກໍໄດ້ຖືກແຕ່ງຕັ້ງເປັນນະຄອນຫລວງສຸຂະອະນາໄມທຳອິດຂອງອາຊຽນ.

แชร์