ໂຮງແຮມ ລາວເທວວຽງຈັນ ຮັບໃບຢັ້ງຢືນ ແລະເຄື່ອງໝາຍລະດັບ 4 ດາວ

ວັນທີ 10 ຕຸລາ 2023 ທີ່ນະຄອນຫລວງວຽງຈັນ ຈັດພິທີມອບ-ຮັບ ໃບຢັ້ງຢືນ ແລະເຄື່ອງໝາຍລະດັບ 4 ດາວ ໂຮງແຮມ ລາວເທວ ໂດຍໃຫ້ກຽດເຂົ້າຮ່ວມທ່ານ ນາງ ສວນສະຫັວນ ວິຍະເກດ, ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ມີຫົວຫນ້າພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໂອກາດດັ່ງກ່າວທ່ານ ສົມນຶກ ອິນທະວົງ ເຈົ້າຂອງ ໂຮງແຮມ ລາວເທວ ວຽງຈັນ ໃຫ້ຮູ້ວ່າ:
ໂຮງແຮມ ລາວເທວ ວຽງຈັນ ໄດ້ເລີ່ມເຄື່ອນໄຫວດຳເນີນທຸລະກິດຢ່າງເປັນທາງການໃນເດືອນມັງກອນ ປີ 2020 ພາຍໃຕ້ການຄວບຄຸມ, ບໍລິຫານ ແລະດຳເນີນງານໂດຍຜູ້ບໍລິຫານທີ່ມີຄວາມຊ່ຽວຊານສະເພາະກິດທາງການບໍລິການໂຮງໂຮມ ແລະຮ້ານອາຫານເຊີ່ງໂຮງແຮມ ລາວເທວ ວຽງຈັນ ແມ່ນໄດ້ຮັບການສ້າງຕັ້ງຕາມໃບທະບຽນວິ ສາຫະກິດ ສະບັບເລກທີ: 0297/ຈທວ, ລົງວັນທີ 19 ກຸມພາ ປີ 2019, ໃບອະນຸຍາດດຳເນີນທຸລະກິດໂຮງແຮມ ລາວເທວ ວຽງຈັນ ສະບັບເລກທີ 012/ ຖວທ.ນວ, ລົງວັນທີ 18.

ໂຮງແຮມ ລາວເທວ ວຽງຈັນ (Laotel Hotel Vientiane) ແມ່ນຕັ້ງຢູ່ໃຈກາງນະຄອນຫລວງວຽງຈັນ, ຖະໜົນສາມແສນໄທ ທີ່ຂື້ນກັບບ້ານຂຸນຕາທົ່ງ ເມືອງສີໂຄດຕະບອງ ນະຄອນຫລວງວຽງຈັນ, ຊຶ່ງເປັນຕຶກອາຄານ 4 ຊັ້ນທີ່ເປັນເອກະລັກທີ່ບໍ່ຄືໃຜພ້ອມການຕົກແຕ່ງແບບເອກະລັກຄວາມເປັນລາວ, ໄດ້ມາດຕະຖານສາກົນ, ມີຫ້ອງນອນແຂກຈໍານວນ 168 ຫ້ອງທີ່ສວຍງາມ, ມີສິ່ງອຳນວຍຄວາມສະດວກຄົບຖ້ວນທັນສະໄໝຕາມມາດຖານສາກົນ ( 4 ດາວ ).

ການໄດ້ຮັບໃບຢັ້ງຢືນ ແລະເຄື່ອງໝາຍລະດັບ 4 ດາວ ໂຮງແຮມ ລາວເທວ ວຽງຈັນ ໃນມື້ນີ້ຈະເປັນນິມິດໝາຍທີ່ດີ ແລະເປັນຄວາມພາກພູມໃຈຂອງພວກເຮົາເປັນຢ່າງຍິ່ງທີ່ພັກ-ລັດຖະບານກໍ່ຄື ກະຊວງຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວເຫັນໄດ້ເຖິງສັກກາຍະພາບ, ຄວາມເປັນມາດຕະຖານສາກົນດ້ານຫ້ອງພັກ,ລະບົບການໃຫ້ບໍລິການ ແລະສິ່ງອຳນວຍຄວາມສະດວກຮອບດ້ານຂອງໂຮງແຮມພວກເຮົາຊຶ່ງມີຄວາມສອດຄ່ອງກັບມາດຕະຖານເຄື່ອງໝາຍລະດັບ 4 ດາວ ທີ່ໄດ້ຮັບໃນມື້ນີ້.

ໂຮງແຮມ ລາວເທວ ວຽງຈັນ ຈະສຶບຕໍ່ປັບປຸງຄຸນນະພາບ ແລະຮັກສາຄວາມເປັນມາດຕະຖານສາກົນຂອງໂຮງແຮມໃນການໃຫ້ບໍລິການແກ່ລູກຄ້າ ແລະໃຫ້ຄວາມສໍາຄັນທີ່ສຸດໃນການຮັກສາພາບລັກຂອງຂະແໜງໂຮງແຮມຢູ່ ສປປ ລາວ ກໍ່ຄືປະກອບສ່ວນເຂົ້າໃນການພັດທະນາອຸດສາຫະກຳການທ່ອງທ່ຽວຂອງ ສປປ ລາວ ຍິ່ງໆ ຂື້ນໄປ.

แชร์