ບໍ່ແກ້ວ ຈູດທໍາລາຍຢາບ້າ 53 ລ້ານກວ່າເມັດ

ແຂວງບໍ່ແກ້ວ ໄດ້ຈັດພິທີຈູກທໍາລາຍຢາເສບຕິດຫຼາຍລາຍການໃນນີ້, ຢາບ້າ 53.119.490 ເມັດ, ຢາບ້າມຸ່ນ 1 ຂວດ, ເຮໂລອິນ 3 ແທ່ງ, ຢາໄອສ໌ 3.281 ຫໍ່, ຢາອີ 217 ເມັດ, ເຄຕາມິນ 600 ຫໍ່, ຄາເຟອີນ 125 ຖົງນ້ອຍ, ໂຄເຄນ 03 ຖົງ, ກາເຟ 82 ຖົງ, ກັນຊາແຫ້ງ 01 ກັບ, ແປ້ງຝຸ່ນສີຂາວ 492 ເປົ່າ ແລະ ແປ້ງຝຸ່ນສີແດງ 1 ຖົງ.

ພິທີຈູດທໍາລາຍຢາເສບຕິດໄດ້ຈັດຂຶ້ນໃນວັນທີ 12 ຕຸລາ 2023 ນີ້ ທີ່ເດີ່ນສະໜາມບິນ ເມືອງຫ້ວຍຊາຍ ເນື່ອງໃນໂອກາດວັນແຫ່ງຊາດຕ້ານຢາເສບຕິດຄົບຮອບ 22 ປີ (12 ຕຸລາ 2001-12 ຕຸລາ 2023) ໃຫ້ກຽດເຂົ້າຮ່ວມຂອງທ່ານ ປອ ບົວຄົງ ນາມມະວົງ ເຈົ້າແຂວງໆບໍ່ແກ້ວ.

ພັອ ຈັນພອນເພັດ ຄໍາສີ ຫົວໜ້າກອງບັນຊາການ ປກສ ແຂວງ ຄະນະກຳມະການກວດກາ ແລະຄວບຄຸມ ຢາເສບຕິດຂັ້ນແຂວງໄດ້ມີຄໍາເຫັນວ່າ: ບັນຫາຢາເສບຕິດປະເພດຕ່າງໆ ໄດ້ກາຍເປັນໄພພິບັດລວມຂອງມວນມະນຸດເຊິ່ງສົ່ງຜົນສະທ້ອນໂດຍກົງຕໍ່ເສດຖະກິດ-ສັງຄົມ ຢາເສບຕິດບໍ່ພຽງແຕ່ເປັນຕົ້ນເຫດຂອງອາຊະຍາກຳໃນຄອບຄົວ ແລະສັງຄົມເທົ່ານັ້ນແຕ່ຍັງເປັນສາເຫດໜຶ່ງທີ່ພາໃຫ້ເກີດຄວາມທຸກຈົນ, ຄວາມຫາຍະນະຮ້າຍແຮງຍິງໄປກວ່ານັ້ນມັນຍັງສົ່ງຜົນສະທ້ອນຕໍ່ຄວາມໝັ້ນຄົງຂອງລະບອບການເມືອງ ແລະທຳລາຍຊາວໜຸ່ມເຍົາວະຊົນ, ອານຸຊົນທີ່ເປັນໜໍ່ແໜງຂອງຊາດ.

ໄລຍະ 1 ປີຜ່ານມາ ຄະນະພັກ-ຄະນະບັນຊາກອງບັນຊາການ ປກສ ແຂວງບໍ່ແກ້ວ ສາມາດມ້າງຄະດີຢາເສບຕິດໄດ້ທັງໝົດ 324 ເລື່ອງ, ມີຜູ້ຖືກຫາ 405 ຄົນ, ຍິງ 49 ຄົນ, ເຄື່ອງຂອງກາງທີ່ຍືດມາໄດ້ ມີຄື: ຢາບ້າ 53.119.490 ເມັດ, ຢາບ້າປຽກ 19 ກິໂລກຣາມ, ຢາໄອສ໌ 3.282 ກິໂລກຣາມ, ເຮໂລອິນ 1 ກິໂລກຣາມ, ເຄຕາມິນ 607 ກິໂລກຣາມ, ແປ້ງຝຸ່ນ 492 ເປົາ, ໂຄເຄນ 88,5 ກຣາມ, ຄາເຟອິນ 426,27 ກຣາມ, ຢາຝິ່ນ 6 ກິໂລກຣາມ, ຢາອີ 95,2 ກຼາມ, ກາເຟ 216 ກຼາມ, ຄັນຊາແຫ້ງ 1,67 ກຼາມ, ແປ້ງຝຸ່ນສີແດງ 1 ກິໂລກຼາມ, ຢາບ້າມຸ່ນ 14,2 ກຼາມ.

ຂ່າວ: ປກສ ແຂວງບໍ່ແກ້ວ

แชร์