ສຶກສາສຳຫຼວດຄວາມເປັນໄປໄດ້ພັດທະນາແຫຼ່ງທ່ອງທ່ຽວ ປ່າສະຫງວນແຫ່ງຊາດດົງຫົວສາວ​ ຢູ່ເມືອງປາກຊ່ອງ

ວັນທີ 10 ຕຸລາ 2023,​ ໄດ້ພິທີເຊັນບົດບັນທຶກຄວາມເຂົ້າໃຈວ່າດ້ວຍການສຶກສາສຳຫຼວດຄວາມເປັນໄປໄດ້ໃນການລົງທຶນພັດທະນາແຫຼ່ງທ່ອງທ່ຽວນໍ້າຕົກຕາດຄອນປາສ້ອຍແບບອະນຸລັກ ຢູ່ບ້ານຄອນ ເມືອງໂຂງ ແລະສຳຫຼວດເນື້ອທີ່ດິນ -​ ທົບທວນຂໍ້ມູນຕ່າງໆຂອງໂຄງການຄືນຕາມສັນຍາ ເລກທີ 652/ຫປຂ.ຈສ, ລົງວັນທີ 9 ພຶດສະພາ​ 2013 ກ່ຽວກັບການລົງທຶນຄຸ້ມຄອງ, ປົກປັກຮັກສາ ແລະ ການນຳໃຊ້ພື້ນທີ່ປ່າສະຫງວນແຫ່ງຊາດດົງຫົວສາວ ເປັນແຫຼ່ງທ່ອງທ່ຽວທຳມະຊາດ ຢູ່ບໍລິເວນຕາດຂະມຶດ, ຕາດເສຶອ, ຕາດຕາເກັດ ແລະ ດ່ານຫຼວງ ເມືອງປາກຊ່ອງ, ແຂວງຈໍາປາສັກ​ ລະຫວ່າງ​ ອົງການປົກຄອງແຂວງຈຳປາສັກ ຕາງໜ້າໂດຍພະແນກແຜນການ ແລະການລົງທຶນແຂວງ ກັບ ບໍລິສັດທ່ອງທ່ຽວ ຄຣີນແອັດແອນເຈີ້ ຈຳກັດຜູ້ດຽວ.​

ພິທີຈັດຂຶ້ນຢູ່ພະແນກແຜນການ​ ແລະ​ການລົງທຶນ​ແຂວງ​ໂດຍການໃຫ້ກຽດເຂົ້າຮ່ວມຂອງ​ ທ່ານ​ ປອ.​ວິໄລວົງ​ ບຸດດາຄໍາ​ ກໍາມະການ​ສູນກາງ​ພັກ​ເຈົ້າແຂວງຈໍາປາສັກ,​ ທ່ານ​ ປອ.​ສຸກສະຫວັນ​ ວິໄລວົງ​ ຫົວໜ້າ​ພະແນກແຜນການ​ ແລະ​ການລົງທຶນ​ແຂວງ,​ ທ່ານ​ ປອ.​ວັນນະໄຊ ຫົວໜ້າ​ພະແນກຖະແຫຼງຂ່າວ,​ ວັດທະນະທໍາ ແລະ​ ທ່ອງທ່ຽວ​ແຂວງ,​ ທ່ານ​ ນາງ​ ຄໍາພູ ລິດທິສັກ ເຈົ້າເມືອງໆໂຂງ,​ ທ່ານ​ ປອ.ສົມລິດ ວິລະວົງ​ ຫົວໜ້າ​ພະແນກກະສິກໍາ​ ແລະ​ ປ່າໄມ້ແຂວງ,​ ທ່ານ​ ຄໍາຂອດ ໝື່ນຫຼວງ ຮອງເຈົ້າເມືອງໆປາກຊ່ອງ,​ ທ່ານ​ ອິນທີ​ ເດືອນສະຫວັນ ຜູ້ອໍານວຍການບໍລິສັດທ່ອງທ່ຽວ ຄຣີນແອັດແອນເຈີ້ ຈຳກັດຜູ້ດຽວ.​ ມີການນໍາພະແນກການກົມກອງທີ່ກ່ຽວຂ້ອງອ້ອມຂ້າງແຂວງ,​ ການນໍາ​ຫ້ອງວ່າການແຂວງ,​ ຂະແໜງ​ການ​ ແລະ​ພະນັກງານ​ວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.​

ພະແນກແຜນການ​ ແລະ​ການລົງທຶນ​ແຂວງ​ລົງນາມໂດຍ ທ່ານ​ ປອ.​ສຸກສະຫວັນ​ ວິໄລວົງ ຫົວໜ້າ​ພະແນກ​ແຜນການ​ ແລະ​ການລົງທຶນ​ແຂວງ.​ ບໍລິສັດທ່ອງທ່ຽວຄຣີນແອັດເວັນເຈີ້ ຈໍາກັດ​ຜູ້ດຽວ ລົງນາມໂດຍ​ ທ່ານ​ ອິນທີ​ ເດືອນສະຫວັນ ຜູ້ອໍານວຍການບໍລິສັດ.​ ຝ່າຍອົງການປົກຄອງແຂວງ ລົງນາມເປັນພະຍານ ມີທ່ານ​ ປອ.​ວັນນະໄຊ ຫົວໜ້າ​ພະແນກຖະແຫຼງຂ່າວ,​ ວັດທະນະທໍາ ແລະ​ ທ່ອງທ່ຽວ​ແຂວງ,​ ທ່ານ​ ນາງ​ ຄໍາພູ ລິດທິສັກ ເຈົ້າເມືອງໆໂຂງ,​ ທ່ານ​ ປອ.ສົມລິດ ວິລະວົງ​ ຫົວໜ້າ​ພະແນກກະສິກໍາ​ ແລະ​ ປ່າໄມ້ແຂວງ,​ ທ່ານ​ ຄໍາຂອດ ໝື່ນຫຼວງ ຮອງເຈົ້າເມືອງໆປາກຊ່ອງ.​ ຝ່າຍບໍສັດທ່ອງທ່ຽວຄຣີນແອັດເວັນເຈີ້ ຈໍາກັດຜູ້ດຽວ​ ລົງນາມເປັນພະຍານມີ​ ທ່ານ ບຸນມະນີ ກຸນລະວົງ​ ຜູ້ບໍລິຫານ​ ບໍລິສັດ​ທ່ອງທ່ຽວ​ ຄຣີນແອັດເວັນເຈີ້ ຈໍາກັດ​ຜູ້ດຽວ​ ສາຂາແຂວງຈໍາປາສັກ.​

ການເຊັນບົດບັນທຶກຄວາມເຂົ້າໃຈ​​ຄັ້ງນີ້​ແມ່ນປະຕິບັດຕາມ​ຂໍ້ຕົກລົງຂອງ​ເຈົ້າແຂວງຈຳປາສັກ ເລກທີ 1176/ຈຂ.ຈສ, ລົງ​ວັນທີ​ 6 ຕຸລາ​ 2023​ ວ່າດ້ວຍການມອບສິດໃຫ້ພະແນກແຜນການ ແລະການລົງທຶນແຂວງ ຕາງໜ້າອົງການປົກຄອງແຂວງ ເຊັນບົດບັນທຶກຄວາມເຂົ້າໃຈ ເພື່ອສຶກສາສຳຫຼວດຄວາມເປັນໄປໄດ້ໃນການລົງທຶນພັດທະນາແຫຼ່ງທ່ອງທ່ຽວນໍ້າຕົກຕາດ​ຄອນປາສ້ອຍແບບອະນຸລັກ ໃນເນື້ອທີ່ 71.657 ຕາແມັດ ຢູ່ບ້ານຄອນ ເມືອງໂຂງ, ແຂວງຈຳປາສັກ ກັບບໍລິສັດ ທ່ອງທ່ຽວ ຄຣີນແອັດເວັນເຈີ້ ຈຳກັດຜູ້ດຽວ​ ແລະ​ ຂໍ້ຕົກລົງເລກທີ​ 1195/ຈຂ.ຈສ, ລົງວັນທີ 10 ຕຸລາ 2023​ ວ່າດ້ວຍການມອບສິດໃຫ້ພະແນກແຜນການ ແລະການລົງທຶນແຂວງ ຕາງໜ້າອົງການປົກຄອງແຂວງ ເຊັນບົດບັນທຶກຄວາມເຂົ້າໃຈ ເພື່ອສຳຫຼວດເນື້ອທີ່ດິນ ແລະທົບທວນຂໍ້ມູນຕ່າງໆຂອງໂຄງການຄືນຕາມສັນຍາ ເລກທີ 652/ຫປຂ.​ຈສ, ລົງວັນທີ 9 ພຶດສະພາ​ 2013 ກ່ຽວກັບການລົງທຶນຄຸ້ມຄອງ, ປົກປັກຮັກສາ​ ແລະການນຳໃຊ້ພື້ນທີ່ປ່າສະຫງວນແຫ່ງຊາດດັ່ງຫົວສາວເປັນແຫລ່ງທ່ອງທ່ຽວທຳມະຊາດ​ ກັບ​ ບໍລິສັດ ທ່ອງທ່ຽວ ຄຣິນແອັດເວັນເຈີ້ ຈໍາກັດຜູ້ດຽວ​ ແລະ​ເລີ່ມຈັດຕັ້ງປະຕິບັດໂຄງການນັບແຕ່ມື້ເຊັນບົດບັນທຶກຄວາມເຂົ້າໃຈ​ເປັນຕົ້ນໄປ.

• 11/10/2023