ຕະຫຼາດທຶນລາວ ສະຫຼອງຄົບຮອບ 13 ປີ

ສໍານັກງານຄະນະກໍາມະການຄຸ້ມຄອງຫຼັກຊັບ (ສຄຄຊ) ຮ່ວມກັບຕະຫຼາດຫຼັກຊັບລາວ (ຕລຊລ), ບໍລິສັດຫຼັກຊັບ, ບໍລິສັດຈົດທະບຽນ ແລະສະຖາບັນສື່ກາງດ້ານຫຼັກຊັບ ໄດ້ຮ່ວມກັນຈັດພິທີໂຮມຊຸມນຸມເຜີຍແຜ່ຜົນງານຂອງຕະຫຼາດທຶນລາວ ພາຍໃຕ້ຫົວຂໍ້:“ຕະຫຼາດທຶນລາວ ມຸ່ງໜ້າສູ່ການພັດທະນາ” ຂຶ້ນທີ່ ສຄຄຊ ໃນວັນທີ 10 ຕຸລານີ້ ເພື່ອສະເຫຼີມສະຫຼອງວັນສ້າງຕັ້ງຕະຫຼາດທຶນລາວ ຄົບຮອບ 13 ປີ (10/10/2010-10/10/2023) ແລະ ສະຫຼຸບຜົນງານພົ້ນເດັ່ນ ແລະ ທິດທາງໃນການພັດທະນາຕະຫຼາດທຶນລາວໃນຕໍ່ໜ້າ, ໂດຍໃຫ້ກຽດເຂົ້າຮ່ວມຂອງທ່ານ ນາງ ຂັນແກ້ວ ຫຼ້າມະນີເງົາ ຮອງຜູ້ວ່າການທະນາຄານແຫ່ງ ສປປ ລາວ.

ທ່ານ ນາງ ຟອງຈິນດາ ແສງສຸລິວົງ ຫົວຫນ້າ ສຄຄຊ ໄດ້ລາຍງານວ່າ: ຕະຫຼາດທຶນລາວ ຫຼືຕະຫຼາດຫຼັກຊັບລາວ (ຕລຊລ) ຖືກສ້າງຕັ້ງຂຶ້ນໃນວັນທີ 10 ຕຸລາ 2010 ຊຶ່ງເປັນໜຶ່ງຊ່ອງທາງໃນການລະດົມທຶນໃຫ້ແກ່ຫົວໜ່ວຍວິສາຫະກິດເພື່ອນຳໃຊ້ເຂົ້າໃນການດຳເນີນງານ-ຂະຫຍາຍທຸລະກິດຂອງຕົນ ແລະປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ. ໂດຍການເຄື່ອນໄຫວວຽກງານຕະຫຼາດທຶນລາວໃນປີ 2023 ນີ້ ໄດ້ສຳເລັດຫຼາຍດ້ານ ໃນນີ້ ໄດ້ສຳເລັດການສ້າງ ແລະປັບປຸງນິຕິກຳໃຕ້ກົດໝາຍວ່າດ້ວຍຫຼັກຊັບ 3 ສະບັບ;ສຳເລັດການຄົ້ນຄວ້າອະນຸຍາດໃຫ້ບໍລິສັດຜະລິດ-ໄຟຟ້າລາວ ມະຫາຊົນ ອອກຈຳໜ່າຍຮຸ້ນກູ້ຢູ່ປະເທດໄທ 3 ຄັ້ງ ແລະ ບໍລິສັດ ສຸວັນນີ ໂຮມເຊັນເຕີມະຫາຊົນ ອອກຈຳໜ່າຍຮຸ້ນກູ້ພາຍໃນປະເທດໃນວົງຈຳກັດ 1 ຄັ້ງ ຊຶ່ງສາມາດລະດົມທຶນໄດ້ທຽບເທົ່າ 1.929,25 ຕື້ກີບ ແລະໄດ້ຄົ້ນຄວ້າການອອກຈໍາໜ່າຍຮຸ້ນຂອງອົງການການເງິນສາກົນ (IFC) ເປັນສະກຸນເງິນກີບ ຢູ່ ສປປ ລາວ;ສຳເລັດການຄົ້ນຄວ້າຮັກສາສະຖານະເປັນບໍລິສັດຈົດທະບຽນ ຂອງບໍລິສັດຈົດທະບຽນ 2 ແຫ່ງ;ສຳເລັດການຖອນການຈົດທະບຽນຂອງບໍລິສັດ ລາວເວີນ ມະຫາຊົນ ອອກຈາກ ຕລຊລ. ປະຈຸບັນຍອດການລະດົມທຶນຜ່ານຕະຫຼາດທຶນລາວ (ຜ່ານການອອກຈໍາໜ່າຍຮຸ້ນ, ຮຸ້ນກູ້ ແລະພັນທະບັດ ມີມູນຄ່າທັງໝົດຈໍານວນ 38.123,32 ຕື້ກີບ ກວມເອົາ 17,95% ຂອງ GDP ປີ 2022 ແລະມີບໍລິສັດຈົດທະບຽນໃນ ຕລຊລ ທັງໝົດ 10ແຫ່ງ.

ໃນພິທີດັ່ງກ່າວຜູ້ເຂົ້າຮ່ວມຍັງໄດ້ຮັບຟັງການນໍາສະເໜີທິດທາງການພັດທະນາຕະຫຼາດທຶນລາວ, ແຜນພັດທະນາຕະຫຼາດຫຼັກຊັບລາວ ແລະແຜນການພັດທະນາວຽກງານຂອງສະມາຄົມຕະຫຼາດທຶນລາວ. ນອກຈາກນີ້, ບັນດາບໍລິສັດທີ່ມີສ່ວນຮ່ວມໃນຕະຫຼາດທຶນລາວກໍ່ໄດ້ມີການຈັດກິດຈະກໍາວາງສະແດງຜົນງານ ແລະຜະລິດຕະພັນຂອງຕົນນໍາອີກ.

แชร์