ເຕືອນຜູ້ບໍລິໂພກ! ກວດດີໆກ່ອນຊື້ສິນຄ້າ ກວດພົບສິນຄ້າໝົດອາຍຸຈຳນວນຫຼາຍ ທີ່ຕະຫຼາດເທດສະບານ ແຂວງອຸດົມໄຊ

ໃນວັນທີ 4 ຕຸລາ 2023 ທີ່ຜ່ານມານີ້, ເຈົ້າໜ້າທີ່ກວດກາການຄ້າພະແນກອຸດສະຫະກຳ ແລະການຄ້າສົມທົບກັບຄະນະສະເພາະກິດ ແລະ ພະນັກງານຄຸ້ມຄອງຕະຫຼາດໜອງແມງດາ ແລະຕະຫຼາດວັງໄຮ ລົງຕິດຕາມ, ກວດກາສິນຄ້າປະເພດອາຫານແຊ່ແຂງ, ສິນຄ້າໝົດອາຍຸ ແລະ ສິນຄ້າບໍ່ຕິດສະຫຼາກເປັນພາສາລາວ ຢູ່ ຕະຫຼາດເທດສະບານ ແຂວງອຸດົມໄຊ ເຊິ່ງນຳໂດຍທ່ານ ພິໄລທອງ ຈິດມະນີ ຮອງຫົວໜ້າພະແນກ ອຸດສາຫະກຳ ແລະການຄ້າ ແຂວງອຸດົມໄຊ.

ຜົນການລົງກວດສາມາດກວດພົບອາຫານປະເພດຕ່າງໆ ທີ່ໝົດອາຍຸການບໍລິໂພກຫຼາຍລາຍການ ຄື: ຮ໋ອດດ໊ອກ 25 ຖົງ, ແຈ່ວສຸກກີ້ 4 ຕຸກ, ກຸ້ງທະເລ 25 ຖົງ, ປາເມິກດອງ 1 ກັບ, ສະລະເປົາກ້ອນໃຫຍ່ ສຳເລັດຮູບ 10 ຖົງ, ມັນຝຼັ່ງ ສຳເລັດຮູບ 4 ຖົງ, ປູອັດ 3 ຖົງ, ຊີ້ນໝູສະໄລ 20 ຖົງ, ຊີ້ນສົ້ມໝູ 17 ຖົງ, ນໍ້າປາແດກ ສຳເລັດຮູບ 30 ຕຸກ, ນໍ້າແຈ່ວໄກ່ 53 ຕຸກ, ປາເມິກໄຂ່ 3 ກັບ, ປີກໄກ່ 12 ກິໂລ, ແຈ່ວເສສວນ 25 ຖົງ, ແຈ່ວວາສະບິ 20 ກັບ ລວມມູນຄ່າ 12 ລ້ານ. 600,000 ແສນກີບ.

ຊຶ່ງອາຫານສ່ວນຫຼາຍແມ່ນບໍ່ມີສະຫຼາກກຳນົດສິນຄ້າ ຫຼືສະຕິກເກີ້ເປັນພາສາລາວ ແລະບໍ່ຮູ້ແຫຼ່ງນໍາເຂົ້າ ແລະໝົດກຳນົດການບໍລິໂພກຕໍ່ກັບສະພາບການດັງກ່າວທາງເຈົ້າໜ້າທີ່ໄດ້ສ້າງບົດບັນທຶກກ່າວເຕືອນ, ຖ້າຫາກຍັງມີການລະເມີດຄັ້ງຕໍ່ໄປແມ່ນຈະໄດ້ປະຕິບັດຕາມລະບຽບກົດໝາຍ.

ຕໍ່ບັນຫາດັ່ງກ່າວທ່ານຮອງຫົວໜ້າພະແນກ ອຸດສາຫະກຳ ແລະການຄ້າແຂວງອຸດົມໄຊໄດ້ແນະນຳຜູ້ປະກອບການທີ່ນຳເຂົ້າສິນຄ້າຈາກຕ່າງປະເທດມາຈໍາໜ່າຍໃຫ້ເປັນເຈົ້າການນຳກັນໃນການກວດກາຄຸນນະພາບສິນຄ້າ ໂດຍສະເພາະ ແມ່ນກວດກາອາຍຸການບໍລິໂພກຕ່າງໆຢ່າງລະອຽດຖ້າຫາກພົບເຫັນສິນຄ້າທີ່ໝົດອາຍຸ ຫຼືບໍ່ມີສະຫຼາກກຳນົດສິນຄ້າ ແມ່ນບໍ່ຄວນນຳມາຈຳໜ່າຍໃຫ້ແກ່ລູກຄ້າ; ສ່ວນຜູ້ບໍລິໂພກເວລາຊື້ກໍຕ້ອງກວດເບິ່ງອາຍຸການບໍລິໂພກຖ້າໃກ້ໝົດອາຍຸ ຫຼືໝົດອາຍຸແລ້ວແມ່ນບໍ່ຄວນນຳມາບໍລິໂພກເຊິ່ງອາດຈະເຮັດໃຫ້ອາຫານເປັນພິດຕໍ່ຕົນເອງແລ້ວຈະເກີດຜົນເສຍຫຼາຍຢ່າງຕາມມາ.

แชร์