ຫົວພັນ ລົງວິໄນສະມາຊິກພັກ 55 ສະຫາຍ ຖານລະເມີດກົດລະບຽບ ແລະມົ້ວສຸມຢາເສບຕິດ

ໃນວັນທີ 5 ຕຸລາ 2023 ນີ້, ທີ່ຫ້ອງວ່າການປົກຄອງແຂວງຫົວພັນ, ທ່ານ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງໄດ້ພົບປະໂອ້ລົມພະນັກງານຫຼັກແຫຼ່ງທີ່ເຮັດວຽກງານກວດກາພາຍໃນແຂວງຫົວພັນ.

ໃນການພົບປະຄັ້ງນີ້, ທ່ານ ຮິນທອງ ດວງຈັນສຸກ ປະທານຄະນະກວດກາພັກ-ອົງການກວດກາລັດແຂວງຫົວພັນ, ໄດ້ລາຍງານສະພາບການເຄື່ອນໄຫວວຽກງານກວດກາໃນໄລຍະເຄິ່ງສະໄໝທີ່ຜ່ານມາວ່າ: ທົ່ວແຂວງຫົວພັນມີໜ່ວຍພັກທັງໝົດ 1.149 ໜ່ວຍພັກ ທຽບໃສ່ປີ 2021 ເພີ່ມຂຶ້ນ 1 ໜ່ວຍພັກ, ໄດ້ຕີລາຄາຈັດແບ່ງປະເພດເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນມີ 845 ໜ່ວຍພັກ, ກາງ 5 ໜ່ວຍພັກ, ບໍ່ໄດ້ປະເມີນມີ 299 ໜ່ວຍພັກ; ມີສະມາຊິກພັກທັງໝົດ 20.667 ສະຫາຍ, ຍິງ 4.977 ສະຫາຍ ທຽບໃສ່ປີ 2021 ເພີ່ມຂຶ້ນ 906 ສະຫາຍ, ຍິງ 681 ສະຫາຍ; ສະມາຊິກພັກໄດ້ປະເມີນກາງສະໄໝ 15.828 ສະຫາຍ, ຍິງ 3.972 ສະຫາຍ, ມີສະມາຊິກພັກແຂງ ຈໍານວນ 15.204 ສະຫາຍ, ຍິງ 3.759 ສະຫາຍ, ສະມາຊິກພັກກາງມີ 624 ສະຫາຍ, ບໍ່ໄດ້ປະເມີນ 4.839 ສະຫາຍ; ມີສະມາຊິກພັກຖືກປະຕິບັດວິໄນທັງໝົດ 55 ສະຫາຍ, ຍິງ 13 ສະຫາຍ, ໃນນີ້ຕິຕຽນ 19 ສະຫາຍ, ຍິງ 8 ສະຫາຍ, ກ່າວເຕືອນ 5 ສະຫາຍ,ຍິງ 2 ສະຫາຍ, ໂຈະການຮ່ວມຊິວິດພັກ 13 ສະຫາຍ, ຍິງ 3 ສະຫາຍ, ປົດຕໍາແໜ່ງ 2 ສະຫາຍ, ໄລ່ອອກຈາກພັກ 16 ສະຫາຍ ເຫດຜົນຂອງການປະຕິບັດວິໄນແມ່ນຍ້ອນຂາດສະຕິຕໍ່ການຈັດຕັ້ງ, ລະເມີດກົດລະບຽບພັກ, ກົດໝາຍຂອງລັດ, ມົ້ວສຸມຢາເສບຕິດ ແລະອື່ນໆ.

ນອກນີ້ຍັງໄດ້ກວດກາສຳເລັດໂຄງການລົງທຶນຂອງລັດເລີ່ມແຕ່ຫົວທີ 3 ໂຄງການລວມມູນຄ່າ 207 ຕື້ກ່ວາກີບ ແລະໄດ້ດໍາເນີນການກວດກາຕາມຂໍ້ຕົກລົງທັງໝົດມີ 5 ເປົ້າໝາຍຄື: ຫ້ອງວ່າການແຂວງ, ພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງ, ພະແນກແຮງງານ ແລະສະຫວັດດີການສັງຄົມແຂວງ, ລັດວິສາຫະກິດຫົວພັນການຄ້າ, ພະແນກອຸດສາຫະກຳ-ການຄ້າແຂວງ ແລະການຄ້າເມືອງຊຶ່ງກວດພົບທັງໝົດ 11 ຕື້ກ່ວາກີບ, ເກັບກູ້ຄືນໄດ້ 2ຕື້ກ່ວາກີບ, ແຂວງອອກຂໍ້ຕົກລົງລົບລ້າງ 3 ຕື້ກ່ວາກີບ, ຍັງເກັບກູ້ບໍ່ໄດ້ 2 ຕື້ກ່ວາກີບ ຊຶ່ງຕິດພັນກັບພະນັກງານລັດຈຳນວນ 43 ຄົນ.

แชร์