ຈະລາຈອນ ນະຄອນໄກສອນ ພົມວິຫານ ທຳລາຍອຸປະກອນດັດແປງສະພາບເຕັກນິກລົດຈັກ

ພະແນກຕຳຫຼວດຈະລາຈອນ ກອງບັນຊາການ ປກສ ນະຄອນໄກສອນ ພົມວິຫານ ໄດ້ນຳເອົາອຸປະກອນດັດແປງລົດທີ່ບໍ່ຖືກຕ້ອງຕາມລະບຽບກົດໜາຍໄປທຳລາຍຖີ້ມໃນຕອນບ່າຍວັນທີ 9 ຕຸລາ 2023. ເພື່ອເປັນມາດຕະການໃນການແກ້ໄຂບັນດາກຸ່ມແກ້ງຂີ່ລົດກວນເມືອງ.

ທ່ານ ພັນຕີ ສີສະເກດ ທະວີສອນ ຮອງຫົວໜ້າກອງຮ້ອຍຕຳຫຼວດຈະລາຈອນ ປກສ ນະຄອນ ກ່າວວ່າ: ເຈົ້າໜ້າທີ່ຕຳຫຼວດຈະລາຈອນນະຄອນ ໄດ້ເອົາໃຈໃສ່ລົງແກ້ໄຂລົດດັດແປງສະພາບຢູ່ຕາມສາຍທາງ, ປ້ອມຍາມ, ເທດສະບານນະຄອນຢູ່ພາຍໃນແຂວງເຊີ່ງໄດ້ພົບເຫັນລົດຈັກດັດແປງຈຳນວນ 11 ຄັນ ແລະໄດ້ຢຶດລົດຈັກຈຳນວນດັ່ງກ່າວເຂົ້າມາກອງບັນຊາການເພື່ອໃຫ້ເຈົ້າຂອງລົດເຂົ້າມາພົວພັນເອົາ ແລະໃຫ້ປ່ຽນຖ່າຍອາໄຫຼ່ເດີມໃສ່ລົດຄືເກົ່າ, ຜ່ານການກັກລົດຈັກດັດແປງເຈົ້າໜ້າທີ່ໄດ້ແກະທໍ່ສູດລົດຈັກອອກ ມີ: ທໍ່ດັງເກີນກຳນົດຈຳນວນ 17ທໍ່, ປ້າຍທີບໍ່ຖືກຕ້ອງຕາມທະບຽນລົດ, ຢາງນ້ອຍ , ເບາະແປ ແລະຕາໄຟກະພິບ.

ໃນການສະກັດກັ້ນ ແລະແກ້ໄຂບັນຫາດັ່ງກ່າວນີ້ເຈົ້າໜ້າທີ່ຕຳຫຼວດຈະລາຈອນນະຄອນຈະໄດ້ສືບຕໍ່ລົງສະກັດກັ້ນ ແລະແກ້ໄຂລົດດັດແປງສະພາບເຕັກນິກລົດທີ່ບໍ່ຖືກຕ້ອງຕາມລະບຽບໂດຍກວດກາຢູ່ຕາມປ້ອມຍາມ, ຕາມສາຍທາງຢູ່ພາຍໃນເທດສະບານນະຄອນ ແລະເມື່ອພົບເຫັນລົດຈຳນວນດັ່ງກ່າວກໍ່ຈະນຳເອົາລົດເຂົ້າມາກັກໄວ້ຢູ່ກອງບັນຊາການ ປກສ ນະຄອນ ແລ້ວເຊີນເອົາເຈົ້າຂອງລົດເຂົ້າມາສຶກສາອົບຮົມກ່າວເຕືອນເພື່ອບໍ່ໃຫ້ບຸກຄົນເຫຼົ່ານັ້ນກັບຄືນໄປກະທຳຜິດອີກ ແລະຖ້າວ່າພົບເຫັນເປັນຄັ້ງທີ 2-3 ຈະໃຊ້ມາດຕະການເດັດຂາດຕໍ່ຜູ້ລະເມີດ.

ຂ່າວ​ແຂວງ​ສະຫວັນ​ນະເຂດ

แชร์