ຈັບຜູ້ກໍ່ເຫດຄາດຕະກຳ 2 ແມ່ລູກ ຢູ່ສວນ ເຮັດໃຫ້ເສຍຊີວິດຄາທີ່ 1 ຄົນ

ຈາກເຫດການ 2 ແມ່ລູກຖືກທຳຮ້າຍຮ່າງກາຍ ເຮັດໃຫ້ຜູ້ເປັນແມ່ເສຍຊີວິດ ແລະລູກໄດ້ຮັບບາດເຈັບສາຫັດຢູ່ທີ່ສວນກາເຟ ເຂດບ້ານໜອງເຂືອງໃຫຍ່ ເມືອງປາກຊ່ອງ​ ແຂວງຈໍາປາສັກ​ ໃນວັນທີ 24 ກັນຍາ 2023 ທີ່ຜ່ານມາ​. ຫຼັງຈາກເກີດເຫດ, ທາງເຈົ້າໜ້າທີ່ໄດ້ລົງເກັບກຳຂໍ້ມູນຕ່າງໆ ແລະກຳນົດເປົ້າໝາຍ. ຈົນຮອດວັນທີ 30 ກັນຍາ 2023 ຈຶ່ງສາມາດກັກຕົວຜູ້ກໍ່ເຫດຄາດຕະກຳໄດ້, ຊື່ທ້າວໄພທູນ ອາຍຸ 22 ປີ ອາຊີບ: ຊາວສວນ, ຢູ່ບ້ານໜອງເຂືອງໃຫຍ່ ເມືອງປາກຊ່ອງ ແຂວງຈຳປາສັກ ມາດຳເນີນຄະດີ.

ພັນໂທ ຄໍາໄມ ດວນມະນີ ຫົວໜ້າພະແນກຕໍາຫຼວດສືບສວນ​ - ສອບສວນ ປກສ ແຂວງຈຳປາສັກ​ ລາຍງານວ່າ: ຜ່ານການສືບສວນ​ - ສອບສວນຂອງເຈົ້າໜ້າທີ່ວິຊາສະເພາະທ້າວ ໄພທູນ ໄດ້ຮັບສາລະພາບວ່າ: ໃນປີ 2022 ຜູ້ກ່ຽວໄດ້ເຄື່ອນໄຫວ ເສບຢາເສບຕິດ (ຢາບ້າ) ຢາທີ່ໄດ້ມາເສບແມ່ນຊື້ນໍາໄວລຸ້ນທົ່ວໄປເຂດບ້ານໜອງເຂືອງໃຫຍ່ ເມືອງປາກຊ່ອງ ຊື້ຄັ້ງລະ 5 -​ 10 ເມັດ ໃນລາຄາເມັດລະ 10.000 ກີບ ແລ້ວເອົາມາເສບຢູ່ປ່າກາເຟໝົດ ແລະໃນເວລາທ້າວ ໄພທູນ ເສບຢາບ້າຫຼາຍແມ່ນມີອາການມຶນເມົາ, ໃນວັນທີ 24 ກັນຍາ 2023 ເວລາປະມານ 4 ໂມງ ທ້າວ ໄພທູນ ໄປຊື້ຢາບ້ານຳໄວ້ລຸ້ນບໍ່ຮູ້ຊື່ຢູ່ບ້ານຈັນສະຫວ່າງ ເມືອງປາກຊ່ອງ ຈຳນວນ 13 ເມັດ,​ ເມັດລະ 10.000 ກີບ ແລ້ວເອົາມາເສຍໝົດຈຳນວນ 10 ເມັດ ຢູ່ເຂດປ່າກາເຟ ບ້ານໜອງເຂືອງໃຫຍ່ ຮອດເວລາປະມານ 11 ໂມງ ຂອງວັນດຽວກັນທ້າວ ໄພທູນ ໄດ້ຍ່າງອອກໄປເບິ່ງສວນມັນຕົ້ນຂອງແມ່ເຖົ້າເຊິ່ງຫ່າງຈາກບ້ານປະມານ 6 ກິໂລແມັດ ເມື່ອໄປຮອດຜູ້ກ່ຽວເອົາຢາເສບຕິດທີ່ຍັງເຫຼືອຈຳນວນ 3 ເມັດ ອອກມາເສບ ໃນເວລາທີ່ທ້າວ ໄພທູນ ກໍາລັງເສບຢາເສບຕິດຢູ່ນັ້ນໄດ້ມີນາງ ໄຜ່ ແລະນາງ ລານິຕ້າ (ຜູ້ເສຍຊີວິດ ແລະຜູ້ບາດເຈັບ) ຢ່າງເລາະຫາຂຸດຈິຫຼໍ່ຢູ່ສວນຂ້າງກັນເມື່ອເຫັນແນວນັ້ນທ້າວ ໄພທູນ ຄິດວ່າ ນາງ ໄຜ່ ແລະນາງ ລານິຕ້າ ຈະໄປບອກເຈົ້າໜ້າທີ່ຕຳຫຼວດ.​ ຕໍ່ມາ​ຜູ້ກ່ຽວກໍ່ຂ້າມສວນໄປຫາ ນາງ ໄຜ່ ເມື່ອນາງ ໄຜ່ ເຫັນແນວນັ້ນຈິ່ງຍ່າງໜີ.​ ເວລານັ້ນ ທ້າວ ໄພທູນ ໄດ້ຍ່າງຕາມໄປແລ້ວຈັບແຂນຂອງ ນາງ ໄຜ່ ແລ້ວນາງ ໄຜ່ ຈິ່ງເອົາດ້າມສຽມທີ່ຖືມາຕີໃສ່ຫຼັງຂອງທ້າວ ໄພທູນ ຈຳນວນ 1 ບາດ,​ ທ້າວ ໄພທູນ ຈິ່ງໃຊ້ກຳປັ້ນຊັດໃສ່ໜ້າຂອງ ນາງ ໄຜ່ ຈຳນວນຫຼາຍບາດ ເຮັດໃຫ້​ ນາງ​ ໄຜ່ ລົ້ມລົງພື້ນດິນແລ້ວ ນາງ ໄຜ່ ໄດ້ເອົາຕີນທໍາທ້າວ ໄພທູນ ຈົນລົ້ມລົງ.​ ຈາກນັ້ນ ນາງ ໄຜ່ ລຸກຂຶ້ນໄດ້ແລ້ວຈູງແຂນ ຂອງ ນາງ ລານີຕ້າ ແລ່ນໜີ ທ້າວ ໄພທູນ ກໍ່ແລ່ນຕາມຫຼັງໄປໃຊ້ຕີນທໍາໃສ່ຫຼັງຂອງ ນາງ ໄຜ່ ລົ້ມລົງພື້ນດິນ,​ ເວລານັ້ນທ້າວ ໄພທູນ ສັງເກດເຫັນມີດຍາວປະມານ 30 ຊັງຕີແມັດ ຢູ່ໃນຖົງພາຍຂອງ ນາງ ໄຜ່ ແລ້ວທ້າວ ໄພທູນ ຈິ່ງຈັບເອົາມາຟັນໃສ່ຫົວຂອງ ນາງ ໄຜ່ ຈໍານວນຫຼາຍບາດ.​ ເວລານັ້ນ ນາງ ລານິຕ້າ ໃຊ້ດ້າມສຽມຕີໃສ່ ທ້າວ ໄພທູນ ຈໍານວນຫຼາຍບາດ,​ ທ້າວ ໄພທູນ ຈິ່ງໄດ້ເອົາມືດຟັນໃສ່ຫົວເບື້ອງຫຼັງຂອງ ນາງ ລານິຕ້າ ຈຳນວນ 2 ບາດ​ ເຮັດໃຫ້ນາງ ລານິຕ້າ ໝົດສະຕິໄປ ຈິ່ງກັບມາຟັນໃສ່ຫົວຂອງ ນາງ ໄຜ່ ຕື່ມອີກ​ຈຳນວນຫຼາຍບາດ ເຮັດໃຫ້ ນາງ ໄຜ່ ເສຍຊີວິດຄາທີ່.​
ຫຼັງຈາກກໍ່ເຫດແລ້ວ​ ທ້າວ​ ໄພທູນ​ ກໍ່ເອົາຕົວຫຼົບໜີໄປລີ້ຊ່ອນຢູ່ໃນປ່າກາເຟ, ຮອດວັນທີ 30 ກັນຍາ 2023 ທ້າວ ໄພທູນ ຈິ່ງຖືກກັກຕົວມາດຳເນີນຄະດີຕາມຂັ້ນຕອນຂອງກົດໝາຍ.

ຂ່າວ​-ພາບ: ນັກຂ່າວກອງບັນຊາການ ປກສ​ ແຂວງ​ຈໍາປາສັກ​

แชร์