ກຽມພົບຄວາມອາລັງການຫາດດອນຈັນໃນຊ້ວງປີໃໝ່

  ແຫຼງທ່ອງທ່ຽວຫາດຊາຍດອນຈັນໂດຍບໍລິສັດ ຊີເອັນພີ ຂາເຂົ້າ-ຂາອອກ ຈຳກັດ ຊຶ່ງເປັນໜຶ່ງບໍລິສັດເຫັນຄວາມສຳຄັນພັດທະນາແຫຼງທ່ອງທ່ຽວ ແລະອານຸລັກວັດທະນາທຳປີນີ້ໄດ້ເສີມຫຼາຍກິດຈະກຳເຂົ້າມາເຊັ່ນມີການຂີ່ສະລິງ, ສະລອຍນ້ຳ, ມີສວນຕູບບໍລິການ, ສວນດອກໄມ້, ຮູບປັ່ນໂຕສັດໃຫຍ່ອາລັງການໄວ້ຄອຍຖ້າຜູ້ຄົນໄປທ່ຽວຊົມໂດຍສະເພາະນັກທ່ອງທ່ຽວຈີນຊຶ່ງມາຮອດປະຈຸບັນການກໍ່ສ້າງແມ່ນສຳເລັດ 80% ແລະຈະເປີດບໍລິການໄວໆນີ້.

  ທ່ານ ນາງ ຈັນນະພາ ວົງສະມໍຣະພູມ ປະທານກຸ່ມບໍລິສັດຊີເອັນພີ (CNP) ຂາເຂົ້າ-ຂາອອກຈຳກັດໃຫ້ສຳພາດນັກຂ່າວໜັງສືພິມເສດຖະກິດ-ສັງຄົມຮູ້ວ່າ: ເພື່ອເປັນການຕ້ອນຮັບປີທ່ອງທ່ຽວລາວປີນີ້ບໍລິສັດຂອງຕົນເອງທີ່ໄດ້ຮັບສໍາປະທານຈາກອໍານາດການປົກຄອງນະຄອນຫຼວງວຽງຈັນມາໄດ້ຫຼາຍແລ້ວເພື່ອພັດ ທະນາທະນາໃຫ້ເຂດຫາດດອນຈັນເປັນບ່ອນສະຖານທີ່ທ່ອງທ່ຽວຮັບຮອງແຂກພາຍໃນ-ຕ່າງປະເທດ ແລະປະຊາຊົນລາວໃນໄລຍະບຸນປີໃໝ່ຂອງທຸກໆປີ.

  ສຳລັບປີນີ້ທາງບໍລິສັດໄດ້ລົງທຶນເພີ່ມກວ່າທຸກປີ 3 ຕື້ກີບ ເພື່ອຍົກລະດັບການພັດທະນາໃຫ້ເປັນໃນບ່ອນພັກຜ່ອນຕິດພັນກັບການອະນຸລັກສິ່ງແວດລ້ອມ ແລະ ຄວາມສະອາດໃນນັ້ນໄດ້ມີການສ້າງຕູບ 30 ຫຼັງ, ປັບປຸງເຮັດສ່ວນດອກໄມ້, ປູກຕົ້ນໄມ້, ສ້ອມແປງ ແລະ ຈະມີຂີ່ສະລິງ, ສະລອຍນ້ຳ ແລະ ຂະຫຍາຍເສັ້ນທາງຂຶ້ນ-ລົງຫາຫາດດອນຈັນໃຫ້ກວ້າງຂຶ້ນກວ່າເກົ່າເພື່ອຄວາມສະດວກສະບາຍ, ຈັດສັນບ່ອນຝາກລົດ, ສ້າງເປັນເຂດຫລິ້ນນໍ້າທີ່ມີຄວາມປອດໄພນອກ ຈາກນັ້ນພວກເຮົາໄດ້ຈັດກໍາລັງປ້ອງກັນເວນຍາມຕື່ມອີກເພື່ອເຮັດໃຫ້ມີຄວາມປອດໄພ, ຈັດສັນກະຕ່າຂີ້ເຫຍື້ອໄວ້ຢ່າງເປັນລະບົບສ່ວນເກັບຄ່າເຂົ້າໄປຫຼິ້ນພາ ຍໃນຫາດຈັນບ່ອນທີ່ຕົນເອງສໍາປະທານນັ້ນໄດ້ກໍານົດເກັບພຽງແຕ່ 10.000 ກີບຕໍ່ຄົນ ແລະພວກເຮົາຈະບໍ່ເກັບເອົານໍາເດັກນ້ອຍ ແລະຜູ້ອາວຸໂສຊຶ່ງເງິນທີ່ໄດ້ຈາກການເກັບຄັ້ງນີ້ເພື່ອບູລະນະສ້ອມແປງ ແລະໃຊ້ຈ່າຍການບໍລິຫານອື່ນໆທີ່ຈໍາເປັນ.

    ແນວໃດກໍດີທ່ານປະທານກຸ່ມບໍລິສັດຊີເອັນພີຍັງຢືນຢັນວ່າການເກັບເງິນ 10.000 ກີບ ນໍາຜູ້ເຂົ້າຊົມຈະບໍ່ເຫັນກໍາໄລເນື່ອງຈາກວ່າພວກເຮົາລົງທຶນຫຼາຍສົມຄວນຊຶ່ງຖືວ່າການລົງທຶນຄັ້ງນີ້ແມ່ນການປະກອບສ່ວນຊ່ວຍເຫຼືອສັງຄົມໃຫ້ມີບ່ອນໄດ້ຮ່ວມກັນຫຼິ້ນບຸນປີໃໝ່ລາວຢ່າງເບີກບານມ່ວນຊື່ນ ແລະ ຍັງເປັນການປຸກລະດົມບໍ່ໃຫ້ຄົນດື່ມສິ່ງມືນເມົາແລ້ວຫຼິ້ນຕາມແຄມທາງ ຫຼື ຂັບຂີ່ລົດ ແລະອື່ນໆ ເພື່ອຫຼີກເວັ້ນການເກີດອຸບັດຕິເຫດ.

  ສະນັ້ນໃນນາມປະທານກຸ່ມບໍລິສັດຊີເອັນພີຂໍເຊີນຊວນແຂກພາຍໃນ-ຕ່າງປະເທດ ແລະປະຊາຊົນລາວບັນດາເຜົ່າເຂົ້າຮ່ວມສະເຫຼີມສະຫຼອງບຸນປະເພນີປີໃໝ່ ລາວ ພສ 2562 ຢ່າງເບີກບານມ່ວນຊື່ນ ແລະສາມາດຮັກສາໄດ້ຮີດຄອງປະເພນີອັນດີງາມຂອງຊາດສະເພາະພາຍໃນເຂດຫາດດອນຈັນຈະມີກິດຈະກໍາແຂ່ງ ຂັນກີລາ, ຊົມຄອນເສີດສິລະປິ່ນຈາກພາຍໃນ-ຕ່າງປະເທດ, ຫຼິ້ນເກມຮັບໂຊກ ແລະອື່ນໆຊຶ່ງປີນີ້ພວກເຮົາຄາດເປີດເຂົ້າທ່ຽວຊົມກ່ອນປີໃໝ່.

ຂ່າວ: ບຸນນິກ 

แชร์