ຖໍ້າພຣະ-ໜອງປາຝາ ມີພຣະພຸດທະຮູບ 229 ອົງ ອາຍຸເກົ່າແກ່ກວ່າ 600 ປີ

ຖໍ້າພຣະ-ໜອງປາຝາ ຕັ້ງຢູ່ບ້ານນາຂ້າງຊ້າງ, ຫ່າງຈາກຕົວເມືອງທ່າແຂກ ແຂວງຄຳມ່ວນ ໄປທາງທິດຕາເວັນອອກ 14 ກິໂລແມັດ, ຖໍ້າພຣະ-ໜອງປາຝາ ເປັນແຫຼ່ງທ່ອງທ່ຽວທາງວັດທະນະທຳ, ພາຍໃນຖໍ້າມີພຣະພຸດທະຮູບ ຈຳນວນຫຼາຍເຖິງ 229 ອົງ ທີ່ມີອາຍຸເກົ່າແກ່ກວ່າ 600 ປີ. ສ່ວນຢູ່ໜ້າຖໍ້າ ມີໜອງນໍ້າທີ່ສວຍງາມ ແລະໃນໜອງນໍ້າດັ່ງກ່າວຊາວບ້ານເຄີຍເຫັນປາຝາໃຫຍ່ລອຍຂຶ້ນຢູ່ເທິງໜ້ານໍ້າສະນັ້ນເພີ່ນຈຶ່ງໃສ່ຊື່ວ່າ: ຖໍ້າພຣະ-ໜອງປາຝາ.

ບໍລິເວນຖໍ້າພຣະ-ໜອງປາຝາ ແມ່ນຖໍ້າສອງຊັ້ນຢອງກັນຢູ່, ເຊິ່ງຊັ້ນທີ່ຢູ່ຂ້າງເທິງແມ່ນຖໍ້າແຫ້ງທີ່ມີພຣະພຸດທະຮູບຂະໜາດໃຫຍ່ ແລະນ້ອຍເກົ່າແກ່ປະດິດສະຖານຢູ່ຕາມພັກຄ້າຍຄືຂັ້ນບັນໄດ. ສ່ວນຖໍ້າທີ່ຢູ່ດ້ານລຸ່ມແມ່ນຖໍ້າທີ່ມີສາຍນໍ້າ ຈາກໜອງປາຝາ ໄຫຼຜ່ານຈາກໃນຖໍ້າທະລຸອອກມາຫາປາກຖໍ້າດ້ານນອກ,ຖໍ້າທັງສອງນີ້ມີຄວາມຍາວປະ ມານ 200 ແມັດ ເຊິ່ງເປັນຖໍ້າທີ່ມີຄວາມສວຍງາມໄປດ້ວຍຫີນຍ້ອຍຫຼາຍຂະໜາດ ແລະ ຮູບຮ່າງແຕກຕ່າງກັນຢັ່ງຢາຍກັນຢູ່ເປັນຍ່ານ.

ລຸງ ບຸນນົງ ຜູ້ມີອາຍຸໄວກາງຄົນ ແລະມີຕົ້ນກຳເນີດຢູ່ບ້ານທ່າແຄ ເມືອງທ່າແຂກ ແຕ່ໄປຕັ້ງຫຼັກປັກຖານຢູ່ບ້ານນາຂ້າງຊ້າງ, ເປັນຜູ້ໜຶ່ງທີ່ມີຄວາມມັກໄປຊອກຫາຈັບເຈຍມາເປັນເປັນອາຫານ, ລາວມັກໄປໆມາໆລະຫວ່າງບ້ານທ່າແຄ ແລະ ບ້ານນາຂ້າງຊ້າງ ເພາະເປັນເຂດທຳມາຫາກິນຂອງລາວ, ເສັ້ນທາງບ້ານຕໍ່ບ້ານນີ້ກໍ່ມີໜ່ວຍຜາມີຖໍ້າຫຼາຍບ່ອນ, ການໄປມາແຕ່ລະເທື່ອລຸງ ບຸນນົງ ຈຶ່ງມີພາຫານະຈັບເຈຍຕິດຕົວໄປນຳບໍ່ຂາດ, ການພົບເຫັນພຣະພຸດທະຮູບຈຳນວນຫຼາຍໄດ້ເລີ່ມຕົ້ນຂຶ້ນໃນຍາມໃກ້ຈະຄໍ່າ, ຝຸງເຈຍມັກບິນເຂົ້າ-ອອກໃນຖໍ້າ, ໃນກາງເດືອນ 5 ຂອງວັນທີ 16 ປີ 2004 ລຸງ ບຸນນົງ ຈຶ່ງປີນຂຶ້ນບ່ອນອຸບມຸງຖໍ້າທີ່ແນມເຫັນເຈຍຝຸງໃຫຍ່ບິນເຂົ້າ-ອອກນັ້ນ, ປາກຖໍ້າສູງຈາກພື້ນດິນ ປະມານ 20 ກວ່າແມັດ, ຍ້ອນຄວາມຊິນເຄີຍໃນການປີນໜ້າຜາຢ່າງຊຳນິຊຳນານຫຼັງຈາກທີ່ ລຸງ ບູນນົງ ປີນຂຶ້ນຮອດຈຶ່ງພົບເຫັນພຣະພຸດທະຮູບພາຍໃນຖໍ້າເປັນຈຳນວນຫຼາຍອົງ ເຊິ່ງເປັນນິມິດໝາຍອັນດີໃນການສັກກະລະບູຊາ, ເມື່ອຊາວບ້ານນາຂ້າງຊ້າງ ແລະ ອົງການຈັດຕັ້ງບ້ານໄດ້ຮັບຂ່າວອັນເປັນມະຫາມຸງຄຸນຈາກ ລຸງ ບຸນນົງ ແລ້ວກໍ່ລາຍງານອົງການຈັດຕັ້ງ ແລ້ວພາກສ່ວນທີ່ກ່ຽວຂ້ອງໄດ້ພ້ອມພຽງກັນໄປທຳພິທີຄາລະວະບູຊາ ແລະປົກປັກຮັກສາວັດຖຸບູຮານອັນລໍ້າຄ່ານີ້ໄວ້ໃນສະຖານທີ່ດັ່ງເດີມ.

ປະຈຸບັນເສັ້ນທາງເຂົ້າຫາຖໍ້າພຣະບ້ານນາຂ້າງຊ້າງໄດ້ມີການປັບປຸງປົວແປງໃຫ້ມີຄວາມສະດວກສະບາຍ ແລະສາມາດທຽວໄດ້ທັງສອງລະດູ. ນອກຈາກນັ້ນພື້ນຖານໂຄງລ່າງບໍລິເວນເຂດຖໍ້າຍັງມີການຈັດສັນຢ່າງເປັນລະບົບລະບຽບຈົບງາມ, ມີຕະຫຼາດຊຸມຊົນ, ມີອາຫານ, ເຄື່ອງດື່ມ ແລະ ເຄື່ອງຫັດຖະກໍາພື້ນບ້ານສຳລັບບໍລິການແຂກນັກທ່ອງທ່ຽວທີ່ມາຢ້ຽມຊົມສະຖານທີ່ທ່ອງທ່ຽວແຫ່ງນີ້ອີກດ້ວຍ.

ຂໍ້ມູນຈາກ: ຂະແໜງທ່ອງທ່ຽວ, ພະແນກ ຖວທ ແຂວງຄຳມ່ວນ

แชร์