ຄວາມຄືບໜ້າການເປັນເຈົ້າພາບກອງປະຊຸມທ່ອງທ່ຽວອາຊຽນ

ກອງປະຊຸມລາຍງານ ຄວາມຄືບໜ້າການກະກຽມຄວາມພ້ອມເປັນເຈົ້າພາບຈັດກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 17 ແລະມະຫາກຳການທ່ອງທ່ຽວອາຊຽນ( ASEAN Tourism Forum 2024 ຫລື ATF 2024) ໄດ້ຈັດຂຶ້ນໃນວັນທີ 5 ຕຸລາ 2023ນີ້ ໂດຍການເປັນປະທານຂອງ ທ່ານນາງ ສວນ ສະຫວັນ ວິຍະເກດ ລັດຖະມົນຕີກະຊວງ ຖວທ ພ້ອມດ້ວຍພາກສ່ວນທີ່ກ່ຽວຂ້ອງ.

ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ ໄດ້ລາຍງານວ່າ: ໃນວັນທີ 23-24 ມັງກອນ 2024 ຈະຈັດກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ, ສ່ວນວັນ ທີ 25-26 ມັງກອນ 2024 ກອງປະຊຸມລັດຖະມົນຕີທ່ອງທ່ຽວອາຊຽນ ແລະກອງປະຊຸມທີ່ກ່ຽວຂ້ອງ, ສະຖານທີ່ຢູ່ໂຮງແຮມແລນມາກ. ສຳລັບພິທີເປີດ ATF 2024 ຈະຈັດຂຶ້ນໃນວັນທີ 24 ມັງກອນ ຢູ່ໂຮງເເຮມດອນຈັນພາເລດ. ງານມະຫະກໍາການທ່ອງທ່ຽວຄັ້ງນີ້ຈັດຂຶ້ນພາຍໃຕ້ຫົວຂໍ້: ການທ່ອງທ່ຽວທີ່ມີຄຸນນະພາບ ແລະຄວາມຮັບຜິດຊອບເພື່ອຄວາມຍືນຍົງໃນອານາຄົດຂອງອາຊຽນ.

ສຳລັບດ້ານທີ່ພັກໄດ້ກຳນົດເອົາ 6 ໂຮງແຮມທາງການຄື: ໂຮງແຮມແລນມາກ 1-2, ໂຮງແຮມລາວພາຊາ, ໂຮງແຮມຄຣາວພາຊາ, ໂຮງແຮມເມືອງແທັງ, ໂຮງແຮມໂປລີ້ວຽງຈັນ ແລະ ໂຮງແຮມ ST ວັດໄຕ ເຊິ່ງສາມາດ ຮອງຮັບຄະນະຜູ້ແທນມາຮ່ວມກອງປະຊຸມ ແລະມາຮ່ວມງານວາງສະແດງຢ່າງພຽງພໍ, ຄາດຄະເນຜູ້ແທນທີ່ຈະມາ ຮ່ວມງານ ATF 2024 ປະມານ 250-300 ຄົນ.

ສ່ວນວຽກງານສິລະປະ ແລະການສະແດງໄດ້ກະກຽມລາຍການສະແດງຮັບໃຊ້ພິທີເປີດ ATF 2024 3 ລາຍການຄື: ເປົ່າແຄນວົງ, ຮ້ອງຄູ່ຍິງ-ຊາຍ (ເພງໃໝ່), ຟ້ອນຍິນດີ ຕ້ອນຮັບ ເເລະອີກ 7 ລາຍການ ໃນງານລ້ຽງວັນທີ 24 ມັງກອນ 2024.
ທີ່ມາ: ຂປລ

แชร์