ປີ 2024 ປະຊາກອນລາວ ຄາດວ່າຈະເພີ່ມຂຶ້ນເປັນ 8 ລ້ານຄົນ

ໃນວັນທີ 4 ກັນຍາ 2023 ທີ່ສູນພາສາຍູທີດີ (UTD) ນະຄອນຫລວງວຽງຈັນ, ກະຊວງແຜນການ ແລະການລົງທຶນຮ່ວມກັບອົງການສະຫະປະຊາຊາດກອງທຶນເພື່ອປະຊາກອນ(UNFPA) ໄດ້ຈັດຊຸດຝຶກອົບຮົມ ກ່ຽວກັບວຽກງານດ້ານປະຊາກອນ ແລະການກະກຽມຄວາມພ້ອມຂອງ ສປປ ລາວ ໃນການດໍາເນີນກອງປະຊຸມແຫ່ງຊາດ ວ່າດ້ວຍປະຊາກອນ ແລະການພັດທະນາ ຄັ້ງທີ I (NCPD) ທີ່ຈະຈັດຂຶ້ນໃນທ້າຍເດືອນຕຸລາ 2023 ຢູ່ ສປປ ລາວ.

ຜົນກອງປະຊຸມດັ່ງກ່າວຈະນໍາເຂົ້າສູ່ຖະແຫລງການແຫ່ງຊາດຂອງຄະນະຜູ້ແທນລາວທີ່ຈະສືບຕໍ່ເຂົ້າຮ່ວມກອງປະຊຸມ ອາຊີ-ປາຊີຟິກ (APPC) ຄັ້ງທີ 7 ທີ່ຈະຈັດຂຶ້ນໃນປີ 2024 ຢູ່ບາງກອກ ຣາຊະອານາຈັກໄທ.

ຜູ້ເຂົ້າຮ່ວມຊຸດຝຶກອົບຮົມ ໄດ້ຮັບຟັງ ແລະແລກປ່ຽນຄວາມຮູ້ທາງດ້ານວຽກງານປະຊາກອນເຊິ່ງໄດ້ຍົກໃຫ້ເຫັນຄວາມສໍາຄັນຂອງວຽກງານປະຊາກອນ, ວາລະຂອງກອງປະຊຸມດ້ານປະຊາກອນໃນລະ ດັບປະເທດ, ພາກພື້ນ ແລະ ສາກົນ, ເນື້ອໃນຂອງກອງປະຊຸມໃນແຕ່ລະຄັ້ງຜ່ານມາ ໂດຍສ້າງວິໄສທັດ, ວາງນະໂຍບາຍແຫ່ງຊາດ ແລະ ສິ່ງທ້າທາຍ ໃນການພັດທະນາວຽກງານປະຊາກອນໃນຕໍ່ໜ້າ ເພື່ອໃຫ້ສື່ມວນຊົນໄດ້ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ; ສາມາດນໍາເອົາຂໍ້ມູນ, ບັນດາແຜນງານ, ລວມທັງການສະຫນັບສະຫນູນຄໍາຫມາຍຫມັ້ນຕ່າງໆ ທີ່ກ່ຽວຂ້ອງກັບວຽກງານປະຊາກອນຂອງລັດຖະບານໄປໂຄສະນາເຜີຍແຜ່ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ.

ອົງການສະຫະປະຊາຊາດກອງທຶນເພື່ອປະຊາກອນຍັງລາຍງານຮູ້ໃຫ້ວ່າ: ໃນປີ 2023 ປະຊາກອນຂອງ ສປປ ລາວ ມີປະມານ 7,5 ລ້ານຄົນ ແລະຄາດວ່າໃນປີ 2024 ຈະເພີ່ມຂຶ້ນປະມານ 8 ລ້ານຄົນ.
ທີ່ມາ: ຂປລ

แชร์