ປກສ ຄໍາມ່ວນ ຊີ້ແຈງກໍລະນີ ໂຈນໃສ່ເສື້ອທະຫານຂົນສົ່ງຢາໄອສ໌ 250 ກິໂລ

ວັນທີ 4 ຕຸລາ 2023 ທ່ານ ພັທ ຄໍາຮຸ່ງ ອາລຸນສັກ ຮອງຫົວໜ້າກອງບັນຊາການຫົວໜ້າຫ້ອງຕໍາຫລວດ ປກສ ແຂວງຄໍາມ່ວນ ໄດ້ຊີ້ແຈງກ່ຽວກັບເຫດການ ການຈັບກຸມຜູ້ຂົນສົ່ງຢາເສບຕິດປະເພດຢາໄອສ໌ 250 ແທ່ງ ຢູ່ທາງເລກທີ 13 ໃຕ້ ເຂດບ້ານວຽງທອງ ເມືອງ ຫີນບູນ ແຂວງຄໍາມ່ວນ ໃນວັນທີ 21 ສິງຫາ 2023 ຜ່ານມາ, ແຕ່ມີຫລາຍສື່ອອນລາຍໄດ້ໂພສຂໍ້ຄວາມພ້ອມຮູບພາບຜູ້ຖືກຫາໃສ່ເສື້ອທະຫານໂດຍໃສ່ຮ້າຍປ້າຍສີ ວ່າ: ເງິນເດືອນທະຫານຊັ້ນຜູ້ນ້ອຍບໍ່ກຸ້ມຢູ່ກຸ້ມກິນເລີຍຄ້າຢາເສບຕິດເຮັດໃຫ້ເກີດມີຫາງສຽງວິພາກວິຈານຕໍ່ເຈົ້າໜ້າທີ່ກໍາລັງປ້ອງກັນຊາດ; ຕໍ່ກັບຂ່າວດັ່ງກ່າວມີຂໍ້ມູນເນື້ອໃນທີ່ບິດເບືອນຈາກຄວາມຈິງ.

ຄະດີດັ່ງກ່າວເບື້ອງຕົ້ນໃນເວລາ 10:09 ນາທີ ຂອງວັນທີ 21 ສິງຫາ 2023 ເຈົ້າໜ້າທີ່ພະແນກຕໍາຫຼວດ ສະກັດກັ້ນ ແລະຕ້ານຢາເສບຕິດ ປກສ ແຂວງຄໍາມ່ວນ ໄດ້ສະກັດລັດກວດລົດຕູ້ HUYNDAI ສີດໍາ, ໝາຍເລກທະບຽນ ກໍາແພງນະຄອນ ກສ 4494 ຂັບຂີ່ ຢູ່ເສັ້ນທາງເລກທີ 13 ໃຕ້ເຂດບ້ານວຽງທອງ ເມືອງຫີນບູນ ແຂວງ ຄໍາມ່ວນ ມຸ່ງໜ້າມາແຕ່ແຂວງ ບໍລິຄໍາໄຊ, ຜ່ານການກວດກາພົບເຫັນເຄື່ອງຂອງກາງ ຢາເສບຕິດປະເພດຢາໄອສ໌ 10 ເປົ່າ ເທົ່າກັບ 250 ກິໂລກຣາມ ທີ່ຊຸກເຊື່ອງໄວ້ຢູ່ໃນລົດຕູ້ຄັນດັ່ງກ່າວພ້ອມທັງກັກຕົວຜູ້ຂັບຂີ່ ຊື່ ທ້າວ ສຸລິສັກ ເປີຄໍາເພົາວັນ (ຫຼື ທ້າວ ດໍາ) ອາຍຸ 35 ປີ ບ້ານເກີດໂພນແກ້ວ ເມືອງສາລະວັນ ແຂວງ ສາລະວັນ ບ້ານຢູ່ປັດຈຸບັນວັງຊາຍ, ເມືອງໄຊເສດຖາ, ນະຄອນຫຼວງວຽງຈັນ. ຕໍ່ມາວັນທີ 25 ສິງຫາ 2023 ໄດ້ມີກຸ່ມຄົນບໍ່ດີຈໍານວນໜຶ່ງໄດ້ຕັດຕໍ່ຮູບພາບ ທ້າວ ສຸລິສັກ ເປີຄໍາເພົາວັນ ລວມມີຮູບພາບເຄື່ອງຂອງກາງຢາເສບຕິດ ຢາໄອສ໌ 250 ກິໂລກຣາມ, ຮູບພາບເສື້ອທະຫານພ້ອມດ້ວຍແຜ່ນຊັ້ນຮ້ອຍໂທ ແລະຮູບພາບບັດທະຫານຕິດຊັ້ນຮ້ອຍຕີ ພ້ອມທັງຂຽນຂໍ້ຄວາມໃສ່ຮ້າຍປ້າຍສີຕໍ່ກໍາລັງປ້ອງກັນຊາດ ລົງສື່ສັງຄົມອອນລາຍ (Facebook) ເຊິ່ງເຮັດໃຫ້ເສື່ອມເສຍບົດບາດກໍາລັງປ້ອງກັນຊາດ.

ທ່ານ ພັທ ຄໍາຮຸ່ງ ອາລຸນສັກ ກ່າວຕື່ມວ່າ: ຜ່ານການເກັບກໍາຂໍ້ມູນຂອງເຈົ້າໜ້າທີ່ຕໍ່ກັບຮູບພາບດັ່ງກ່າວນັ້ນເຫັນວ່າບໍ່ແມ່ນຄວາມຈິງຍ້ອນວ່າບັດປະຈໍາຕົວແມ່ນຕິດຊັ້ນຮ້ອຍຕີ ແຕ່ແຜ່ນຊັ້ນຕິດເຄື່ອງແບບແມ່ນໃສ່ຊັ້ນຮ້ອຍໂທ ແລະປັດຈຸບັນ ທ້າວ ສຸລິສັກ ເປີຄໍາເພົາວັນ (ຫຼື ທ້າວ ດໍາ) ແມ່ນຖືກປະຕິບັດວິໄນໄລ່ອອກຈາກກໍາລັງປ້ອງກັນຊາດແລ້ວໃນປີ 2020, ແຕ່ຜູ້ກ່ຽວຍັງໄດ້ສວຍໃຊ້ ແລະແອບອ້າງວ່າເປັນເຈົ້າໜ້າທີ່ທະຫານເພື່ອອໍານວຍຄວາມສະດວກໃນການເຄື່ອນໄຫວກໍ່ການກະທໍາຜິດ,ສະນັ້ນ, ຮຽກຮ້ອງມາຍັງປະຊາຊົນບັນດາເຜົ່າໃນທົ່ວສັງຄົມຢ່າຫຼົງເຊື່ອຕໍ່ການໂຄສະນາໃສ່ຮ້າຍປ້າຍສີຂອງບັນດາກຸ່ມຄົນທີ່ບໍ່ຫວັງດີໂພສລົງສື່ສັງຄົມອອນລາຍທີ່ເຮັດໃຫ້ເສື່ອມເສຍເຈົ້າຫນ້າທີ່ ແລະອົງການຈັດຕັ້ງພັກ-ລັດ ພວກເຮົາ.
ທີ່ມາ: ລາວພັດທະນາ

แชร์