JDB ມອບເງິນ100 ລ້ານກີບ ຊຸກຍູ້ຂະບວນການກິລາຍ່າງ-ແລ່ນ ເພື່ອສຸຂະພາບ ເນື່ອງໃນໂອກາດ ຄົບຮອບ 55 ປີວັນສ້າງຕັ້ງ ທະນາຄານແຫ່ງ ສປປ ລາວ

ໃນຕອນເຊົ້າວັນທີ 29 ກັນຍາ 2023 ທີ່ທະນາຄານ ແຫ່ງ ສປປ ລາວ, ທ່ານ ວິໄລ ສີພະພອນ ປະທານສະພາບໍລິຫານທະນາຄານຮ່ວມພັດທະນາພ້ອມດ້ວຍຄະນະໄດ້ນໍາເງິນຈໍານວນ 100,000,000 ກີບ ໄປມອບໃຫ້ທະນາຄານແຫ່ງ ສປປ ລາວ ເພື່ອເປັນການປະກອບສ່ວນອຸປະຖໍາຂະບວນການກິລາຍ່າງ-ແລ່ນ ເພື່ອສຸຂະພາບ ແລະຄວາມສາມະຄີເນື່ອງໃນໂອກາດຄົບຮອບວັນສ້າງຕັ້ງທະນາຄານແຫ່ງ ສປປ ລາວ ຄົບຮອບ 55 ປີ, ຊຶ່ງຕາງໜ້າໃຫ້ທະນາຄານແຫ່ງ ສປປ ລາວ ໃຫ້ກຽດຮັບໂດຍທ່ານ ທ່ານ ສຸສິສັກ ທໍານຸວົງ ຫົວໜ້າກົມນະໂຍບາຍເງິນຕາ ແລະພະນັກງານທີ່ກ່ຽວຂ້ອງກໍໄດ້ເຂົ້າຮ່ວມ.

ໃນໂອກາດນີ້, ທ່ານຫົວໜ້າກົມນະໂຍບາຍໄດ້ກ່າວສະແດງຄວາມຂອບໃຈ, ຮູ້ບຸນຄຸນມາຍັງປະທານ ເອກະພັນ ພະພິທັກ ປະທານຜູ້ຖືຮຸ້ນທະນາຄານຮ່ວມພັດທະນາທີ່ໄດ້ມີນໍ້າຈິດນໍ້າໃຈ, ໃຫ້ການສະໜັບສະໜູນໃນວັນຄົບຮອບ 55 ປີ ວັນສ້າງຕັ້ງ ທະນາຄານແຫ່ງ ສປປ ລາວ.

ໃນຕອນເຊົ້າເວລາ 6:00 ໂມງ ຂອງວັນທີ 30 ກັນຍາ 2023 ຢູ່ທີ່ ເຂດເສດຖະກິດພິເສດບຶງ ທາດຫຼວງ ໄດ້ມີຂະບວນການ ຍ່າງ-ແລ່ນ ເພື່ອສຸຂະພາບແລະຄວາມສາມະຄີເນື່ອງໃນໂອກາດຄົບຮອບ 55 ປີ ວັນສ້າງຕັ້ງທະນາຄານ ແຫ່ງສປປລາວ (7/10/1969-7/10/2023 ) ເປັນກຽດເຂົ້າຮ່ວມໃນພິທີຄັ້ງນີ້ໂດຍ: ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທ່ານ ສອນໄຊ ສິດພະໄຊ ລັດຖະມົນຕີປະຈໍາສໍານັກງານນາຍົກລັດຖະມົນຕີ, ມີທ່ານ ອາລຸນໄຊ ລັດຖະມົນຕີ ປະຈໍາສໍານັກງານນາຍົກລັດຖະມົນຕີ ກໍໄດ້ເຂົ່າຮ່ວມຍ່າງເພື່ອສຸຂະພາຍຄັ້ງນີ້. ທະນາຄານແຫ່ງ ສປປ ລາວ ພ້ອມດ້ວຍ ທະນາຄານທຸລະກິດ ທີ່ດໍາເນີນທຸລະກິດຢູ່ສປປ ລາວ ໄດ້ຮ່ວມກັນຈັດຂະບວນການແຂ່ງຂັນກິລາຍ່າງ- ແລ່ນ ເພື່ອສຸຂະພາບ ແລະ ຄວາມສາມັກຄີ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງທະນາຄານແຫ່ງ ສປປ ລາວ ຄົບຮອບ 55 ປີ  ໂດຍແບ່ງເປັນ 3 ໄລຍະທາງຄື :

ຍ່າງ ໄລຍະ 2,5 ກິໂລແມັດ, ແລ່ນ ໄລຍະ 5,5 ກິໂລແມັດ ແລະ ແລ່ນ ໄລຍະ 10,5 ກິໂລແມັດ. ຂະບວນການແຂ່ງຂັນກິລາຍ່າງ-ແລ່ນ ເພື່ອສຸຂະພາບ ແລະ ຄວາມສາມັກຄີໃນໂອກາດ ຄົບຮອບ 55 ປີ ທະນາຄານແຫ່ງ ສປປ ລາວ ໄດ້ຈັດຂື້ນພາຍໃຕ້ການເປັນປະທານຂອງທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ພ້ອມດ້ວຍ ແຂກຄະນະນໍາຄະນະກົມ ຈາກທະນາຄານແຫ່ງ ສປປ ລາວ, ທະນາຄານທຸລະກິດ, ບໍລິສັດບໍລິການດ້ານການເງິນເຂົ້າຮ່ວມຫຼາຍພາກສ່ວນ, ຈຸດປະສົງຫຼັກຂອງງານໃນຄັງນີ້ແມ່ນເພື່ອເປັນການສ້າງຂະບວນການຂໍານັບຮັບຕ້ອນວັນສ້າງຕັ້ງທະນາຄານແຫ່ງ ສປປ ລາວ ຄົບຮອບ 55 ປີ (7/10/1968 – 7/10/2023) ຊຶ່ງກົງກັບວັນທີ 7 ຕຸລາ ຂອງທຸກໆປີ ແລະທັງເປັນການເຕົ້າໂຮມກ້ອນກໍາລັງພະນັກງານຂະແຫນງການທະນາຄານສ້າງຄວາມສາມັກຄີລະຫວ່າງ ການນໍາ ຜູ້ບໍລິຫານ ພະນັ້ກງານ-ລັດຖະກອນ ທຫລ, ທະນາຄານທຸລະກິດ ແລະ ບໍລິສັດຜູ້ໃຫ້ບໍລິການດ້ານການເງິນຕ່າງໆ ແລະເພື່ອເປັນການສ້າງພາລະນາໄມທີ່ສົມບູນ ສຸຂະພາບທີ່ແຂງແຮງໃຫ້ແກ່ພະນັກງານໃນຂະແໜງການເງິນ-ການທະນາຄານ. ໃນໂອກາດນີ້ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໃນນາມ ຕາງໜ້າຄະນະນໍາຂອງ ທຫລ ຍັງໄດ້ສະຫລຸບ-ຕີລາຄາ ຕໍ່ງານໃນຄັ້ງນີ້ວ່າເປັນງານທີ່ເຕັມໄປດ້ວຍບັນຍາກາດມ່ວນຊື່ນມີສີສັນ ກະທັດຮັດ ແລະມີເນື້ອໃນທັງເຕັມໄປດ້ວຍຄວາມສາມັກຄີຈາກກ້ອນກໍາລັງຂອງນັກກິລາທຸກພາກສ່ວນໃນຂົງເຂດຂະແໜງການເງິນ-ການທະນາຄານ ທີ່ໄດ້ເຂົ້າ ຮ່ວມ ຢ່າງພ້ອມພຽງ ແລະ ເປັນຂະບວນຟົດຟື້ນ. ຂະບວນການນີ້ບໍ່ພຽງແຕ່ເປັນການຮັດແໜ້ນຄວາມສາມັກຄີພາຍໃນຂະແໜງການເງິນ-ການທະນາຄານ ເທົ່ານັ້ນ ແຕ່ເນື້ອແທ້ແມ່ນການພ້ອມກັນພັດທະນາ ແລະກ້າວໜ້າຢ່າງບໍ່ຢຸດຢັງເໝືອນດັ່ງສັນຍາລັກ 55 ປີ ທີ່ມີຮູບອະສົງໄຂ ຫຼື (Infinity) ຊຶ່ງໝາຍເຖິງ ການຮ່ວມກັນພັດທະນາຕະຫລອດໄປ.

 ໃນວາລະສຸດທ້າຍຂອງງານທ່ານຜູ້ວ່າການທະນາຄານແຫ່ງ ສປປ ລາວ ຍັງໄດ້ສະແດງຄວາມຍ້ອງຍໍຊົມເຊີຍມາຍັງບັນດາຄະນະຮັບຜິດຊອບທຸກພາກສ່ວນ ລວມທັງຜູ້ປະກອບສ່ວນອຸປະຖໍາທາງດ້ານວັດຖຸ ແລະປັດໃຈຈາກບັນດາທະນາຄານທຸລະກິດ ແລະບໍລິສັດບໍລິການດ້ານການເງິນທີ່ໄດ້ປະກອບສ່ວນຮ່ວມກັນຫ້າງຫາກະກຽມຂະບວນການໃນມື້ນີ້ ໃຫ້ໄດ້ຮັບຜົນສໍາເລັດຢ່າງຈົບງາມ. ນະໂອກາດນີ້, ບັນດາວັດຖຸປັດໃຈທີ່ໄດ້ຮັບການປະກອບສ່ວນທີ່ເຫຼືອຈະນໍາໄປໃຊ້ໃຫ້ເກີດປະໂຫຍດໂດຍສະເພາະແມ່ນການສ້າງບູລະນະສ້ອມແປງໂຮງຮຽນ ຢູ່ແຂວງຫົວພັນ. ຂະບວນການແຂ່ງຂັນກິລາຍ່າງ - ແລ່ນ ເພື່ອສຸຂະພາບ ແລະຄວາມສາມັກຄີໃນໂອກາດ ຄົບຮອບ 55 ປີທະນາຄານແຫ່ງ ສປປ ລາວ ໄດ້ປິດລົງໃນເວລາ 9ໂມງເຊົ້າຂອງວັນດຽວກັນພາຍໃຕ້ການເຂົ້າຮ່ວມຈາກຫຼາຍພາກສ່ວນທີ່ມາຈາກຂະແໜງການເງິນ-ການທະນາຄານ ຊຶ່ງດໍາເນີນໄປດ້ວຍບັນຍາກາດທີ່ຟົດຟື້ນ.

                                            

แชร์