ລັດວິສາຫະກິດຈີນ ສະໜັບສະໜູນການເຕີບໂຕຂອງບໍລິສັດ ພູເບ້ຍ ມາຍນິງ ຢູ່ລາວ

ບໍລິສັດ ພູເບ້ຍ ມາຍນິງ ເປັນກຽດໄດ້ຕ້ອນຮັບທ່ານ ເສິ້ນ ເຊິ້ງກວ່າງ, ຮອງເລຂາຄະນະພັກ ສປ ຈີນ, ສະມາຊິກກຳມະການສະພາປຶກສາການເມືອງປະຊາຊົນແຂວງແຂວງກວາງຕຸ້ງ (CPPCC) ແລະທັງເປັນຜູ້ອໍານວຍ ຂອງກຸ່ມບໍລິສັດຜູ້ຖືຮຸ້ນກວາງຕຸ້ງ ຣາຍຊິງ ໂຮລດິງ ຈໍາກັດ (GRHG) ທີ່ເປັນລັດວິສາຫະກິດຂອງຈີນ ດໍາເນີນງານພາຍໃຕ້ຄະນະກໍາມາທິການບໍລິຫານ ແລະຊີ້ນໍາດ້ານຊັບສິນຂອງລັດວິສາຫະກິດ, ລັດຖະບານປະຊາຊົນຂອງ ແຂວງກວ່າງຕຸ້ງຢູ່, ແລະທ່ານ ຊູ ເຢົາ, ປະທານບໍລິສັດກວາງຕຸ້ງ ຣາຍຊິງ ເຮັສ໌.ເຄ. (ໂຮລດິງ) ຮ່ອງກົງ ຈໍາກັດ (GRHK), ທີ່ເປັນບໍລິສັດໃນເຄືອຂອງ GRHG, ທີ່ໄດ້ນໍາພາຄະນະຕົວແທນຈາກ GRHG ແລະ GRHK ໃນໂອກາດທີ່ເດີນທາງມາຢ້ຽມຢາມປະເທດລາວຢ່າງເປັນທາງການ.

ບໍລິສັດ ແພນອອສ໌ ທີ່ເປັນບໍລິສັດແມ່ ຂອງບໍລິສັດ ພູເບ້ຍ ມາຍນິງ ເຊິ່ງມີສໍານັກງານຕັ້ງຢູ່ປະເທດອົສຕາລີ ແມ່ນຖືຮຸ້ນ 100% ໂດຍບໍລິສັດ GRHK ກວາງດົງ ຣາຍຊິງ ເອທເຄ (ໂຮນດິງ) ຮ່ອງກົງ ຈຳກັດ (GRHK), ເຊິ່ງເປັນບໍລິສັດ ໃນເຄືອຂອງກຸ່ມບໍລິສັດຜູ້ຖືຮຸ້ນ ກວາງຕຸ້ງ ຣາຍຊິງ ໂຮນດິງ ກຼຸບ ຈໍາກັດ (GRHG).
ຄະນະຕົວແທນ ໄດ້ເຂົ້າພົບທ່ານ ໂພໄຊ ໄຊຍະສອນ, ລັດຖະມົນຕີກະຊວງພະລັງງານ ແລະ ບໍ່ແຮ່, ເຊິ່ງທ່ານໄດ້ໃຫ້ການຕ້ອນຮັບທ່ານເສີ້ນ ເຊິ້ງກວ່າງ ແລະ ທ່ານ ຊູ ເຢົາ ຢ່າງອົບອຸ່ນ. ໃນໂອກາດການເຂົ້າພົບທ່ານລັດຖະມົນຕີ, ທ່ານ ເສິ້ນ ເຊິ້ງກວ່າງ ໄດ້ໂອ້ລົມກ່ຽວກັບສາຍສໍາພັນອັນພິເສດລະຫວ່າງລັດຖະບານແຫ່ງ ສປ ຈີນ, ລັດຖະບານແຫ່ງ ສປປ ລາວ ແລະເປົ້າໝາຍການລົງທຶນຂອງ GRHG ຢູ່ໃນປະເທດ.

ທ່ານລັດຖະມົນຕີກະຊວງພະລັງງານ ແລະບໍ່ແຮ່ໄດ້ຊົມເຊີຍ ບໍລິສັດ ທີ່ເອົາໃຈໃສ່ໃນການປະຕິບັດມາດຕະຖານຮອບດ້ານໃນການດຳເນີນກິດຈະການ ແລະກໍ່ຊົມເຊີຍທີ່ເປັນບ່ອນທີ່ບໍລິສັດໃນເຄືອການລົງທຶນຂອງບໍລິສັດແມ່ຢູ່ຈີນ ມາຖອດຖອນບົດຮຽນນຳ ແລະຫວັງວ່າຈະໄດ້ມີການຖອດຖອນບົດຮຽນຫຼາຍອັນແກ່ພາກລັດ, ພ້ອມນັ້ນກໍ່ໄດ້ຊົມເຊີຍ ບໍລິສັດໃນການປະກອບສ່ວນຢ່າງພົ້ນເດັ່ນໃນການປະຕິບັດພັນທະທາງດ້ານການເງິນຕໍ່ລັດຖະບານ ລວມທັງການປະກອບສ່ວນທາງດ້ານການພັດທະນາເສດຖະກິດ-ສັງຄົມ ທີ່ເປັນປະໂຫຍດແກ່ ປະຊາຊົນ ແລະ ທ້ອງຖິ່ນ ຕະຫຼອດເຖິ່ງລັດຖະບານ.

ທ່ານດາລິງ ເຊັງ, ຜູ້ອໍານວຍການ ແລະປະທານບໍລິຫານຂອງບໍລິສັດ ແພນອອສ໌, ຍັງໄດ້ກ່າວເຖິງຄວາມສໍາຄັນຂອງການເດີນທາງມາຢ້ຽມຢາມຂອງຄະນະຕົວແທນຂັ້ນສູງຈາກລັດວິສາຫະກິດຈີນ. ທ່ານ ດາລິງ ເຊັງ ກ່າວວ່າ: “ນີ້ແມ່ນຄັ້ງທໍາອິດຂອງຄະນະຕົວແທນດັ່ງກ່າວທີ່ເດີນທາງມາປະເທດລາວ ແລະ ໄດ້ເຫັນການດໍາເນີນງານຂອງບໍລິສັດ ພູເບ້ຍ ມາຍນິງ. GRHG ແລະ GRHK ມີຄວາມມຸ້ງໝັ້ນອັນແຮງກ້າທີ່ຈະລົງທຶນເພີ່ມເຕີມໃນປະເທດລາວ. ພວກເຮົາສືບຕໍ່ຮັບປະກັນວ່າການລົງທຶນຢ່າງຕໍ່ເນື່ອງຂອງພວກເຮົາຈະສ້າງຜົນຕອບແທນໂດຍກົງທາງດ້ານການເງິນໃຫ້ແກ່ລັດຖະບານລາວ ແລະຜົນປະໂຫຍດທາງດ້ານເສດຖະກິດ-ສັງຄົມໃຫ້ແກ່ປະຊາຊົນລາວ.”

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ ໃຫ້ຮູ້ຕື່ມອີກວ່າ: “GRHG ແລະ GRHK ມີຄວາມຍິນດີທີ່ຈະເຫັນການລົງທຶນທີ່ເຂັ້ມແຂງຕໍ່ເນື່ອງຂອງບໍລິສັດ ພູເບ້ຍ ມາຍນິງຢູ່ລາວ ເຊິ່ງມີການປະກອບສ່ວນໂດຍກົງທາງດ້ານການເງິນລາຍກວ່າຈໍານວນ 968 ລ້ານໂດລາສະຫະລັດ ໃຫ້ແກ່ລັດຖະບານລາວນັບແຕ່ເລີ່ມດໍາເນີນງານຈົນເຖິງປະຈຸບັນ. ນອກຈາກນັ້ນ ພວກເຮົາຍັງໄດ້ຊໍາລະ 2.48 ຕື້ໂດລາສະຫະລັດໃຫ້ບັນດາບໍລິສັດຂອງລາວ ແລະ ບໍລິສັດຕ່າງປະເທດທີ່ລົງທະບຽນຢູ່ລາວ ທີ່ສະໜອງສິນຄ້າ ແລະການບໍລິການໃຫ້ແກ່ພວກເຮົາ. ພວກເຮົາມີຄວາມພາກພູມໃຈທີ່ໄດ້ວ່າຈ້າງພະນັກງານຄົນລາວຫຼາຍກວ່າ 3,000 ຄົນ ຫຼືຫຼາຍກວ່າ 93 ສ່ວນຮ້ອຍຂອງຈໍານວນພະນັກງານທັງໝົດ. ດ້ວຍມຸມມອງການລົງທຶນໃນດ້ານບວກ, ຄະນະຕົວແທນດັ່ງກ່າວໄດ້ເບິ່ງເຫັນໂອກາດຕ່າງໆທີ່ດີໃນອະນາຄົດສໍາລັບອຸດສາຫະກໍາບໍ່ແຮ່ໃນລາວ.”

แชร์