ຢຶດຊິງຊັ່ງນໍ້າໜັກບໍ່ໄດ້ມາດຕະຖານ ແລະສິນຄ້າເສື່ອມຄຸນນະພາບ

ວັນທີ 28 ກັນຍາ 2023 ຜ່ານມາ, ອົງການ ການຄ້າ ເມືອງປາກກະດິງ ແຂວງບໍລິຄໍາ ນຳໂດຍທ່ານ ສົມສະຫວັດ ມັງແກ້ວບິດາ ຮອງຫົວໜ້າຫ້ອງການ ອຸດສາຫະກຳ ແລະ ການຄ້າເມືອງ ຕິດຕາມ, ກວດກາ ສິນຄ້ານອກລະບົບ ແລະການລະເມີດກົດໝາຍ-ລະບຽບການ ຢູ່ຕະຫລາດ ທົ່ງນາມີໂຊກມີໄຊ, ຕາມແຈ້ງການ ເລກທີ 1447/ພອຄ ຂອງພະແນກອຸດສາຫະກຳ ແລະການຄ້າແຂວງ.

ການລົງເຄື່ອນໄຫວຄັ້ງນີ້ແມ່ນເນັ້ນໃສ່ກວດກາ ລາຄາສິນຄ້າ ຕາມທ້ອງຕະຫລາດ, ກວດກາຊີງຊັ່ງນໍ້າໜັກ 150 ກິໂລລົງມາ, ກວດກາການຕິດສະຫລາກສິນຄ້າເປັນພາສາລາວ-ການຕິດລາຄາເປັນເງິນກີບ, ກວດກາແຫລ່ງທີ່ມາຂອງອາຫານທະເລສົດແຊ່ແຂງ, ກວດກາການການດຳເນີນທຸລະກິດທີ່ບໍ່ຂຶ້ນທະບຽນວິສາຫະກິດຖືກຕ້ອງຕາມລະບຽບກົດໝາຍ ແລະສິນຄ້າເສື່ອມຄຸນ.

ຜົນການລົງກວດກາຄັ້ງນີ້ ເຫັນໄດ້ວ່າຊິງຊັ່ງບາງໜ່ວຍບໍ່ໄດ້ມາດຖານ, ການຕິດສະຫລາກ ແລະລາຄາສິນຄ້າ ແມ່ນມີພຽງລາຄາຊີ້ນເທົ່ານັ້ນ. ນອກນີ້ຍັງໄດ້ກວດພົບສິນຄ້າເສື່ອມຄຸນອີກຈຳນວນໜຶ່ງ. ອົງການປະຕິບັດວຽກງານກວດກາການຄ້າ ເມືອງປາກກະດິງ ຈຶ່ງໄດ້ແນະນຳ, ກ່າວເຕືອນ, ພ້ອມທັງເຮັດບົດບັນທຶກຕໍ່ຜູ້ກະທຳຜິດ ບໍ່ໃຫ້ກະທຳອີກ ພ້ອມທັງຍຶດຊິງຊັ່ງນໍ້າໜັກທີ່ບໍ່ໄດ້ມາດຕະຖານ 4 ໜ່ວຍ ແລະສິນຄ້າເສື່ອມຄຸນອີກຈຳນວນໜຶ່ງເພື່ອໄປທຳລາຍຖິ້ມ.

• 02/10/2023