ຈັບເປົ້າຫມາຍ ຮັບຈ້າງຂົນສົ່ງຢາບ້າ 243.800 ເມັດ

ໃນວັນທີ 19 ສິງຫາ 2023, ພົນລະເມືອງດີໄດ້ແຈ້ງຕໍ່ເຈົ້າໜ້າທີ່ຕໍາຫຼວດ ວ່າມີລົດຂົນສົ່ງສິນຄ້າມາຈອດປະໄວ້ຢູ່ແຄມທາງຂອບເຂດບ້ານຖໍ້າໃຕ້ ເມືອງກາສີ ແຂວງວຽງຈັນ ຈາກນັ້ນເຈົ້າໜ້າທີ່ຕໍາຫຼວດ ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ປກສ ແຂວງວຽງຈັນ ໄດ້ລົງສົມທົບກັບ ເຈົ້າໜ້າທີ່ກອງບັນຊາການ ປກສ ເມືອງກາສີ ລົງກວດກາຢູ່ສະຖານທີ່ດັ່ງກ່າວ ພ້ອມທັງກວດກາລົດຄັນດັ່ງກ່າວແມ່ນຂອງ ທ້າວ ຄຳສອນ ຢູ່ບ້ານທົ່ງແສງຈັນ ເມືອງຫ້ວຍຊາຍ ແຂວງບໍ່ແກ້ວ ພົບເຫັນຢາບ້າຈຳນວນ 1 ເປົາ ເທົ່າກັບ 243.800 ເມັດ ທີ່ຊຸກເຊື່ອງຢູ່ໃນລົດຄັນດັ່ງກ່າວ. ຈາກນັ້ນ, ເຈົ້າໜ້າທີ່ຈຶ່ງໄດ້ກັກຕົວທ້າວ ຄຳສອນ ພ້ອມດ້ວຍລົດຂົນສົ່ງ ແລະຢາບ້າຈຳນວນດັ່ງກ່າວ.


ທ້າວ ຄຳສອນ ສາລະພາບວ່າ: ຢາບ້າຈຳນວນ 243.800 ເມັດ ແມ່ນຜູ້ກ່ຽວໄດ້ຮັບຂົນສົ່ງແທ້. ໃນວັນທີ 18 ສິງຫາ 2023, ຜູ້ກ່ຽວໄດ້ຂັບລົດຂົນສົ່ງສິນຄ້າ ຢູ່ບ້ານໃໝ່ພູຄໍາ ເມືອງຫ້ວຍຊາຍ ແຂວງບໍ່ແກ້ວ ທີ່ມີຢາບ້າຈຳນວນ 20 ເປົາ ໂດຍໄດ້ຮັບຄ້າຈ້າງ 20.000 ບາດ ເພື່ອສົ່ງຕໍ່ໃຫ້ຜູ້ຮ່ວມຂະບວນການຢູ່ສະຖານນີທາງດ່ວນບ້ານນາຊອນ ເມືອງນາຊາຍທອງ ນະຄອນຫຼວງ.

ຈາກນັ້ນ, ພໍຜູ້ກ່ຽວຂັບຂີ່ລົດຄັນດັ່ງກ່າວມາຮອດເສັ້ນທາງຂອບເຂດບ້ານຫ້ວຍສ້ານ ເມືອງກາສີ ແຂວງວຽງຈັນ ໄດ້ມີລົດກະບະ 2 ຄັນ (ບໍ່ມີປ້າຍທະບຽນ)ມາຈອດຕັນທາງໜ້າ ແລ້ວເອົາຕົວທ້າວ ຄຳສອນ ໄປມັດໄວ້ຢູ່ຂອບເຂດ ບ້ານຖໍ້າໃຕ້ ເມືອງກາສີ ແຂວງວຽງຈັນ ແລະໄດ້ຂົນເອົາຢາບ້າໄປຈໍານວນ 19 ເປົາ ຍັງເຫຼືອ 1 ເປົາ; ປະຊາຊົນໄດ້ພົບເຫັນ ຈຶ່ງໄດ້ນຳຕົວຜູ້ກ່ຽວມາ ປກສ ກຸ່ມບ້ານກາສີ ແລ້ວແຈ້ງຕໍ່ເຈົ້າໜ້າທີ່ກ່ຽວຂ້ອງຈັບຕົວ ແລະຢຶດລົດຂົນສົ່ງພ້ອມຢາບ້າ ແລະນຳມາສອບສວນຂະຫຍາຍພົນຫາຜູ້ຮ່ວມຂະບວນການມາລົງໂທດ.
ຂ່າວ: ປກສ ແຂວງວຽງຈັນ

แชร์