ຮອງເຈົ້າແຂວງ ຊີ້ແຈງການຫ້າມຊື້-ຂາຍ ຂີ້ກະເດືອນເພື່ອເປັນທຸລະກິດ

ຈາກກໍລະນີທີ່ພະແນກກະສິກຳ ແລະ ປ່າໄມ້ແຂວງອັດຕະປື ອອກແຈ້ງການກ່ຽວກັບການຫ້າມເກັບກູ້ ແລະ ຊື້-ຂາຍຂີ້ກະເດືອນດິນທຳມະຊາດແບບທຸລະກິດ ເຮັດໃຫ້ສັງຄົມ ເກີດການວິພາກວິຈານໃນທາງທີ່ບໍ່ສ້າງສັນຫລາຍສົມຄວນ.

     ​ຕໍ່ກໍລະນີດັ່ງກ່າວ, ທ່ານ ທະນູໄຊ ບັນຊາລິດ ຮອງເຈົ້າແຂວງອັດຕະປື ໄດ້ຊີ້ແຈງຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ວ່າ: ພະແນກກະສິກໍາ ແລະ ປ່າໄມ້ແຂວງ ໄດ້ລາຍງານຕໍ່ອົງການປົກຄອງແຂວງ ວ່າມີຜູ້ປະກອບການຈໍານວນໜຶ່ງໄດ້ສະເໜີຕໍ່ພະແນກຂອງຕົນວ່າຢາກຂຸດຄົ້ນ ແລະ ປຸງແຕ່ງຂີ້ກະເດືອນແລ້ວສົ່ງອອກ. ຈາກນັ້ນ ພະແນກກະສິກໍາ ແລະ ປ່າໄມ້ແຂວງ ໄດ້ເຮັດໜັງສືເພື່ອຂໍທິດຊີ້ນໍາຈາກກະຊວງກະສິກໍາ ແລະ ປ່າໄມ້, ແຕ່ຍັງບໍ່ທັນໄດ້ຮັບການອະນຸຍາດ. ມີພະນັກງານ ແລະ ປະຊາຊົນຈໍານວນໜຶ່ງຢູ່ເມືອງໄຊເສດຖາ ແລະ ເມືອງສາມັກຄີໄຊ ໄດ້ຮ້ອງຮຽນມາຫາພະແນກກະສິກໍາ ແລະ ປ່າໄມ້ແຂວງ ວ່າ ມີປະຊາຊົນຈໍານວນຫລາຍໄປຂຸດຄົ້ນຂີ້ກະເດືອນຊະຊາຍຢູ່ໃນເນື້ອທີ່ດິນຂອງຕົນເຮັດໃຫ້ເນື້ອທີ່ດິນເກີດຄວາມເສຍຫາຍ ໂດຍນໍາໃຊ້ເຄື່ອງມືແບບໃໝ່ທີ່ບໍ່ແມ່ນການໃຊ້ຈົກ ຫລື ສຽມຂຸດແບບທໍາມະຊາດ ແລ້ວເອົາມາຕາກແຫ້ງຕາມເດີ່ນທົ່ວໄປ ແລະ ເດີ່ນຂອງໂຮງງານນໍ້າດື່ມທີ່ຢຸດເຊົາການຜະລິດແລ້ວເພືອຂາຍເປັນສິນຄ້າ.

     ​ຫລັງຈາກນັ້ນ, ພະແນກກະສິກໍາ ແລະ ປ່າໄມ້ແຂວງ ໄດ້ໄປກວດກາ ພົບເຫັນຢູ່ 3 ຈຸດ, ໃນນີ້ ເມືອງໄຊເສດຖາ 1 ຈຸດ ອອກຊື່ບໍລິສັດ ໂປລິກົງມາວ ເຊີ່ງບໍລິສັດດັ່ງກ່າວບໍ່ໄດ້ຮັບອະນຸຍາດຫຍັງກ່ຽວກັບການຜະລິດທີ່ກ່ຽວຂ້ອງກັບແມງໄມ້ ຫລື ຂີ້ກະເດືອນ, ແຕ່ໄດ້ຮັບອະນຸຍາດກ່ຽວກັບການປຸງແຕ່ງໄມ້. ສ່ວນຢູ່ເມືອງສາ ມັກຄີໄຊ ມີ 2 ຈຸດ ອອກຊື່ເປັນບຸກຄົນລາວ 1 ຄົນຢູ່ບ້ານເຊກະໝານ ແລະ ອີກ 1 ຈຸດ ແມ່ນເປັນຂອງຄົນຈີນຢູ່ເຂດເວີນແຄນ.

       ​ຍ້ອນແນວນັ້ນ, ພະແນກກະສິກໍາ ແລະ ປ່າໄມ້ແຂວງ ຈຶ່ງອອກແຈ້ງການໃຫ້ຢຸດເຊົາການຂຸດຄົ້ນຂີ້ກະເດືອນແບບທຸລະກິດຊົ່ວຄາວກ່ອນ ເພື່ອກວດກາກ່ຽວກັບຜູ້ປະກອບການ ຫລື ບໍລິສັດທີ່ຢາກເກັບຊື້ຂີ້ກະເດືອນໃຫ້ລະອຽດ ແລະ ໃຫ້ເຂົາເຈົ້າມາຂຶ້ນທະບຽນເກັບຊື້ໃຫ້ຖືກຕ້ອງຕາມລະບຽບການ ເພື່ອໃຫ້ມີນິຕິກໍາຄຸ້ມຄອງຄັກແນ່ ເພາະນີ້ຖືເປັນເລື່ອງ

ໃໝ່ທີ່ເກີດຂຶ້ນ.

​       ຕາມການລາຍງານໃຫ້ຮູ້ວ່າ ຜູ້ປະກອບການເກັບຊື້ຂີ້ກະເດືອນປຽກ ຫລື ຂີ້ກະເດືອນເປັນ ລາຄາກິໂລລະ 20.000 ກີບ ແລະ ໂຕທີ່ຕາກແຫ້ງແລ້ວລາຄາກິໂລໜຶ່ງບໍ່ຫລຸດ 400.000 ກີບ ເຮັດໃຫ້ປະຊາຊົນຈໍານວນຫລາຍພາກັນໄປຂຸດຂີ້ກະເດືອນມາຂາຍ ໂດຍບໍ່ສົນວ່າເປັນຂີ້ກະເດືອນຢູ່ໃນເນື້ອທີ່ດິນຂອງບຸກຄົນ ຫລືນິຕິບຸກຄົນ, ຮ້າຍແຮງໄປກວ່ານັ້ນ ຍັງມີການມ້າງຮົ້ວໃນເນື້ອທີ່ດິນຂອງຄົນອື່ນແບບຊະຊາຍເພືອບຸກເຂົ້າໄປຂຸດເອົາຂີ້ກະເດືອນ.       ນອກຈາກນີ້ ຍັງມີການລັກເອົາໜາມໝາກຈັບທີ່ໃຊ້ເປັນຮົ້ວອ້ອມຕື່ມອີກ ເຮັດໃຫ້ພະນັກງານ ແລະ ປະຊາຊົນຈໍານວນບໍ່ໜ້ອຍທີ່ເປັນເຈົ້າຂອງດິນຮ້ອງຮຽນຫາພາກສ່ວນກ່ຽວຂ້ອງໃຫ້ຊ່ວຍແກ້ໄຂບັນຫາທີ່ເກີດຂຶ້ນ.

   ຢ່າງໃດກໍຕາມ, ປະຈຸບັນ ຍັງບໍ່ທັນຮູ້ແນ່ນອນເທື່ອວ່າຂີ້ກະເດືອນທີ່ຜູ້ປະກອບການຈະເກັບຊື້ມີສັບພະຄຸນຫຍັງ ແລະ ຈະສົ່ງອອກໄປໃສແທ້, ແຕ່ມີຜູ້ປະກອບການຜູ້ໜຶ່ງບອກວ່າຈະສົ່ງອອກໄປໄທແຕ່ກໍຍັງບໍ່ທັນຊັດເຈນເທື່ອ.

​ທ່ານກ່າວຢໍ້າວ່າ: ປະຈຸບັນ ປະຊາຊົນຍັງສາມາດຂຸດຄົ້ນຂີ້ກະເດືອນຕາມທໍາມະຊາດເພື່ອນໍາໃຊ້ເຂົ້າໃນການຊອກຢູ່ຫາກິນໄດ້ປົກກະຕິ, ແຕ່ການຂຸດຄົ້ນເພື່ອເປັນທຸລະກິດ ຫລື ຂາຍເປັນສິນຄ້າແມ່ນໃຫ້ໂຈະຊົ່ວຄາວ ເພາະຕ້ອງໄດ້ກວດກາເບິ່ງໃຫ້ລະອຽດວ່າຜູ້ປະກອບການທີ່ຈະເກັບຊື້ໄດ້ຮັບໃບອະນຸຍາດຫລືບໍ່, ຖ້າບໍ່ມີກໍຕ້ອງໄດ້ປະກອບໃຫ້ຖືກຕ້ອງຕາມລະບຽບການ. ສ່ວນເບື້ອງປະຊາຊົນ ຖ້າຈະຂຸດຄົ້ນເປັນທຸລະກິດຕ້ອງຮັບປະກັນວ່າບໍ່ກະທົບຕໍ່ສິ່ງແວດລ້ອມ ແລະ ສັງຄົມ ໂດຍສະເພາະຕ້ອງຮັບປະກັນວ່າຈະບໍ່ຂຸດຄົ້ນຢູ່ເນື້ອທີ່ດິນຂອງບຸກຄົນ ຫລື ນິຕິບຸກຄົນແບບຊະຊາຍຈົນສ້າງຄວາມເສຍຫາຍເກີດຂຶ້ນ.

​ຮອງເຈົ້າແຂວງອັດຕະປື ຢືນຢັນວ່າ: ພາຍຫລັງກວດກາສໍາເລັດ ແລະ ເຮັດໃຫ້ທຸກຂະບວນການເຂົ້າສູ່ລະບຽບການ ຫລື ຖືກຕ້ອງຕາມກົດໝາຍ, ອົງການປົກຄອງແຂວງພ້ອມທີ່ຈະສະໜັບສະໜູນທັງຜູ້ປະກອບການເກັບຊື້ ແລະ ປະຊາຊົນທີ່ຂຸດຄົ້ນ ເຊີ່ງອາດຈະສ້າງເປັນກຸ່ມເພື່ອຂຸດຄົ້ນຂີ້ກະເດືອນແລ້ວນໍາໄປຂາຍໃຫ້ຜູ້ປະກອບການ ຫລື ຖ້າຜູ້ປະກອບການຢາກສ້າງເປັນຟາມຂີ້ກະເດືອນກໍພ້ອມທີ່ຈະສະໜັບສະໜູນ. ແຕ່ຂະນະດຽວກັນຕ້ອງມີການຄຸ້ມຄອງການຂຸດຄົ້ນໃຫ້ເປັນລະບຽບຮຽບຮ້ອຍ ແລະ ຖືກຕ້ອງຕາມລະບຽບການທີ່ສຸດ.

• 29/09/2023