ໄຂກອງປະຊຸມສະໄໝສາມັນຂອງລັດຖະບານ ປະຈຳເດືອນກັນຍາ 2023 ຫາລື 9 ຫົວຂໍ້ສຳຄັນ

ກອງປະຊຸມສະໄໝສາມັນຂອງລັດຖະບານ ປະຈຳເດືອນກັນຍາ 2023 ໄດ້ໄຂຂຶ້ນວັນທີ 28 ກັນຍາ 2023 ທີ່ສຳນັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ; ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະບານ, ຜູ້ຕາງໜ້າກະຊວງ, ອົງການທຽບເທົ່າ ເຂົ້າຮ່ວມແບບເຊິ່ງໜ້າ; ການນໍາຂອງບັນດາແຂວງ ແລະນະຄອນຫຼວງວຽງຈັນ ເຂົ້າຮ່ວມຜ່ານລະບົບກອງປະຊຸມທາງໄກເພື່ອຮັບຟັງການລາຍງານສະພາບພົ້ນເດັ່ນ ປະຈຳເດືອນກັນຍາ ແລະທິດທາງແຜນການ ປະຈຳເດືອນຕຸລາ 2023.

ກອງປະຊຸມຄັ້ງນີ້ແມ່ນໄຂຂຶ້ນໃນທ່າມກາງສະພາບການສາກົນ ແລະພາກພື້ນຍັງສືບຕໍ່ຜັນແປຢ່າງສະຫຼັບຊັບຊ້ອນ ແລະພວມປະເຊີນໜ້າກັບຫຼາຍວິກິດການເປັນຕົ້ນ ບັນຫາຂໍ້ຂັດແຍ່ງ ທາງດ້ານເສດຖະກິດ, ການເມືອງ, ການຕ່າງ ປະເທດ, ການທະຫານ, ການຄ້າ, ເຕັກໂນໂລຊີ ແລະ ເກີດມີການປ່ຽນແປງທາງດ້ານການພົວພັນສາກົນ, ທາງດ້ານພູມມີລັດຖະສາດໄປເຖິງການເກີດການພົວພັນແບບຫຼາຍຂົ້ວ, ຫຼາຍກຸ່ມການເມືອງ, ການທະຫານ ແລະເສດຖະກິດເຮັດໃຫ້ສະພາບການໂດຍລວມ ຍັງມີການຜັນແປຢ່າງຄາດເດົາໄດ້ຍາກລວມທັງບັນຫາໄພພິບັດທາງທຳມະຊາດຕ່າງໆ, ເຊິ່ງທັງໝົດນັ້ນກໍເປັນສາເຫດປັດໄຈທີ່ສົ່ງຜົນກະທົບທາງກົງ ແລະ ທາງອ້ອມ ຕໍ່ການລົງທຶນ, ການຄ້າເຮັດໃຫ້ອັດຕາເງິນເຟີ້ຢູ່ໃນຫຼາຍປະເທດສູງຂຶ້ນໃນຮອບຫຼາຍປີ, ທັງສົ່ງຜົນກະທົບຊໍ້າເຕີມຢ່າງຊັດເຈນຕໍ່ການຟື້ນຕົວ ແລະ ຂະຫຍາຍຕົວທາງດ້ານເສດຖະກິດ-ການຄ້າ ຢູ່ຫຼາຍປະເທດໃນໂລກ. ສໍາລັບຢູ່ປະເທດເຮົາກໍ່ໄດ້ຮັບຜົນກະທົບທາງກົງ ແລະທາງອ້ອມຢ່າງຕໍ່ເນື່ອງໂດຍສະເພາະບັນຫາລາຄານໍ້າມັນໂລກ ທີ່ປັບສູງຂຶ້ນໄວບວກກັບຄວາມຕ້ອງການນຳໃຊ້ເງິນຕາຫຼາຍຂຶ້ນຈຶ່ງສົ່ງຜົນກະທົບຕໍ່ອັດຕາແລກປ່ຽນ, ອັດຕາເງິນເຟີ້ ແລະ ລາຄາສິນຄ້າ ມີການເໜັງຕີງແຮງ. ຕໍ່ກັບສະພາບການດັ່ງກ່າວ, ລັດຖະບານກໍ່ຄືຄະນະສະເພາະກິດ 19/ກມສພ ກໍໄດ້ວາງມາດຕະການຕ່າງໆ ເພື່ອແກ້ໄຂ ແລະໄດ້ຈັດຕັ້ງປະຕິບັດຢ່າງເຂັ້ມງວດໄປຄຽງຄູ່ກັບສຸມໃສ່ລົງເຄື່ອນໄຫວເຜີຍແຜ່ບັນດານິຕິກຳທີ່ກ່ຽວຂ້ອງກັບການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ຢູ່ບັນດາແຂວງທົ່ວປະເທດເພື່ອຮັບຮູ້, ເຂົ້າໃຈ ແລະປະຕິບັດຢ່າງເປັນເອກະພາບ. ຜ່ານການຈັດຕັ້ງປະຕິບັດຕົວຈິງເຫັນວ່າສາມາດເຮັດໃຫ້ອັດຕາເງິນເຟີ້ຖ້າທຽບໃສ່ຕົ້ນປີແມ່ນຫຼຸດລົງມາຕາມລຳດັບ, ໃນໄລຍະນີ້ ທຸກພາກສ່ວນກ່ຽວຂ້ອງຕ້ອງໄດ້ສືບຕໍ່ສຸມທຸກສະຕິປັນຍາ,ນຳໃຊ້ກໍາລັງແຮງຂອງທຸກພາກສ່ວນໃນສັງຄົມ ແລະຍົກສູງຄວາມຕັດສິນໃຈທາງການເມືອງທີ່ເປັນເອກະພາບກັນດ້ວຍຄວາມຮັບຜິດຊອບສູງເພື່ອແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ໃຫ້ຜ່ອນຄາຍລົງ ແລະເພື່ອເປົ້າໝາຍປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆ.

ກອງປະຊຸມລັດຖະບານຄັ້ງນີ້ຈະດໍາເນີນໃນລະຫວ່າງວັນທີ 28-29 ກັນຍາ 2023 ເຊິ່ງຈະໄດ້ພ້ອມກັນຄົ້ນຄວ້າ, ປຶກສາຫາລື ແລະປະກອບຄຳເຫັນດ້ວຍຄວາມເອົາໃຈໃສ່ ຕໍ່ 9 ຫົວຂໍ້ ດັ່ງນີ້:

1. ລາຍງານກ່ຽວກັບບົດສະຫຼຸບວຽກງານພົ້ນເດັ່ນປະຈຳເດືອນກັນຍາ ແລະທິດທາງແຜນການ ປະຈຳເດືອນຕຸລາ 2023 ຂອງລັດຖະບານ, ໃນນັ້ນລວມມີການລາຍງານຄວາມຄືບໜ້າ ການຈັດຕັ້ງປະຕິບັດວຽກງານສໍາຄັນ ຄື: ລາຍງານຄວາມຄືບໜ້າການແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ; ລາຍງານຄວາມຄືບໜ້າ ການຈັດຕັ້ງປະຕິບັດມະຕິວ່າດ້ວຍການຮັບຮອງ ແຜນຈັດຕັ້ງປະຕິບັດຕົວຈິງກ່ຽວກັບການປະຕິຮູບລັດວິສາຫະກິດ ສະບັບເລກທີ 10/ລບ, ລົງວັນທີ 15 ຕຸລາ 2021; ລາຍງານຄວາມຄືບໜ້າ ການຈັດຕັ້ງປະຕິບັດມະຕິ ວ່າດ້ວຍການຮັບຮອງແຜນປະຕິບັດຕົວຈິງກ່ຽວກັບການຄຸ້ມຄອງລາຍຮັບ-ລາຍຈ່າຍງົບປະມານເປັນທັນສະໄໝ ໃນໄລຍະ 5 ປີ (2021-2025) ສະບັບເລກທີ 09/ລບ, ລົງວັນທີ 08 ຕຸລາ 2021; ແລະລາຍງານຜົນກອງປະຊຸມການກະກຽມປີທ່ອງທ່ຽວລາວ ປີ 2024.
2. ລາຍງານກ່ຽວກັບການເຊົ່າ ແລະສຳປະທານຊັບສິນຂອງລັດ ຕາມແຈ້ງການ ສະບັບເລກທີ 1427/ຫສນຍ, ລົງວັນທີ 01 ສິງຫາ 2023.
3. ຮ່າງແຜນແມ່ບົດລະບົບພະຍາກອນ ແລະແຈ້ງເຕືອນໄພນໍ້າຖ້ວມລ່ວງໜ້າແຫ່ງຊາດ.
4. ຮ່າງບົດລາຍແຫ່ງຊາດ ປະຈຳໄລຍະທີ 7 ໃນການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ.
5. ຮ່າງດຳລັດ ວ່າດ້ວຍພາລະກອນ.
6. ຮ່າງດຳລັດ ວ່າດ້ວຍການຫັນຫົວໜ່ວຍບໍລິຫານວິຊາການເປັນເຈົ້າຕົນເອງ.
7. ຮ່າງຍຸດທະສາດແຫ່ງຊາດ ວຽກການບໍລິການຜ່ານກົນໄກປະຕູດຽວ ຮອດປີ 2030.
8. ຮ່າງດຳລັດ ວ່າດ້ວຍການປັບໄໝ ແລະນຳໃຊ້ມາດຕະການອື່ນຕໍ່ຜູ້ລະເມີດກົດໝາຍ ແລະລະບຽບການບິນພົນລະເຮືອນ.
9. ຮ່າງດຳລັດ ວ່າດ້ວຍການຄຸ້ມຄອງສິນຄ້າສອງດ້ານ.
ໃນໂອກາດກ່າວເປີດກອງປະຊຸມ, ທ່ານນາຍົກລັດຖະມົນຕີໄດ້ຮຽກຮ້ອງບັນດາທ່ານທີ່ເຂົ້າຮ່ວມກອງປະຊຸມຈົ່ງໄດ້ພ້ອມກັນເອົາໃຈໃສ່ຄົ້ນຄວ້າ ແລະປະກອບຄໍາເຫັນຢ່າງເລິກເຊິ່ງຕໍ່ບັນດາຫົວຂໍ້ທີ່ນຳມາພິຈາລະນາດ້ວຍການສະເໜີທັດສະນະຢ່າງກົງໄປກົງມາ, ກະທັດຮັດ, ມີຈຸດສຸມ ແລະມີທາງອອກທີ່ຈະແຈ້ງເພື່ອເຮັດໃຫ້ກອງປະຊຸມລັດຖະບານຄັ້ງນີ້ໄດ້ຮັບຜົນສຳເລັດຕາມຈຸດປະສົງ ແລະຄາດໝາຍທີ່ກຳນົດໄວ້ ແນໃສ່ເຮັດໃຫ້ຜົນຂອງກອງປະຊຸມໄດ້ຮັບການຈັດຕັ້ງປະຕິບັດຢ່າງເປັນຮູບປະທໍາ ແລະ ມີປະສິດທິຜົນ.
ພາບ-ຂ່າວ: ກົມປະຊາສຳພັນ ຫສນຍ.

แชร์