ຖວທ ແຂວງຫລວງພະບາງ ແລະສະຖາບັນຂົງຈື ລົງນາມຮ່ວມມືວຽກງານຫລາຍດ້ານ

ພິທີເຊັນບົດບັນທຶກ ການຮ່ວມມື ລະຫວ່າງ ພະແນກ ຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງຫຼວງພະບາງ (ຖວທຂ) ແລະສະຖາບັນຂົງຈື ມະຫາວິທະຍາໄລ ສຸພານຸວົງ ໄດ້ຈັດຂຶ້ນ ວັນທີ 26 ກັນຍາ 2023 ທີ່ພະແນກ ຖວທ ໂດຍມີ ທ່ານ ປອ ນາງ ສຸດາພອນ ຄົມທະວົງ ຫົວໜ້າພະແນກ ຖວທ, ທ່ານ ຊົ້ງ ມິ່ນ ຍິ່ງ ອໍານວຍການສະຖາບັນຂົງຈື ພ້ອມດ້ວຍຄະນະ ແລະຂະແໜງການກ່ຽວຂ້ອງຂອງພະແນກ ຖວທ ເຂົ້າຮ່ວມ.

ກ່ອນຫນ້ານີ້ພະແນກ ຖວທຂ ແລະສະຖາບັນຂົງຈື ໄດ້ມີການປຶກສາຫາລືກັນ ແລະຈະຮ່ວມມືກັນ 4 ກິດຈະກໍາ ຄື: ຈະຝຶກອົບຮົມໃຫ້ພະນັກງານລັດຖະກອນພາຍໃນພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ ແຂວງຫຼວງພະບາງ, ໃນເງື່ອນໄຂທີ່ເອື້ອຍອໍານວຍຄວາມສະດວກໃນຫົວຂໍ້ຝຶກອົບຮົມ “ ພາສາຈີນ ສໍາລັບການທ່ອງທ່ຽວ ” ຈະຊ່ວຍແປພາສາ ແລະກວດແກ້ຂໍ້ມູນ ເຊັ່ນ: ປຶ້ມຄູ່ມືການທ່ອງທ່ຽວ, ປ້າຍທ່ອງທ່ຽວເປັນພາສາຈີນ ໃຫ້ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ ແຂວງຫຼວງພະບາງ; ຈະນໍາໃຊ້ຊັບພະຍາກອນດ້ານການຮຽນ, ສະຖານທີ່ ແລະອຸປະກອນຕ່າງໆຮ່ວມກັນ; ຈະຮ່ວມກັນຈັດກອງປະຊຸມ, ງານສໍາມະນາວິຊາການ, ກິດຈະກໍາດ້ານວັດທະນະທໍາ ແລະກິດຈະກໍາດ້ານການທ່ອງທ່ຽວ ແລະກິດຈະກໍາອື່ນໆ.

ສໍາລັບພະແນກ ຖວທ ແມ່ນເຫັນດີສົ່ງພະນັກງານລັດຖະກອນພາຍໃນພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ ແຂວງຫຼວງພະບາງ ເຂົ້າຮ່ວມຝຶກອົບຮົມພາສາຈີນ ແລະກິດຈະກໍາທີ່ສະຖາບັນຂົງຈືຈັດຂຶ້ນໃນເງື່ອນໄຂທີ່ເໝາະສົມ;ເປັນຕົ້ນແມ່ນການຈັດກອງປະຊຸມສໍາມະນາດ້ານວັດທະນະທໍາ ແລະການທ່ອງທ່ຽວ. ພ້ອມດຽວກັນນີ້ທັງສອງຝ່າຍກໍໄດ້ເປັນເອກະພາບກັນໃນການຈັດຕັ້ງປະຕິບັດບັນດາກິດຈະກໍາທີ່ລະບຸໄວ້ ໂດຍຕ່າງຝ່າຍຕ່າງໄດ້ຮັບຜົນປະໂຫຍດ ແລະໃຫ້ການສະໜັບສະໜູນເຊື່ງກັນ ແລະກັນ, ພາຍໃນໄລຍະເວລາ 2 ປີ, ເມື່ອເຖິງກໍານົດທັງສອງຝ່າຍຈະປຶກສາຫາລືໃນການປັບປຸງເນື້ອໃນສັນຍາໃຫ້ແທດເໝາະກັບສະພາບຄວາມເປັນຈິງ ແລະສືບຕໍ່ການຮ່ວມມືຕື່ມອີກ.

ຮ່ວມລົງນາມໃນບົດບັນທຶກຄັ້ງນີ້ມີທ່ານ ປອ ນາງ ສຸດາພອນ ຄົມທະວົງ ຫົວໜ້າພະແນກ ຖວທ ແລະ ທ່ານ ຊົ້ງ ມິ່ນ ຍິ່ງ ອໍານວຍການສະຖານບັນຂົງຈື ມະຫາວິທະຍາໄລ ສຸພານຸວົງ ໂດຍຊ້ອງໜ້າຜູ້ເຂົ້າຮ່ວມໃນພິທີດັ່ງກ່າວ.
ພາບ-ຂ່າວ: ເພັດສາຄອນ ສິມມະວົງ
ບັນນາທິການ: ມະນີວັນ ສຸດຕະພົງ

แชร์