ເປີດອະນຸສອນສະຖານທ່ານ ໜູຮັກ ພູມສະຫວັນ ຢ່າງເປັນທາງການ

  ເປີດໃຫ້ຢ້ຽມຊົມຢ່າງເປັນທາງການແລ້ວອະນຸສອນສະຖານ ທ່ານ ໜູຮັກ ພູມສະຫວັນ ທັງນີ້ກໍເພື່ອເປັນການຈາລຶກຄຸນງາມຄວາມດີ ແລະຜົນງານອັນໃຫຍ່ ຫຼວງຂອງທ່ານຊຶ່ງເປັນໜຶ່ງໃນບັນດາຜູ້ນໍາຮຸ່ນທໍາອິດຂອງການປະຕິວັດລາວໃຫ້ຍືນຍົງຊຶ່ງຈະກາຍເປັນບ່ອນສຶກສາອົບຮົມທາງດ້ານການເມືອງ-ແນວຄິດ ແລະເປັນບ່ອນສຶກສາຄົ້ນຄວ້າຮໍ່າຮຽນຂອງຄົນລຸ່ນໃໝ່ໃນອະນາຄົດ.

  ພິທີເປີດອະນຸສອນສະຖານ ທ່ານ ໜູຮັກ ພູມສະຫວັນ ຈັດຂຶ້ນຢ່າງເປັນທາງການໃນວັນທີ 9 ເມສາຜ່ານມາທີ່ບ້ານສະພານທອງເໜືອ ເມືອງສີສັດຕະນາກ ນະຄອນຫຼວງວຽງຈັນ ເປັນກຽດເຂົ້າຮ່ວມໃນພິທີໂດຍ ທ່ານ ບຸນຍັງ ວໍລະຈິດ ປະທານປະເທດພ້ອມນີ້ກໍມີບັນດາການນຳພັກ-ລັດ, ອະດີດການນໍາຂັ້ນສູງ, ພະ ນັກງານອາວຸໂສບໍານານ, ແຂກຖືກເຊີນເຂົ້າຮ່ວມຢ່າງພ້ອມພຽງໂດຍການເປີດອະນຸສອນສະຖານຄັ້ງນີ້ຍັງເປັນການສະເຫຼີມສະຫຼອງວັນເກີດທ່ານ ໜູຮັກ ພູມ ສະຫວັນ ຄົບຮອບ 105 ປີ (9 ເມສາ 1914-9 ເມສາ 2019) ນໍາອີກ.

  ທ່ານ ໜູຮັກ ພູມສະຫວັນ ແມ່ນໜຶ່ງໃນບັນດາຜູ້ນໍາຮຸ່ນທໍາອິດຂອງການປະຕິວັດລາວທີ່ຕໍ່ສູ້ຄຽງບ່າຄຽງໄຫຼ່ຮ່ວມກັບປະທານ ໄກສອນ ພົມວິຫານ ແຕ່ຫົວ ທີ, ທ່ານເປັນຜູ້ນໍາທີ່ແສນປະເສີດ, ເປັນລູກຮັກຫຼານແພງຂອງປະຊາຊົນລາວບັນດາເຜົ່າ, ເປັນຜູ້ນໍາທີ່ມີຄວາມວິຊາສາມາດ, ສະຫຼາດສ່ອງໃສ, ອຸທິດເຫື່ອແຮງ, ກໍາລັງວັງຊາ, ສະຕິປັນຍາຮ່ວມກັບບັນດາທ່ານຜູ້ນໍາການປະຕິວັດໃນການຊີ້ນໍາຂະບວນການຕໍ່ສູ້ປົດປ່ອຍຊາດ. 

  ດ້ວຍຄຸນງາມຄວາມດີ ແລະຜົນງານອັນໃຫຍ່ຫຼວງຂອງທ່ານ ໜູຮັກ ພູມສະຫວັນ ທີ່ໄດ້ອຸທິດຕະຫຼອດຊີວິດໃຫ້ແກ່ພາລະກິດປະຕິວັດ, ເພື່ອສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນຂອງພັກ-ລັດ ແລະປະຊາຊົນລາວບັນດາເຜົ່າທີ່ມີຕໍ່ທ່ານ, ພັກ-ລັດ ຈຶ່ງໄດ້ຕົກລົງສ້າງ ແລະອະນຸລັກຮັກສາອະນຸສອນສະຖານທີ່ຂອງທ່ານ ໜູຮັກ ພູມສະຫວັນ ທີ່ບ້ານສະພານທອງເໜືອ, ເມືອງສີສັດຕະນາກ, ນະຄອນຫຼວງວຽງຈັນ ຊຶ່ງເປັນບ່ອນທີ່ເພິ່ນໄດ້ດໍາລົງຊີວິດໃນໄລຍະປະເທດຊາດດໍາເນີນພາລະກິດປົກປັກຮັກສາ ແລະສ້າງສາພັດທະນາປະເທດຊາດນັບແຕ່ປີ 1975-2008 ເປັນເວລາ 33 ປີ.

  ອະນຸສອນສະຖານດັ່ງກ່າວເປັນສະຖານທີ່ທ່ອງທ່ຽວທາງປະຫວັດສາດທີ່ມີຄວາມໝາຍສໍາຄັນຊຶ່ງຈະກາຍເປັນບ່ອນສຶກສາອົບຮົມທາງດ້ານການເມືອງ-ແນວຄິດ, ເປັນບ່ອນສຶກສາຄົ້ນຄວ້າຮໍ່າຮຽນຂອງພະນັກງານການນໍາຫຼັກແຫຼ່ງ, ສະມາຊິກພັກ, ພະນັກງານ-ລັດຖະກອນ, ນັກຮຽນຮູ້, ນັກສຶກສາ ແລະ ປະຊາຊົນບັນດາເຜົ່າຕະຫຼອດຮອດແຂກທັງພາຍໃນ-ຕ່າງປະເທດ. ເວລາເປີດບໍລິການແມ່ນທຸກໆວັນອັງຄານ ຫາ ວັນອາທິດ, ຕອນ ເຊົ້າເວລາ 8:00-12:00ໂມງ, ຕອນບ່າຍເວລາ 13:00-16:00ໂມງ.

ຂ່າວ: ແສງຈັນ   

แชร์