ທ່ານ ຫຸມພັນ ແກ້ວອຸ່ນຄໍາ, ຮັກສາການຜູ້ອຳນວຍການສູນສົ່ງເສີມການສຶກສາຮຽນຮ່ວມ, ກະຊວງສຶກສາ ແລະກິລາ ໄດ້ຮັບທຶນຄົ້ນຄ້ວາປະລິນຍາເອກ (ປອ) ສາຂາວິທະຍາສາດການເມືອງ ແລະການພົວພັນຕ່າງປະເທດ ທີ່ ສປ ຈີນ ໄດ້ໃຫ້ສຳພາດວ່າ: ໃນສະພາບການເສດຖະກິດ - ການການເມືອງໃນພາກພື້ນ ແລະສາກົນທີ່ມີການຜັນແປໄປຢ່າງບໍ່ຢຸດຢັ້ງເຊິ່ງໄດ້ສ້າງແຮງບັນດານໃຈໃຫ້ນັກສຶກສາລາວຈຳນວນບໍ່ໜ້ອຍໄດ້ຕັດສິນໃຈໄປສຶກສາຕໍ່ລະດັບປະລິນຍາເອກ, ປະລິນຍາໂທ ແລະປະລິນຍາຕີ ໃນສາຂາວິທະຍາສາດການເມືອງ ແລະການພົວພັນຕ່າງປະເທດ, ການເງິນ ແລະການຄ້າ ທີ່ມະຫາວິທະຍາໄລທຸລະກິດ ແລະ ເສດຖະກິດ ສາກົນ University of International Business and Economics ຫຼື UIBE ທີ່ ນະຄອນຫຼວງປັກກິ່ງ, ສປ ຈີນ ແມ່ນມີຄວາມໝາຍສຳຄັນ ແລະ ມີສິ່ງທ້າທາຍບາງດ້ານ ແລະ ຈະເອົາຊະນະອຸປະສັກຕ່າງໆເຊັ່ນສະພາບມີການແຂ່ງຂັນສູງ, ປັບຕົວເຂົ້າກັບສະພາບການລ້ອມໃໝ່ ແລະ ບາງຄັ້ງກໍ່ຕ້ອງໄດ້ອຶດຫຼັບອຶດນອນ, ແຕ່ມັນເປັນປະສົບການອັນລໍ້າຄ່າ ທີ່ສຸດໃນຊີວິດຂອງພວກເຮົາ.
ການສຶກສາຢູ່ UIBE ມີທັງຄວາມຫຍຸ້ງຍາກ ແລະກໍ່ມີຄວາມຍຸຕິທໍາລວມທັງການປັບຕົວເຂົ້າກັບວັດທະນະທໍາໃໝ່, ການຮຽນຮູ້ພາສາໃໝ່ ແລະການປັບຕົວເຂົ້າກັບລະບຽບທາງວິຊາການທີ່ເຄັ່ງຄັດ;ເສັ້ນທາງເດີນສາຍນີ້ອາດຈະຫຍຸ້ງຍາກ, ແຕ່ແນ່ນອນເມື່ອຜ່ານສິ່ງທ້າທາຍເຫຼົ່ານີ້ແລ້ວກໍ່ຈະເຮັດໃຫ້ນັກສຶກສາລາວມີທັກສະ-ຄວາມສາມາດ ແລະປະສົບຜົນສຳເລັດ ດັ່ງທີ່ໄດ້ຕັ້ງໃຈຂອງພວກເຮົາຊຶ່ງໄດ້ຮັບສິ່ງແຮງບັນດານໃຈ ແລະມີຄວາມມຸ້ງມາດປາຖະໜາຈະນຳເອົາບົດຮຽນຈາກຕ່າງປະເທດມາປະກອບສ່ວນເຂົ້າການພັດທະນາບ້ານເກີດເມືອງນອນຂອງພວກເຮົາ ແລະປະຊາຄົມໂລກ.
ລາງວັນ ແລະ ສິ່ງຕອບແທນຕໍ່ຄວາມພະຍາຍາມແມ່ນມີຫຼາຍ ຄື: UIBE ໃຫ້ບົດຮຽນ ແລະຄວາມຮູ້ໃນລະດັບສາກົນ, ໃຫ້ໂອກາດການຄົ້ນຄວ້າວິໄຈ ແລະ ຍັງໄດ້ແລກປ່ຽນບົດຮຽນນຳນັກສຶກສາ ທີ່ມາຈາກຫຼາຍປະເທດ; ໃນສະ ພາບແວດລ້ອມອັນນີ້ ໄດ້ຊຸກຍູ້ໃຫ້ມີການແລກປ່ຽນຄວາມຄິດຄວາມເຫັນ ແລະ ເຮັດໃຫ້ມີຄວາມເຂົ້າໃຈເລິກເຊິ່ງກ່ຽວກັບເສດຖະກິດ, ການຄ້າ ແລະ ການເມືອງຂອງໂລກ, ໄດ້ເຮັດໃຫ້ພວກເຮົາ ມີທັກສະ ແລະ ຄວາມສາມາດໃນການວິເຄາະວິໄຈບັນຫາດັ່ງກ່າວ; ຍິ່ງໄປກວ່ານັ້ນ, ພວກເຮົາຍັງໄດ້ຮຽນຮູ້ ແລະປະສົບການຈາກວັດທະນະທຳ ແລະຮີດຄອງປະເພນີ ແລະປະຫວັດສາດຂອງ ສປ ຈີນ ອັນຍາວນານ ທີ່ສຸດຂອງໂລກ ເຊິ່ງມີບົດບາດອັນສຳຄັນຫຼາຍ ຕໍ່ກັບສະພາບການປ່ຽນແປງດ້ານເສດຖະກິດ, ການຄ້າ ແລະການເມືອງຂອງໂລກ.
ໃນຖານະນັກສຶກສາລາວ ທີ່ໄດ້ລົງເລິກສາຂາວິຊາ ທີ່ເລືອກຢູ່ UIBE ແລະຈະກາຍເປັນບຸກຄະລາກອນທີ່ມີຄຸນນະພາບ ແລະເປັນຜູ້ສືບທອດພາລະກິດຂອງປະເທດຊາດໃນອະນາຄົດ ພາຍຫຼັງທີ່ສໍາເລັດ ແລະ ກັບຄືນປະເທດລາວ ພ້ອມກັບຄວາມຮູ້ - ປະສົບການ ທີ່ຫາໄດ້ຍາກໃນຊີວິດ ແລະປະກອບເຂົ້າໃນການສ້າງນະໂຍບາຍຕ່າງໆ ເພື່ອຊຸກຍູ້ສົ່ງເສີມການຮ່ວມມືດ້ານການສຶກສາ, ເສດຖະກີດ, ການຄ້າ ແລະການຮ່ວມມືກັບຕ່າງປະເທດປະກອບສ່ວນເຂົ້າໃນການຮັກສາສັນຕິພາບ ແລະ ຄວາມຈະເລີນຮຸ່ງເຮືອງຂອງປະເທດຊາດ ແລະ ໃນໂລກ.
ທ່ານ ຫຸມພັນ ແກ້ວອຸ່ນຄໍາ ໄດ້ສະຫຼຸບໄວ້ວ່າ: ເສັ້ນທາງແຫ່ງການຮຽນຮູ້ຂອງນັກສຶກສາລາວທີ່ຮຽນສາຂາເສດຖະກິດ, ການຄ້າ ແລະວິທະຍາສາດການເມືອງ ແລະ ການພົວພັນຕ່າງປະເທດ ຢູ່ UIBE ແມ່ນມີຄວາມທ້າທາຍຢ່າງແນ່ນອນ, ແຕ່ກໍ່ໄດ້ບົດຮຽນ ແລະ ປະສົບການອັນອັນລໍ້າຄ່າ ທີ່ສຸດເຊັ່ນກັນ; ບັນດາທ່ານອາຈານ ກໍ່ມີຄວາມເຫັນອົກເຫັນໃຈນັກສຶກສາ, ບວກກັບການສຶກສາທີ່ຢູ່ໃນລະດັບສາກົນອີກ, ຖືວ່າພວກເຮົາໄດ້ເປັນຕົວກະຕຸ້ນໃຫ້ແກ່ການປ່ຽນແປງໃນທາງບວກໃນເວທີສາກົນ ແລະເປັນການປະກອບສ່ວນເພີ່ມທະວີການພົວພັນ ແລະການຮ່ວມມື ລະຫວ່າງ ສປ ຈີນ ແລະ ສປປ ລາວ ນໍາອີກດ້ວຍ.
ໃນໂອກາດນີ້; ທ່ານ ຫຸມພັນ ແກ້ວອຸ່ນຄໍາ ໃນນາມນັກສຶກສາ ທີ່ໄດ້ຮັບທຶນຄົ້ນຄ້ວາປະລິນຍາເອກທີ່ມະຫາວິທະຍາໄລ UIBE ໄດ້ກ່າວສະແດງຄວາມຮູ້ບຸນຄຸນເປັນຢ່າງສູງ ມາຍັງການນໍາພັກ, ລັດ; ຄະນະພັກ-ຄະນະນໍາກະຊວງສຶກສາກໍ່ຄືລັດຖະບານ ສປ ຈີນ ໂດຍສະເພາະບັນດາຄະນະນໍາ - ອາຈານ ແລະທຸກພາກສ່ວນທີ່ໄດ້ໃຫ້ການສະໜັບສະໜູນ ແລະສ້າງເງື່ອນໄຂຫຼາຍດ້ານໃຫ້ແກ່ຂ້າພະເຈົ້າ ແລະ ນັກສຶກສາລາວທີ່ມີໂອກາດໄດ້ເຂົ້າສຶກສາ ແລະ ຄົ້ນຄ້ວາໃນສະຖາບັນການສຶກສາລະດັບສູງຂອງຊາດ ສປ ຈີນ ໃນຄັ້ງນີ້ ແລະພວກຂ້າພະເຈົ້າ ຂໍພ້ອມກັນບຸກບືນສູ້ຊົນຜ່ານຜ່າໃຫ້ສົມກັບຄວາມໄວ້ເນື້ອເຊື່ອໝັ້ນຈາກການຈັດຕັ້ງຂັ້ນເທິງ ແລະຄອບຄົວ ແລະໃຫ້ໄດ້ມາເຖິງຜົນສໍາເລັດຢ່າງສະຫງ່າງາມ.
ໂດຍ: ຣັດສະໝີ ດວງສັດຈະ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |