ລົດໄຟລາວ-ຈີນ ຂົນສົ່ງໂດຍສານໄດ້ 1,7 ລ້ານກວ່າເທື່ອຄົນ ພາຍໃນເວລາ 8 ເດືອນ

ໃນໄລຍະ 8 ເດືອນກວ່າ ຕົ້ນປີ 2023 ລົດໄຟ ລາວ-ຈີນ ໄດ້ບັນລຸຂົນສົ່ງໂດຍສານຈຳນວນ 1.759.900 ເທື່ອຄົນ ເພີ່ມຂຶ້ນ 103,7% ເມື່ອທຽບໃສ່ໄລຍະດຽວກັນຂອງປີ 2022, ຂົນສົ່ງໂດຍສານສະເລ່ຍ 6.768 ຄົນ/ມື້.

ທ່ານ ອານົງເດດ ເພັດໄກສອນ ຮອງຜູ້ອໍານວຍການ ບໍລິສັດທາງລົດໄຟລາວ-ຈີນ ໃຫ້ສໍາພາດຕໍ່ສື່ມວນຊົນລາວ-ຈີນ ເມື່ອບໍ່ດົນມານີ້ວ່າ: ນັບແຕ່ມື້ເປີດດຳເນີນການທາງລົດໄຟ ລາວ-ຈີນ ມາຮອດວັນທີ 17 ກັນຍາ 2023 ໄດ້ຂົນສົ່ງຜູ້ໂດຍສານທັງໝົດຈຳນວນ 3.197.600 ຄົນ, ສະເລ່ຍ 4.889 ຄົນ/ມື້ ແລະສະຖິຕິສູງສຸດ 10.197 ຄົນ/ມື້. ໃນນັ້ນ,ໃນໄລຍະ 8 ເດືອນກວ່າ ຕົ້ນປີ 2023 ລົດໄຟລາວ-ຈີນ ໄດ້ບັນລຸຂົນສົ່ງໂດຍສານຈຳນວນ 1.759.900 ເທື່ອຄົນເພີ່ມຂຶ້ນ 103,7% ເມື່ອທຽບໃສ່ໄລຍະດຽວກັນຂອງປີ 2022, ຂົນສົ່ງໂດຍສານສະເລ່ຍ 6.768 ຄົນ/ມື້.

ພ້ອມນັ້ນ, ນັບແຕ່ໄດ້ເປີດດໍາເນີນການຂະບວນລົດໄຟຂ້າມແດນໃນວັນທີ 13 ເມສາ ປີ 2023 ເປັນຕົ້ນມາໄດ້ຂົນສົ່ງຜູ້ໂດຍສານຂ້າມແດນບັນລຸໄດ້ 61.698 ຄົນ. ໃນນັ້ນ, ຜູ້ໂດຍສານເດີນທາງອອກນອກປະເທດຈຳນວນ 31.781 ຄົນ, ສະເລ່ຍ 201 ຄົນ/ມື້ ແລະ ຜູ້ໂດຍສານທີ່ເດີນທາງເຂົ້າມາລາວຈຳນວນ 29.917 ຄົນ, ສະເລ່ຍ 190 ຄົນ/ມື້.
ທີ່ມາ: ຫນັງສືພິມປະຊາຊົນ

แชร์