ເປີດກິດຈະກຳຂາຍສິນຄ້າຫຼຸດລາຄາ

ວັນທີ 26 ກັນຍາ 2023, ກະຊວງອຸດສາຫະກຳ ແລະການຄ້າ ໄດ້ຈັດພິທີເປີດກິດຈະກຳຂາຍສິນຄ້າຫຼຸດລາຄາ ໂດຍເຂົ້າຮ່ວມຂອງ ທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກຳ ແລະການຄ້າ, ມີບັນດາຫົວໜ້າກົມ, ຮອງຫົວໜ້າກົມອ້ອມຂ້າງກະຊວງອຸດສາຫະກຳ ແລະການຄ້າ, ຫົວໜ້າພະແນກອຸດສາຫະກຳ ແລະການຄ້າ ນະຄອນຫຼວງວຽງຈັນ, ຫົວໜ້າຫ້ອງການອຸດສາຫະກຳ ແລະການຄ້າເມືອງ ໃນນະຄອນຫຼວງວຽງຈັນ, ພາກສ່ວນອື່ນທີ່ກ່ຽວຂ້ອງ ແລະຕາງໜ້າບັນດາຫົວໜ່ວຍທຸລະກິດທີ່ເຂົ້າຮ່ວມ.

ຈຸດປະສົງເພື່ອຈັດຕັ້ງ ແລະຜັນຂະຫຍາຍມະຕິຕົກລົງຂອງກົມການເມືອງສູນກາງພັກ ສະບັບເລກທີ 19/ກມສພ ແລະເພື່ອສືບຕໍ່ຈັດຕັ້ງປະຕິບັດຕາມດຳລັດເລກທີ 474/ນຍ, ລົງວັນທີ 18 ພະຈິກ 2010 ວ່າດ້ວຍການຄຸ້ມຄອງລາຄາສິນຄ້າ ແລະຄ່າບໍລິການ ໃຫ້ບັນລຸຜົນສຳເລັດຕາມລະດັບຄາດໝາຍທີ່ໄດ້ວາງໄວ້, ດັ່ງທີ່ພວກເຮົາໄດ້ຮັບຮູ້ນຳກັນແລ້ວວ່າ, ປະຈຸບັນສະພາບເສດຖະກິດ ໃນປະເທດເຮົາເວົ້າລວມ ເວົ້າ ສະເພາະກໍ່ຄືຢູ່ນະຄອນຫຼວງວຽງຈັນ ແມ່ນໄດ້ຮັບຜົນກະທົບ ທີ່ມາຈາກຫຼາຍປັດໃຈ ລວມທັງຢູ່ພາຍໃນ ແລະຈາກຕ່າງປະເທດເມື່ອທຽບໃສ່ໃນຊຸມປີຜ່ານມາ, ຊຶ່ງໄດ້ເຮັດໃຫ້ສະພາບເງິນກີບລາວອ່ອນຄ່າລົງ, ອັດຕາເງິນເຟີ້ເພີ່ມຂື້ນ ແລະເຮັດໃຫ້ລາຄາສິນຄ້າຫລາຍລາຍການໄດ້ປັບຕົວສູງຂື້ນໄປຕາມກັນ, ຊຶ່ງສົ່ງຜົນ ກະທົບຕໍ່ຄ່າຄອງຊີບຂອງປະຊາຊົນລາວໂດຍສະເພາະຕໍ່ຄອບຄົວຜູ້ທີ່ມີລາຍຮັບຕໍ່າ, ແຕ່ເຖິງຢ່າງໃດກໍ່ຕາມພັກ ແລະລັດຖະບານກໍ່ໄດ້ມີຄວາມພະຍາຍາມຄົ້ນຄວ້າຊອກຫາທຸກວິທີທາງເພື່ອສຸມໃສ່ການແກ້ໄຂສະພາບດັ່ງກ່າວ.

ການຈັດກິດຈະກຳຂາຍສິນຄ້າຫຼຸດລາຄາໃນຄັ້ງນີ້ແມ່ນເປັນກິດຈະການໜຶ່ງເພື່ອແກ້ໄຂສະພາບເຄັ່ງຮ້ອນດັ່ງກ່າວ ແລະປະຕິບັດຕາມນະໂຍບາຍຂອງຄະນະ 19/ກມສພ ກໍ່ຄືນະໂຍບາຍຂອງພັກ ແລະ ລັດຖະບານ ເພື່ອຊ່ວຍແບ່ງເບົາຄ່າຄອງຊີບຂອງປະຊາຊົນ, ຊຶ່ງຈະປະກອບສ່ວນໃນການຊຸກຍູ້ແກ້ໄຂ ສະພາບສິນຄ້າທີ່ມີລາຄາແພງໃນປະຈຸບັນ, ທັງຊ່ວຍກຸ່ມເປົ້າໝາຍບັນດາພະນັກງານ-ລັດຖະກອນ, ທະຫານ-ຕຳຫຼວດ, ກຳມະກອນ ແລະປະຊາຊົນລາວບັນດາເຜົ່າ ເປັນຕົ້ນແມ່ນຜູ້ທີ່ຂາດເຂີນ ແລະມີລາຍຮັບຕໍ່າ.

ສໍາລັບເງື່ອນໄຂຂອງຜູ້ຊື້: ຕ້ອງໄດ້ລົງທະບຽນກ່ອນການຊື້ (ເພື່ອໃຫ້ຮູ້ກຸ່ມອາຊີບຂອງຜູ້ຊື້), ຊື້ສິນຄ້າຕາມລາຄາ ແລະປະລິມານທີ່ໄດ້ກຳນົດ, ການທີ່ກຳນົດເງື່ອນໄຂຂອງຜູ້ຊື້ຄືແນວນັ້ນເພື່ອເປັນການເກັບກຳກຸ່ມເປົ້າໝາຍ,ເຮັດໃຫ້ມີຄວາມເປັນລະບຽບຮຽບຮ້ອຍ ແລະປະລິມານຂອງຜູ້ຊື້ສິນຄ້າໄດ້ຫຼາຍຄົນ (ສິນຄ້າມີຈຳນວນຈຳກັດ), ກິດຈະກໍາດັ່ງກ່າວແມ່ນການຂາຍແບບເຄື່ອນທີ່ (ເອົາສິນຄ້າໃສ່ລົດໄປຂາຍໃນແຕ່ລະຈຸດ) ແລະ ເລີ່ມແຕ່ວັນທີ 26-30 ກັນຍາ 2023 ເປັນເວລາ 5 ວັນ (ວັນອັງຄານເຖິງວັນເສົາ), ມີຈໍານວນສິນຄ້າ 7 ລາຍການ (ໝີໄວໄວ, ນໍ້າປາ, ນໍ້າສະອິ້ວ, ນໍ້າມັນພືດ, ແປ້ງນົວ, ນໍ້າມັນຫອຍ ແລະ ນໍ້າຢາລ້າງຈານ), ໃນຈຸດຂາຍ ຈຳນວນ 17ຈຸດ ໃນ 5 ເມືອງ (ສີສັດຕະນາກ, ຈັນທະບູລີ, ໄຊເສດຖາ, ນາຊາຍທອງ ແລະປາກງື່ມ), ສິນຄ້າຂາຍແຕ່ລະຈຸດລະ 108ຊຸດ ແລະຈະໄດ້ຄົ້ນຄວ້າຂະຫຍາຍກິດຈະກໍາດັ່ງກ່າວໃຫ້ສູ່ແຂວງອື່ນໆ ແລະຈຸດອື່ນໆ ທີ່ມີເງື່ອນໄຂ.

แชร์