ຖວທ ນວ ເຄື່ອນໄຫວຊຸກຍູ້ ແລະສົ່ງເສີມການສ້າງລາຍການທ່ອງທ່ຽວ

ພະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວ ນະຄອນຫຼວງວຽງຈັນ (ຖວທ ນວ) ນໍາໂດຍທ່ານ ນາງ ວິໄລວອນ ຈັນທະລາຕີ ຫົວໜ້າພະແນກ ຖວທ ນວ ໄດ້ນໍາພາຄະນະບໍລິຫານສະມາຄົມທຸລະກິດທ່ອງທ່ຽວ ກຸ່ມທຸລະ ກິດທ່ອງທ່ຽວ ນວ ແລະຜູ້ປະກອບການທຸລະກິດດ້ານການທ່ອງທ່ຽວທີ່ຂຶ້ນທະບຽນຢູ່ ນວ ເຄື່ອນໄຫວຢ້ຽມຢາມ ແລະສໍາຫຼວດແຫຼ່ງທ່ອງທ່ຽວນໍ້າປຽນຢໍລະປາ ເມືອງປາກງື່ມ.

ທ່ານນາງ ວິໄລວອນ ຈັນທະລາຕີ ກ່າວວ່າ: ການມາຢ້ຽມຢາມ ແລະສໍາຫຼວດແຫຼ່ງທ່ອງທ່ຽວນໍ້າປຽນຢໍລະປາຄັ້ງນີ້ເພື່ອສໍາຫຼວດສະຖານທີ່ ແລະກິດຈະກໍາຕົວຈິງລວມທັງຄວາມໜ້າສົນໃຈຂອງບັນດາກິດຈະກໍາຢູ່ສະຖານທີ່ທ່ອງທ່ຽວແຫ່ງນີ້ທັງເປັນການສ້າງໂອກາດໃຫ້ຜູ້ປະກອບການທຸລະກິດດ້ານການທ່ອງທ່ຽວໄດ້ພົບປະປຶກສາຫາລື ແລະ ແລກປ່ຽນບົດຮຽນນໍາກັນເພື່ອຊຸກຍູ້ ແລະສົ່ງເສີມການສ້າງລາຍການທ່ອງທ່ຽວຢູ່ ນວ ໃຫ້ມີຄວາມຫຼວງຫຼາຍ ແລະສາມາດດຶງດູດນັກທ່ອງທ່ຽວພາຍໃນ ແລະຕ່າງປະເທດ ໂດຍສະເພາະເພື່ອກະ ກຽມຄວາມພ້ອມຕ້ອນປີທ່ອງທ່ຽວລາວ 2024 ໃຫ້ມີບັນຍາກາດຟົດຟື້ນ ເຊິ່ງຄັ້ງນີ້ພວກເຮົາໄດ້ເຊີນຜູ້ປະກອບການທຸລະກິດດ້ານການທ່ອງທ່ຽວທີ່ຂຶ້ນທະບຽນຢູ່ ນວ 30 ບໍລິສັດ ມາເຂົ້າຮ່ວມສໍາຫຼວດກ່ອນ ແລະໃນໄວໆນີ້ຍັງຈະນໍາພາບໍລິສັດ ອື່ນໆມາສໍາຫຼວດແຫຼ່ງທ່ອງທ່ຽວແຫ່ງນີ້ ແລະແຫຼ່ງທ່ອງທ່ຽວອື່ນໆ ຕື່ມອີກ.

ການເຄື່ອນໄຫວຄັ້ງນີ້ ມີຂຶ້ນໃນວັນທີ 23 ກັນຍາ 2023 ໄດ້ ຮັບການຕ້ອນຮັບຈາກທ່ານ ສົມເພັດ ມ້າວປະເສີດ ປະທານບໍລິສັດ ແຟເຊັດ ພັດທະນາແຫຼ່ງທ່ອງທ່ຽວທໍາມະຊາດ ຈໍາກັດຜູ້ດຽວ ຜູ້ພັດທະນາແຫຼ່ງທ່ອງທ່ຽວນໍ້າປຽນຢໍລະປາ.

แชร์