AIDC ສະເໜີບາງທິດທາງໃຫ້ລັດຖະບານຊ່ວຍແກ້ໄຂ ເພື່ອໃຫ້ການຈໍລະຈອນສິນຄ້າກະສິກຳດີຂຶ້ນ

ພາກທຸລະກິດ ສະເໜີໃຫ້ລັດຖະບານແກ້ໄຂຂໍ້ຫຍຸ້ງຍາກຂອງການຂົນສົ່ງສິນຄ້າກະສິກຳ ແລະດັດແກ້ໂຄງສ້າງລາຄາຂອງທ່າບົກ ແຕ່ລະບ່ອນໃຫ້ເປັນມາດຕະຖານດຽວກັນ.

ທ່ານ ພຶດສະພາ ພູມມະສັກ ປະທານບໍລິສັດ ເອເຊຍລົງທຶນ, ພັດທະນາ ແລະກໍ່ສ້າງ ຈໍາກັດຜູ້ດຽວ (AIDC) ໄດ້ຕາງໜ້າຜູ້ປະກອບການກ່ຽວກັບການຈໍລະຈອນສິນຄ້າກະສິກຳ ຂຶ້ນສະເໜີບາງບົດຮຽນຂະບວນການຈໍລະຈອນສິນຄ້າກະສິກຳພາຍໃນ ແລະ ສົ່ງອອກ ເພື່ອນໍາເຂົ້າເງິນຕາຕ່າງປະເທດຕໍ່ກອງປະຊຸມພົບປະລະຫວ່າງ ນາຍົກລັດຖະມົນຕີ ແລະຜູ້ປະກອບການຂະແໜງກະສິກຳ ແລະປ່າໄມ້ ທີ່ໄດ້ຈັດຂຶ້ນເມື່ອວັນທີ 15 ກັນຍາຜ່ານມາ ໂດຍໄດ້ນໍາສະເໜີບາງທິດທາງ ໃນການແກ້ໄຂບັນຫາຂໍ້ຫຍຸ້ງຍາກໃນການຂົນສົ່ງສິນຄ້າ ໃຫ້ລັດຖະບານຊ່ວຍແກ້ໄຂ ເພື່ອໃຫ້ການຈໍລະຈອນສິນຄ້າກະສິກຳໄດ້ດີຂຶ້ນ.

ປະທານບໍລິສັດ AIDC ໄດ້ສະເໜີລັດຖະບານຊ່ວຍພິຈາລະນາແກ້ໄຂລະບຽບການກົນໄກຂອງທ່າບົກເພື່ອໃຫ້ເໝາະສົມກັບການຂົນສົ່ງສິນຄ້າທີ່ເຮົາກຳລັງຄ້າໃນກົນໄກລະດັບໂລກ ເພື່ອແນວໃດໃຫ້ໄປແຂ່ງຂັນລະດັບໂລກໄດ້ເປັນຕົ້ນແມ່ນ ປັດຈຸບັນການສົ່ງອອກມັນຕົ້ນໄປທາງໄທມີຂໍ້ສະດວກ ແລະຕົ້ນທຶນທີ່ດີກວ່າທາງອື່ນແຕ່ກໍຍັງມີບາງຂໍ້ຫຍຸ້ງຍາກໂດຍສະເພາະກົດລະບຽບທ່າບົກຂອງພວກເຮົາສ່ວນໃຫຍ່ເລັ່ງໃສ່ຕູ້ຄອນເທນເນີ ແຕ່ກົດລະບຽບຂອງບາງປະເທດອ້ອມຂ້າງທີ່ຂົນສົ່ງສິນຄ້າປະເພດທີ່ກ່າວມາແມ່ນໃຫ້ປ່ຽນຖ່າຍຕ້ອງໄດ້ໃຊ້ລົດດໍ້າທີ່ສາມາດເອົາສິນຄ້າລົງໄດ້ເພື່ອໃຫ້ລົດຕັກສິນຄ້າຂຶ້ນໄປໃສ່ເຮືອໂດຍບໍ່ໃຊ້ຄອນເທນເນີ; ພ້ອມດຽວກັນນີ້, ກໍສະເໜີປັບປຸງລະບຽບການປ່ຽນຖ່າຍສິນຄ້າ ລວມເຖິງພື້ນທີ່ການປ່ຽນຖ່າຍສິນຄ້າໃນຍາມຝົນ ເພື່ອປ້ອງກັນບໍ່ໃຫ້ສິນຄ້າເສຍຫາຍໃນໄລຍະປ່ຽນຖ່າຍ ເພາະການຂົນສົ່ງສິນຄ້າໃນລະດັບການຄ້າໂລກ ມີຄວາມຈໍາເປັນຕ້ອງໄດ້ປະຕິບັດຕາມກຳນົດເວລາການຂົນສົ່ງສິນຄ້າຖ້າບໍ່ສາມາດໄປສົ່ງສິນຄ້າເຖິງປາຍທາງ ຫຼື ຈຸດຂຶ້ນເຮືອແມ່ນຈະມີຄ່າໃຊ້ຈ່າຍມື້ລະ 50.000 ໂດລາ. ນອກນີ້, ກໍສະເໜີກວດກາດັດແກ້ໂຄງສ້າງລາຄາຂອງທ່າບົກ ແຕ່ລະບ່ອນໃຫ້ເປັນມາດຕະຖານດຽວກັນ ແລະຄິດໄລ່ອັດຕາແລກປ່ຽນຕາມການກຳນົດຂອງທະນາຄານ.

ຂະນະທີ່, ການເຂົ້າມາຮັບສິນຄ້າກະສິກຳຂອງລົດຂົນສົ່ງຕ່າງປະເທດທີ່ຜ່ານທ່າບົກກໍສະເໜີໃຫ້ສາມາດມາຮັບເອົາຢູ່ໃນຈຸດຄ່ຽນຖ່າຍຂອງຜູ້ປະກອບການໄດ້ກຳນົດ, ຈົນກວ່າລົດຂົນສົ່ງລາວ ສາມາດເຂົ້າໄປສົ່ງສິນຄ້າໃນປະເທດໄທ ແລະ ປະເທດອ້ອມຂ້າງໄດ້ ຮອດປາຍທາງ ຫຼືທ່າເຮືອ ທີ່ບໍ່ນອກເໜືອຈາກກົດໝາຍກຳນົດ ຊຶ່ງອັນສຳຄັນລັດຖະບານຊ່ວຍເປັນຫຼັກໃນການເຈລະຈາກັບພາກລັດຖະບານຂອງປະເທດກ່ຽວຂ້ອງ ເພື່ອສາມາດຕອບຄໍາຖາມວ່າເປັນຫຍັງລົດລາວຈຶ່ງໄປສົ່ງສິນຄ້າຢູ່ຕ່າງປະເທດບໍ່ໄດ້ ແຕ່ເປັນຫຍັງລົດຕ່າງປະເທດຈຶ່ງສາມາດເຂົ້າມາຮັບເອົາສິນຄ້າຢູ່ລາວໄດ້. ສະນັ້ນ, ລັດຖະບານເຮົາ ແລະບໍລິສັດ ກໍຄວນຈັບມືກັນໃນການໄປເຈລະຈາເພື່ອຜົນປະໂຫບດລວມຂອງປະເທດເຮົາ.

ອີກດ້ານໜຶ່ງ, ກໍສະເໜີໃຫ້ລັດເຮົາຄວບຄຸມຜູ້ສົ່ງອອກ ແລະ ພັນທະອາກອນ ເພື່ອໃຫ້ລັດມີອາກອນເພີ່ມຂຶ້ນຈາກການສົ່ງອອກ ຊຶ່ງຕ້ອງມີການປຶກສາຫາລືຮ່ວມກັນດ້ານກົນໄກຕ່າງໆ ເພື່ອແກ້ໄຂບັນຫາມູນຄ່າເງິນທີ່ເຂົ້າແທ້ ບໍ່ກົງກັບມູນຄ່າທີ່ສົ່ງອອກ ແລະຈໍານວນຜູ້ສົ່ງອອກກໍຄວບຄຸມໄດ້ຍາກ. ແລະຕ້ອງໄດ້ກຳນົດໂກຕ້າກຳນົດສິນຄ້າບາງປະເພດ ຄວນເອົາຈັກບໍລິສັດ ແລະວາງເງື່ອນໄຂແນວໃດ ເພື່ອບໍ່ໃຫ້ມີກໍລະນີທີ່ຜູ້ໃດກໍສົ່ງອອກໄດ້ຊຶ່ງມັນຈະເປັນການທໍາລາຍຕະຫຼາດ; ການກຳນົດໂກຕ້າ ກໍເພື່ອສົ່ງເສີມການສົ່ງອອກທັງໃຫ້ເກີດມີຄວາມພຽງພໍກັບຄວາມຕ້ອງການຂອງການຜະລິດພາຍໃນຊຶ່ງຕ້ອງໄດ້ກຳນົດຢ່າງຮີບດ່ວນ ໂດຍສະເພາະ 4 ປະເພດສິນຄ້າກະສິກຳຫຼັກທີ່ສົ່ງອອກຫຼາຍຄື: ມັນຕົ້ນ, ກາເຟ, ສາລີ ແລະຢ່າງພາລາ ເພື່ອໃຫ້ໂຮງງານພາຍໃນປະເທດມີວັດຖຸດິບໃນການຜະລິດພາຍໃນ.
ທີ່ມາ: ປະຊາຊົນ

แชร์