ຈັບບຸກຄົນແອບອ້າງເປັນເຈົ້າໜ້າທີ່ ຮັບແລ່ນຄົນເຂົ້າຕຳຫຼວດ

ທ້າວ ຈັນຄຳ ສອນລະວົງ ແມ່ນຜູ້ຖືກຫາທີ່ແອບອ້າງ ແລະປອມຕົວເປັນເຈົ້າໜ້າທີ່ກຳລັງ ປກສ ເພື່ອຮັບແລ່ນເອກະສານເອົາຄົນເຂົ້າຕຳຫຼວດເຮັດໃຫ້ມີຜູ້ຫຼົງເຊື່ອຖືກເສຍຫາຍຫຼາຍຄົນ ລວມມູນຄ່າເປັນເງິນ 340.000 ບາດ, 1.500 ໂດລາ ແລະ 1.300 ລ້ານກວ່າກີບ; ຖືກຈັບຕົວມາດຳເນີນຄະດີໃນວັນທີ 23 ສິງຫາ 2023.

ພັທ ຈັນເພັງ ແກ້ວປະເສີດ ຫົວໜ້າກອງບັນຊາການ ປກສ ເມືອງໄຊທານີ ໄດ້ຖະແຫຼງຕໍ່ສື່ມວນຊົນ ໃນວັນທີ 20 ກັນຍາ 2023 ໃຫ້ຮູ້ວ່າ: ໃນໄລຍະປີ 2021 ໄດ້ມີຜູ້ຖືກເສຍຫາຍມາແຈ້ງຄວາມຕໍ່ເຈົ້າໜ້າທີ່ ວ່າມີຄົນບໍ່ດີແອບອ້າງເປັນເຈົ້າໜ້າທີ່ຕຳຫຼວດຮັບແລ່ນເອກະສານເອົາຄົນເຂົ້າກຳລັງ ປກສ ໄດ້ເຮັດໃຫ້ມີຜູ້ຖືກເສຍຫາຍຫຼາຍຄົນ ແລະເສຍເງິນໃຫ້ບຸກຄົນດັ່ງກ່າວເປັນຈຳນວນຫຼາຍ; ເຈົ້າໜ້າທີ່ໄດ້ສືບສວນ-ສອບສວນ ຈິ່ງຮູ້ເປົ້າໝາຍ ຊື່ທ້າວ ຈັນຄຳ ສອນລະວົງ ຢູ່ເມືອງໄຊທານີ ນະຄອນຫຼວງວຽງຈັນ.

ມາຮອດວັນທີ 23 ສິງຫາ 2023 ເຈົ້າໜ້າທີ່ ປກສ ເມືອງໄຊທານີ ກໍສາມາດຈັບຕົວທ້າວ ຈັນຄຳ ສອນລະວົງ ອາຍ 35 ປີ, ບ້ານເກີດວັງຫີນ ເມືອງວຽງທອງ ແຂວງບໍລິຄຳໄຊ ປັດຈຸບັນພັກເຊົາຢູ່ບ້ານນາລ້ອມ ເມືອງໄຊທານີ ນະຄອນຫຼວງວຽງຈັນ.

ທ້າວ ຈັນຄຳ ສອນລະວົງ ສາລະພາບ ວ່າ: ໄດ້ເຄື່ອນໄຫວແອບອ້າງເປັນເຈົ້າໜ້າທີ່, ປອມແປງເອກະສານ, ນຳໃຊ້ເອກະສານປອມເພື່ອສໍ້ໂກງຊັບພົນເມືອງ ມາແຕ່ປີ 2019 ເປັນຕົ້ນມາ ເຊິ່ງຕົນໄດ້ນຸ່ງເຄື່ອງແບບຕຳຫຼວດຕິດຊັ້ນຮ້ອຍເອກ, ພັນຕີ ແລະໄດ້ແອບອ້າງເປັນເຈົ້າໜ້າທີ່ສັງກັດຢູ່ກົມໃຫຍ່ການເມືອງປ້ອງກັນຄວາມສະຫງົບ ທັງເປັນເລຂາໃຫ້ນາຍຜູ້ໃຫຍ່ຂັ້ນສູງເພື່ອຕົວະຍົວະຫຼອກລວງໃຫ້ປະຊາຊົນຫຼົງເຊື່ອ ແລະມອບເງິນຈຳນວນຫຼາຍໃຫ້ເພື່ອຈ້າງແລ່ນເອົາຄົນເຂົ້າກຳລັງຕຳຫຼວດ ແລະ ເຂົ້າເຮັດວຽກບ່ອນອື່ນໆ.

ພັທ ຈັນເພັງ ແກ້ວປະເສີດ ໄດ້ຝາກເຖິງປະຊາຊົນລາວບັນດາເຜົ່າທຸກຊັ້ນຄົນຖ້າຫາກບຸກຄົນໃດໄດ້ຫຼົງເຊື່ອ, ຕໍ່ການຕົວະຢົວະຫຼອກລວງຂອງ ທ້າວ ຈັນຄຳ ສອນລະວົງ ແມ່ນໃຫ້ຮີບຮ້ອນເຂົ້າມາແຈ້ງຄວາມນໍາເຈົ້າໜ້າທີ່ ແລະພ້ອມກັນມີສະຕິລະວັງຕົວ,ຈະເຮັດຫຍັງກໍຢາກໃຫ້ຄິດລະອຽດຖີ່ຖ້ວນ ຫຼືສອບຖາມຂໍ້ມູນຕາມສຳນັກງານ-ອົງການທີ່ມີການເປີດຮັບເອົາບຸກຄົນເຂົ້າສັງກັດລັດດ້ວຍຕົນເອງຈະເປັນການດີເພື່ອຫຼີກເວັ້ນບໍ່ໃຫ້ຫຼົງເຊື່ອຄືດັ່ງລາຍຄະດີນີ້.
ທີ່ມາ: ຄວາມສະຫງົບ

แชร์