ເກີດດິນເຊາະເຈື່ອນໄວຜິດປົກກະຕິ ເຮັດໃຫ້ 6 ຫລັງຄາເຮືອນຟັງເສຍຫາຍ

ວັນທີ 20 ກັນຍາ 2023 ນີ້, ທ່ານ ບຸນພະລັງ ວິໄລສັກ ຮອງເຈົ້າເມືອງປາກລາຍ, ປະທານຄະນະກຳມະການຄຸ້ມຄອງໄພພິບັດຂັ້ນເມືອງພ້ອມຄະນະໄດ້ລົງຕິດຕາມສະພາບດິນເຊາະເຈື່ອນ ເຮືອນປະຊາຊົນ ຢູ່ບ້ານໄຊຍະມຸງຄຸນ ແລະບ້ານແສງລາຍ. ພ້ອມທັງມອບເງິນຊ່ວຍເຫລືອເບື້ອງຕົ້ນ ຄອບຄົວລະ 2.000.000 ກີບ.

ຕາມຂໍ້ມູນຈາກຫ້ອງການໂຍທາທິການ ແລະຂົນສົ່ງເມືອງປາຫລາຍໃຫ້ຮູ້ວ່າ: ໃນວັນທີ 16-17 ກັນຍາ 2023 ຜ່ານມາມີຝົນຕົກໜັກຢ່າງຕໍ່ເນື່ອງຕິດຕໍ່ກັນຫລາຍວັນ ເຮັດໃຫ້ດິນເຊາະເຈື່ອນຕາມແຄມຫ້ວຍ (ຕັບຄວາຍ) ບ້ານໄຊຍະມຸງຄຸນ ເຊິ່ງດິນຕາຝັ່ງແຄມຫ້ວຍ ຖືກເຊາະເຈື່ອນໄວຜິດປົກກະຕິສາມາດວັດແທກລວງຍາວໄດ້ສະເລ່ຍ 15 ແມັດ ໂດຍໄດ້ສົ່ງຜົນກະທົບ ຕໍ່ເຮືອນປະຊາຊົນ ຄື: ບ້ານໄຊຍະມຸງຄຸນ ມີເຮືອນ 1 ຫລັງຄາເຮືອນໄດ້ຮັບຜົນເສຍຫາຍ ປະມານ 80%, ປະເມີນມູນຄ່າເສຍຫາຍເບື້ອງຕົ້ນປະມານ 21 ລ້ານກວ່າກີບ. ສ່ວນຢູ່ບ້ານແສງລາຍ ມີດິນເຊາະເຈື່ອນຕາມແຄມນໍ້າຂອງ ເຮືອນໄດ້ຮັບຜົນກະທົບ 5 ຫລັງ. ໃນນີ້, ມີ 1 ຄອບຄົວ ໄດ້ຮັບຜົນເສຍຫາຍ 100% ສາຍເຫດຍ້ອນນໍ້າໄຫລລອດພື້ນເຮືອນເຮັດໃຫ້ເກີດດິນເຊາະເຈື່ອນຍຸບລົງຢ່າງໄວ,ປະເມີນມູນຄ່າເສຍຫາຍເບື້ອງຕົ້ນ 17 ລ້ານກວ່າກີບ.
ຂ່າວ-ພາບ: ທອງສະຫວັດ

แชร์