ແຂວງວຽງຈັນເຜີຍແຜ່ນິຕິກຳ ການແກ້ໄຂບັນຫາເຄັ່ງຮ້ອນເສດຖະກິດ-ການເງິນ
ໂອກາດທີ່ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ, ຄະນະສະເພາະກິດ 19/ກມສພ ເປັນປະທານກອງປະຊຸມເຜີຍແຜ່ບັນດານິຕິກໍາທີ່ກ່ຽວຂ້ອງກັບການແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ ໃຫ້ການນຳ ແລະພະນັກງານຫລັກແຫລ່ງ ຂອງແຂວງວຽງຈັນ ວັນທີ 19 ກັນຍາ 2023 ທ່ານໄດ້ເນັ້ນໃຫ້ແຂວງວຽງຈັນສືບຕໍ່ເອົາໃຈໃສ່ບາງບັນຫາ ຄື:
- ຕໍ່ກັບມາດຕະການແກ້ໄຂບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະໜີ້ສິນຕ່າງປະເທດ ແມ່ນໃຫ້ກໍານົດແຜນການແກ້ໄຂອອກເປັນປະຈໍາວັນ, ປະຈໍາອາທິດ ໂດຍຊຸກຍູ້ການເກັບລາຍຮັບ ຢູ່ບັນດາດ່ານຊາຍແດນ-ການຄ້າຊາຍແດນໃຫ້ໄດ້ຫລາຍຂຶ້ນ; ປັບປຸງການຄຸ້ມຄອງດ່ານ ໃຫ້ມີຄວາມເປັນເອກະພາບຕາມທິດຫັນເປັນທັນສະໄໝ, ໂປ່ງໃສ, ມີຄວາມສະດວກ, ວ່ອງໄວ, ຫລຸດຜ່ອນຂັ້ນຂອດທີ່ບໍ່ຈໍາເປັນ, ແກ້ໄຂປະກົດການຫຍໍ້ທໍ້ຕ່າງໆ; ເພີ່ມທະວີການດຶງດູດການລົງທຶນໂດຍກົງ ຈາກຕ່າງປະເທດໃຫ້ຫລາຍ, ດໍາເນີນຂັ້ນຕອນອະນຸມັດໂຄງການໃຫ້ໄວ; ການນໍາເຂົ້າທຶນຕ້ອງຜ່ານລະບົບທະນາຄານ ແລະ ແລກປ່ຽນເປັນເງິນກີບ ກ່ອນນໍາໄປນຳໃຊ້; ຄຸ້ມຄອງການເຄື່ອນໄຫວການເງິນ ຂອງທະນາຄານທຸລະກິດ, ແກ້ໄຂບັນຫາການແລກ ປ່ຽນເງິນຕານອກລະບົບ, ຮັບປະກັນບໍ່ໃຫ້ມີການປັ່ນປ່ວນເສດຖະກິດ ໂດຍນໍາໃຊ້ມາດຕະການຢ່າງເຂັ້ມງວດ, ເດັດຂາດ ຕໍ່ຜູ້ລະເມີດກົດໝາຍ, ຕໍ່ຜູ້ສວຍໃຊ້ໜ້າທີ່ຫາຜົນປະໂຫຍດແບບບໍ່ຊອບທໍາ ໂດຍບໍ່ມີການຍົກເວັ້ນ; ການນໍາເຂົ້າ-ສົ່ງອອກສິນຄ້າ ຕ້ອງຊໍາລະຜ່ານລະບົບທະນາຄານ, ຂຶ້ນທະບຽນ ແລະ ຄຸ້ມຄອງຜູ້ນໍາເຂົ້າ-ສົ່ງອອກ, ແກ້ໄຂສະພາບຫຍໍ້ທໍ້ຕ່າງໆ ແລະ ອື່ນໆ;
2. ສະເໜີໃຫ້ອົງການປົກຄອງແຂວງຊີ້ນໍາ, ຊຸກຍູ້, ຕິດຕາມ ການຈັດຕັ້ງປະຕິບັດຜັນຂະຫຍາຍບັນດານິຕິກໍາທີ່ໄດ້ເຜີຍແຜ່ຄັ້ງນີ້ຂອງບັນດາພະແນກການ ແລະ ພາກສ່ວນກ່ຽວຂ້ອງ ໃຫ້ຖືກຕ້ອງສອດຄ່ອງກັບແຜນດຳເນີນງານ ແລະ ໜ້າທີ່ລວມ ຂອງຄະນະສະເພາະກິດ 19/ກມສພ; ດໍາເນີນການກວດກາ, ປະເມີນຜົນເປັນ ແລະ ລາຍງານ ຜົນການຈັດຕັ້ງປະຕິບັດ ໃຫ້ຄະນະສະເພາະກິດ 19/ກມສພ ເປັນແຕ່ລະໄລຍະ;
3. ການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ, ກະຈາຍແຫລ່ງທຶນສູ່ທ້ອງຖິ່ນໃຫ້ຄົ້ນຄວ້າກໍານົດເຂດຈຸດສຸມ,ປະເພດ, ຊະນິດຜະລິດຕະພັນ ເພື່ອສົ່ງເສີມ; ໃນນັ້ນ, ໃຫ້ສຸມໃສ່ຜະລິດຕະພັນ ທີ່ເປັນທ່າແຮງຂອງແຕ່ລະທ້ອງຖິ່ນ ທີ່ສາມາດແຂ່ງຂັນ ແລະ ໄດ້ຄຸນນະພາບ ເປັນຕົ້ນ ກະສິກໍາສະອາດ, ອຸດສາຫະກໍາປຸງແຕ່ງສໍາເລັດຮູບ, ເຄິ່ງສໍາເລັດຮູບ ເພື່ອຈໍາໜ່າຍພາຍໃນ ແລະ ສົ່ງອອກຕ່າງປະເທດ;
4. ໃຫ້ແຂວງເອົາໃຈໃສ່ຕໍ່ການຈັດເກັບລາຍຮັບ, ຄຸ້ມຄອງລາຍຈ່າຍ ແຜນພັດທະນາເສດຖະກິດ-ສັງຄົມ ກໍ່ຄື ແຜນງົບປະມານ ປະຈໍາປີ 2023 ຂອງແຂວງ ໃນໄລຍະເວລາທີ່ຍັງເຫຼືອ ໃຫ້ບັນລຸຕາມແຜນການທີ່ກຳນົດໄວ້;
5. ເອົາໃຈໃສ່ຈັດຕັ້ງປະຕິບັດວຽກງານການຄຸ້ມຄອງອິນເຕີເນັດ ແລະ ສື່ສັງຄົມອອນລາຍຢ່າງເຂັ້ມງວດບົນພື້ນຖານນິຕິກຳທີ່ກ່ຽວຂ້ອງ.
