ເລຂາທິການໃຫຍ່ ໄອປາ (AIPA) ຢ້ຽມຢາມ ແລະເຮັດວຽກຢູ່ ສປປ ລາວ

ໃນລະຫວ່າງວັນທີ 17-21 ກັນຍາ 2023 ນີ້, ທ່ານນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ ເລຂາທິການໃຫຍ່ສະມັດຊາລັດຖະສະພາລະຫວ່າງຊາດອາຊຽນ ຫຼືໄອປາ(AIPA) ພ້ອມຄະນະໄດ້ເດີນທາງມາຢ້ຽມຢາມ ແລະເຮັດວຽກເພື່ອປຶກສາຫາລື ແລະກະກຽມຄວາມພ້ອມຮ່ວມກັບສະພາແຫ່ງຊາດລາວ ໃນການເປັນເຈົ້າພາບຈັດກອງປະຊຸມສະມັດໃຫຍ່ AIPA ຄັ້ງທີ 45 ທີ່ ສປປ ລາວ ໃນປີ 2024.

ໂອກາດນີ້, ທ່ານເລຂາທິການໃຫຍ່ AIPA ພ້ອມດ້ວຍຄະນະໄດ້ພົບປະເຮັດວຽກກັບທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ແລະຮ່ວມກັນຈັດສຳມະນາ ກັບຄະນະນຳຂອງກຳມາທິການທີ່ກ່ຽວຂ້ອງ, ສະມາຊິກສະພາແຫ່ງຊາດ ແລະພະນັກງານ-ວິຊາການ ຂອງສະພາແຫ່ງຊາດລາວເພື່ອປຶກສາຫາລືກ່ຽວກັບການກະກຽມເປັນເຈົ້າພາບຈັດກອງປະຊຸມໃຫຍ່ AIPA ຄັ້ງທີ 45 ຢູ່ ສປປ ລາວ ໃນປີ 2024 ທີ່ຈະມາເຖິງ; ເພື່ອປຶກສາຫາລື ກ່ຽວກັບການຈັດຕັ້ງປະຕິບັດວຽກງານຕ່າງໆຂອງໄອປາ ລະຫວ່າງ ສະພາແຫ່ງຊາດລາວ ໃນຖານະເປັນປະທານໄອປາ ຮ່ວມກັບເລຂາທິການໃຫຍ່ໄອປາ; ເພື່ອຍົກໃຫ້ເຫັນເຖິງທ່າແຮງຂອງ ສປປ ລາວ ທາງດ້ານການເຊື່ອມໂຍງເຊື່ອມຈອດ ເພື່ອເປັນຂໍ້ມູນໃຫ້ກັບຫົວຂໍ້ປຶກສາຫາລື ຂອງກອງປະຊຸມໃຫຍ່ໄອປາຄັ້ງທີ 45 “ບົດບາດຂອງລັດຖະສະພາໃນການເພີ່ມທະວີການເຊື່ອມຈອດ ແລະການເຕີບໂຕແບບກວມລວມຂອງອາຊຽນ”.

ນອກຈາກນັ້ນ, ທ່ານເລຂາທິການໃຫຍ່ AIPA ພ້ອມດ້ວຍຄະນະຍັງໄດ້ເດີນທາງດ້ວຍລົດໄຟຄວາມໄວສູງລາວ-ຈີນ ໄປຢ້ຽມຢາມ ແຂວງຫລວງພະບາງ ເພື່ອເບິ່ງການພັດທະນາທາງດ້ານການເຊື່ອມໂຍງເຊື່ອມຈອດ ຂອງ ສປປ ລາວ ກໍຄືການສົ່ງເສີມການພັດທະນາເສດຖະກິດ-ສັງຄົມ, ການທ່ອງທ່ຽວຢູ່ເມືອງມໍລະດົກໂລກຕາມນະໂຍບາຍສົ່ງເສີມການເຊື່ອມໂຍງເຊື່ອມຈອດ ຂອງ ສປປ ລາວ.
ທີ່ມາ: ຂປລ

แชร์