ການຈໍລະຈອນສິນຄ້າພາຍໃນ 6 ເດືອນຕົ້ນປີ ສາມາດປະຕິບັດ 37.632,9 ຕື້ກີບ ບັນລຸ 51,1% ຂອງແຜນການ

ອີງຕາມການໃຫ້ຂໍ້ມູນຂອງສູນສະຖິຕິຂໍ້ມູນຂ່າວສານກົມແຜນການ ແລະການຮ່ວມມື ກະຊວງອຸດສາຫະກຳ ແລະການຄ້າ ໃຫ້ຮູ້ວ່າ: ມູນຄ່າການຜະລິດອຸດສາຫະກໍາປຸງແຕ່ງ ໃນ 6 ເດືອນຕົ້ນປີ 2023 ແມ່ນສາມາດປະຕິບັດ 6.978,3 ຕື້ກີບ ບັນລຸໄດ້ 49,7% ຂອງແຜນການປີທີ່ວາງໄວ້ເມື່ອທຽບໃສ່ໄລຍະດຽວກັນຂອງປີຜ່ານມາເຫັນວ່າມີອັດຕາເພີ່ມຂຶ້ນ 4,41% ມູນຄ່າການຈໍລະຈອນສິນຄ້າພາຍໃນ 6 ເດືອນຕົ້ນປີ 2023 ແມ່ນສາມາດປະຕິບັດ 37.632,9 ຕື້ກີບ ສາມາດບັນລຸໄດ້ເຖິງ 51,1% ຂອງແຜນການປີທີ່ວາງໄວ້ເມື່ອທຽບໃສ່ໄລຍະດຽວກັນຂອງປີຜ່ານມາເຫັນວ່າມີອັດຕາເພີ່ມຂຶ້ນ 3,4% ມູນຄ່າການຄ້າຕ່າງປະເທດ ໃນ 6 ເດືອນຕົ້ນປີ 2023 ປະຕິບັດໄດ້ 7.546 ລ້ານໂດລາ ໃນນີ້ມູນຄ່າສົ່ງອອກແມ່ນ 4.272 ລ້ານໂດລາສະຫະລັດ ເຊິ່ງສາມາດປະຕິບັດໄດ້ 51,9% ຂອງແຜນການປີທີ່ວາງໄວ້ເມື່ອທຽບໃສ່ໄລຍະດຽວກັນຂອງປີຜ່ານມາເຫັນວ່າມີອັດຕາເພີ່ມຂຶ້ນ 2,4% ສໍາລັບມູນຄ່ານຳເຂົ້າສິນຄ້າແມ່ນ 3.274 ລ້ານໂດລາສະຫະລັດ ເຊິ່ງສາມາດປະຕິບັດໄດ້ 46,1% ຂອງແຜນການປີທີ່ວາງໄວ້ເມື່ອທຽບໃສ່ໄລຍະດຽວກັນຂອງປີຜ່ານມາເຫັນວ່າມີອັດຕາເພີ່ມຂຶ້ນ 5,2%.

ການຂຶ້ນທະບຽນ ແລະວິສາຫະກິດ ໃນ 6 ເດືອນຕົ້ນປີ 2023 ມີ 10.350 ຫົວໜ່ວຍ ລວມທຶນຈົດທະບຽນທັງໝົດ 110.508 ຕື້ກີບ ທຽບໃສ່ໄລຍະດຽວກັນຂອງປີຜ່ານມາ ເຫັນວ່າມີຈຳນວນຫົວໜ່ວຍວິສາຫະກິດທີ່ມາແຈ້ງຂຶ້ນທະບຽນ ເພີ່ມຂຶ້ນ 35,3% ຂະແໜງການທຸລະກິດທີ່ມີຈຳນວນຫົວໜ່ວຍວິສາຫະກິດມີມູນຄ່າການລົງທຶນເພີ່ມຂຶ້ນໃນນັ້ນແມ່ນວິສາຫະກິດທີ່ກ່ຽວກັບການຄ້າ ຂາຍຍົກ-ຂາຍຍ່ອຍ-ສ້ອມແປງລົດຍົນ ແລະລົດຈັກ ການຂົນສົ່ງ ແລະສາງສິນຄ້າການເຄື່ອນໄຫວໃຫ້ທີ່ພັກ ແລະຮ້ານອາຫານອຸດສາຫະກຳປຸງແຕ່ງ.

ສຳລັບມູນຄ່າສົ່ງອອກຂອງ ສປປ ລາວໃນ 6 ເດືອນຕົ້ນປີ 2023 ໄດ້ສົ່ງສິນຄ້າອອກໄປປະເທດໄທ 37% ຈີນ 27% ຫວຽດນາມ 16% ອິນເດຍ ຍີ່ປຸ່ນອາເມຣິກາ 1% ອົດສະຕຣາລີ 5% ແລະອື່ນໆ 11%.

แชร์