ຈັບຄົນຮ້າຍກໍ່ເຫດປຸ້ນເອົາຄຳຢູ່ເຂດຫຼັກ 21

ເຈົ້າໜ້າທີ່ ປກສ ເມືອງໄຊທານີ ນະຄອນຫຼວງວຽງຈັນ ເປີດເຜີຍໃນວັນທີ 20 ກັນຍາ 2023 ວ່າ: ວັນທີ 17 ກັນຍາ 2023 ເວລາປະມານ 23 ໂມງ 00 ນາທີ ເຈົ້າໜ້າທີ່ພວກເຮົາໄດ້ຮັບແຈ້ງເຫດຈາກການຈັດຕັ້ງບ້ານໂຄກສີວິໄລ ເມືອງໄຊທານີ ນະຄອນຫຼວງວຽງຈັນ ວ່າ: ໄດ້ມີເຫດການຄົນຮ້າຍປຸ້ນຊັບເກີດຂຶ້ນຢູ່ແຖວໄຟແດງຫຼັກ 21 ທີ່ຂຶ້ນກັບບ້ານໂຄກສີວິໄລ ເມືອງໄຊທານີ ຈາກນັ້ນ ປກສ ເມືອງໄຊທານີຈີ່ງໄດ້ແຕ່ງຕັ້ງໃຫ້ໜ່ວຍງານວີຊາສະເພາະລົງກວດກາສະຖານທີ່ເກີດເຫດຕົວຈີ່ງ ເຫັນວ່າ: ມີມູນຄວາມຈີງແທ້, ຜູ້ຖືກເຄາະຮ້າຍຊື່: ທ້າວ ຈັນດີ ອາຍຸ 30 ປີ ພະນັກງານ ຢູ່ບ້ານໜອງປີງ ເມືອງຈັນທະບູລີ ນະຄອນຫຼວງວຽງຈັນ.

ມາຮອດເວລາ 16 ໂມງ 00 ນາທີຂອງວັນທີ 18 ກັນຍາ 2023 ທາງເຈົ້າໜ້ທີ່ກໍສາມາດຈັບທ້າວ ບຸນໜາຍ ອາຍຸ 30 ປີ ພັກເຊົາບ້ານ ໂນນທອງ ເມືອງ ໄຊທານີ ນະຄອນຫຼວງວຽງຈັນ ຜູ້ລົງມືກໍ່ເຫດໄດ້.

ທ້າວ ບຸນໜາຍ ສັກດາ ໃຫ້ການຮັບສາລະພາບວ່າ: ໃນຊ່ວງເດືອນ ສິງຫາ 2023 ຜູ່ກ່ຽວ ໄດ້ມີການພົວພັນກັບ ທ້າວ ຈັນດີ, ຕົກມາຮອດວັນທີ 17 ກັນຍາ 2023 ພວກກ່ຽວທັງສອງຈຶ່ງເກີດຜິດຖຽງກັນຂັ້ນຮ້າຍແຮງຍ້ອນການຫຶງຫວງ ທ້າວ ຈັນດີ ບໍ່ໃຫ້ ທ້າວ ບຸນໜາຍ ໄປພົວພັນກັບບຸກຄົນອື່ນ.

ຈາກນັ້ນ ທ້າວ ບຸນໜາຍ ຈຶ່ງເກີດມີແນວຄຽດແຄ້ນຢາກຄາດຕະກໍາເພື່ອປິດປາກ ແລະ ເອົາຊັບສິນ ທ້າວ ຈັນດີ ແກ້ວດີ, ຮອດເວລາ 22:30 ນາທີ ຂອງວັນດຽວກັນພວກກ່ຽວທັງສອງຈຶ່ງໄດ້ນັດພົບກັນຢູ່ຈຸດໄຟແດງຫຼັກ 21 ເພື່ອຈະປັບຄວາມເຂົ້າໃຈກັນ, ທ້າວ ບຸນໜາຍ ໄດ້ຊ້ອນທ້າຍລົດຈັກຂອງ ທ້າວ ຈັນດີ ຂັບຂີ່ມຸ້ງໜ້າໄປເຮືອນພັກບົວສະຫວັນ ຕັ້ງຢູ່ບ້ານໂຄກສີວິໄລ ເມືອງໄຊທານີ ທີ່ທ້າວ ຈັນດີ ເປີດໃວ້ແລ້ວ, ພໍຂັບຂີ່ລົດໄປຮອດຈຸດເກີດເຫດທ້າວ ບຸນໜາຍ ຈຶ່ງໄດ້ເຮັດໃຫ້ລົດຈັກລົ້ມລົງແຄມທາງ ຈາກນັ້ນ ທ້າວ ບຸນໜາຍ ຈຶ່ງໄດ້ຈົກເອົາມີດແຫຼມທີ່ກະກຽມມາແລ້ວນັ້ນ,ຝັນໃສ່ຫົວ,ແທງໃສ່ຕົນໂຕຈໍານວນຫຼາຍບາດ ທ້າວ ຈັນດີ ຈຶ່ງໄດ້ລຸກແລ່ນຂ້າມທາງເພື່ອໄປຂໍຄວາມຊ່ວຍເຫຼືອແຕ່ ທ້າວ ບຸນໜາຍ ໄດ້ແລ່ນຕາມໄປເອົາມີດຝັນ, ແທງຈຳນວນຫຼາຍບາດເຮັດໃຫ້ ທ້າວ ຈັນດີ ລົ້ມລົງຄິດວ່າ ຜູ່ກ່ຽວ ເສຍຊີວິດແລ້ວຈຶ່ງໄດ້ດຶງເອົາຊັບສິນ, ປະເພດສາຍຄໍຄໍາ 1 ເສັ້ນບໍ່ຮູ້ນໍ້າໜັກ, ແຫວນຄໍາ 1 ວົງບໍ່ຮູ້ນໍ້າໜັກແລ້ວເອົາຕົວລົບໜີ, ເອົາມີດທີ່ໃຊ້ກໍ່ເຫດຖິ້ມລົງຫ້ວຍນໍ້າໃນປ່າ, ເຄື່ອງທີ່ເປື້ອນເລືອດນໍາໄປຈູດໄຟຖິ້ມ.
ຂ່າວ: ບຸນຖິນ
#ຄວາມສະຫງົບ

แชร์