ລາວ ກວດພົບພະຍາດໝາກສຸກລີງ ກໍລະນີທຳອິດ ແລະມີຄວາມສ່ຽງຈະເພີ່ມຂຶ້ນໃນຕໍ່ຫນ້າ

ວັນທີ 19 ກັນຍາ 2023 ນີ້, ກະຊວງສາທາລະນະສຸກ ໄດ້ອອກແຈ້ງການເລກທີ 1045/ສທ ເລື່ອງ: ເອົາໃຈໃສ່ຕິດຕາມເຝົ້າລະວັງ ແລະປະຕິບັດມາດຕະການປ້ອງກັນ ແລະຄວບຄຸມການລະບາດຂອງພະຍາດໝາກສຸກລີງ Monkey Pox (Mpox) ໃນ ສປປ ລາວ.

ເນື່ອງຈາກວ່າປະຈຸບັນມີການຢັ້ງຢືນກໍລະນີຕິດເຊື້ອພະຍາດໝາກສຸກລີງກໍລະນີທຳອິດ ຢູ່ໃນ ສປປ ລາວ; ເຊິ່ງ ຜູ້ກ່ຽວມີປະຫວັດການຕິດເຊື້ອມາຈາກປະເທດໃກ້ຄຽງ, ສົມທົບກັບ ການເດີນທາງເຂົ້າ-ອອກ ຂອງປະຊາຊົນລາວ ແລະ ບັນດານັກທ່ອງທ່ຽວຈາກປະເທດໃກ້ຄຽງ, ບັນດາປະເທດທີ່ມີການລາຍງານຕົວເລກການຕິດເຊື້ອພະຍາດໝາກສຸກລີງ, ເຮັດໃຫ້ ສປປ ລາວ ມີຄວາມສ່ຽງທີ່ອາດຈະພົບກໍລະນີນໍາເຂົ້າ ແລະຕິດເຊື້ອໃນປະເທດເພີ່ມຂຶ້ນໃນຕໍ່ຫນ້າ.

ກະຊວງສາທາລະະສຸກຈຶ່ງແຈ້ງມາຍັງທ່ານຫົວໜ້າ/ຮອງພະແນກສາທາລະນະສຸກແຂວງ ແລະນະຄອນຫຼວງວຽງຈັນ ໃຫ້ເພີ່ມທະວີເອົາໃຈໃສ່ໃນການຕິດຕາມເຝົ້າລະວັງ, ການປະຕິບັດມາດຕະການປ້ອງກັນ ແລະ ຄວບຄຸມການ ລະບາດຂອງພະຍາດໝາກສຸກລີງ ໃນກຸ່ມຜູ້ໂດຍສານທີ່ເດີນທາງເຂົ້າ ສປປ ລາວ, ໂດຍສະເພາະ ແຂວງທີ່ມີຊາຍແດນຕິດກັບປະເທດທີ່ມີກໍລະນີການລາຍງານການຕິດເຊື້ອດັ່ງນີ້ :

1. ມອບໃຫ້ແຕ່ລະແຂວງ, ນະຄອນຫຼວງປະເມີນຄວາມສ່ຽງໃນເບື້ອງຕົ້ນຂອງແຂວງຕົນ ແລະກໍານົດທິດທາງການກະກຽມຄວາມພ້ອມໃນການປ້ອງກັນ ແລະ ໂຕ້ຕອບໃນການຮັບມືຖ້າມີກໍລະນີເກີດຂຶ້ນໃໝ່;

2. ຊີ້ນໍາໃຫ້ໂຮງໝໍແຂວງ, ເມືອງ ແລະ ສະຖານທີ່ບໍລິການສາທາລະນະສຸກລວມທັງຫ້ອງກວດພະຍາດເອກະຊົນທຸກຂັ້ນເພີ່ມທະວີຄວາມເອົາໃຈເຝົ້າລະວັງໝວດອາການໄຂ້ ແລະອອກຕຸ່ມ, ຖ້າພົບກໍລະນີສົງໄສ ແມ່ນໃຫ້ລາຍງານ ແລະ ເກັບຕົວຢ່າງສົ່ງມາກວດຢັ້ງຢືນຢູ່ສູນວິເຄາະລະບາດວິທະຍາແຫ່ງຊາດຢ່າງຮີບດ່ວນທີ່ສຸດ;

3. ກວດກາຄວາມພ້ອມດ້ານຫ້ອງວິເຄາະຂອງແຂວງ ແລະອຸປະກອນເກັບຕົວຢ່າງເພື່ອກວດວິເຄາະຢັ້ງຢືນ ແລະແຈ້ງຜົນການກວດການຕິດເຊື້ອພະຍາດໝາກສຸງລີງໃຫ້ໄດ້ໄວ ແລະຮັບປະກັນຄວາມຖືກຕ້ອງ;

4. ກະກຽມຄວາມພ້ອມ ແລະສະໜອງອຸປະກອນການປິ່ນປົວ, ການປ້ອງກັນຕົນເອງ ແລະການເກັບຕົວຢ່າງ, ໂດຍສະເພາະແຂວງທີ່ມີດ່ານສາກົນ ແລະແຂວງທີ່ມີຄວາມສ່ຽງ;

5. ເອົາໃຈໃສ່ໃນການໂຄສະນາສຸຂະສຶກສາແກ່ພໍ່ແມ່ປະຊາຊົນໃຫ້ທົ່ວເຖິງເພື່ອໃຫ້ຮັບຮູ້ ແລະເຂົ້າໃຈເຖິງຜົນຮ້າຍ ແລະວີທີປ້ອງກັນໂຕເອງຈາກພະຍາດໝາກສຸກລີງ.

ດັ່ງນັ້ນ, ຈຶ່ງໄດ້ແຈ້ງມາຍັງທ່ານເພື່ອຊາບ ແລະປະຕິບັດຕາມແຈ້ງການສະບັບນີ້ຢ່າງເຂັ້ມງວດ.

แชร์