ການເພາະເຫັດເຂັມ

  ເຫັດເຂັມແມ່ນເຫັດປະເພດໜຶ່ງທີ່ໃຫ້ທາດໂປຼຕີນຄືກັບເຫັດທົ່ວໄປ, ເຖິງແມ່ນວ່າປະຈຸບັນຢູ່ບ້ານເຮົາຍັງບໍ່ທັນມີຄົນນິຍົມກັນເພາະຂາຍເທື່ອ, ແຕ່ສ່ວນທີ່ຂາຍທົ່ວໄປຍັງແມ່ນການນຳເຂົ້າຈາກປະເທດອ້ອມຂ້າງຢູ່,ຂະນະທີ່ເຫັດປະເພດອື່ນໆບ້ານເຮົາກໍສາມາດຜະລິດອອກຈຳໜ່າຍເພື່ອຕອບສະໜອງໄດ້ຕາມຄວາມຕ້ອງການຂອງຕະຫຼາດ, ທັງທີ່ຈິງການເພາະເຫັດເຂັມກໍບໍ່ໄດ້ມີຂັ້ນຕອນຫຍຸ້ງຍາກ ແລະແຕກຕ່າງຈາກເຫັດປະເພດອື່ນພໍເທົ່າໃດ, ມື້ນີ້ຄໍລ້ຳກະສິກຳໄດ້ນຳເອົາຄວາມຮູ້ດີໆມາແບ່ງປັນໃຫ້ເພື່ອນຳໄປປະກອບອາຊີບໄດ້ໃນຕໍ່ໜ້າ.

  ການເພາະເຫັດເຂັມປະກອບດ້ວຍ 1) ການກຽມອາຫານຂີ້ເລື່ອຍວັດສະດຸທີ່ໃຊ້ປະສົມເປັນອາຫານເພາະລ້ຽງເຫັດເຂັມປະກອບມີຂີ້ເລື່ອຍໄມ້ຢາງພາລາ 75 ກິໂລ, ຮຳອ່ອນ 20 ກິໂລ, ສາລີບົດ 5 ກິໂລ ແລະນ້ຳ 60 ກິໂລ, ຈາກນັ້ນໃຫ້ນຳເອົາສິ່ງທີ່ກຽມໄວ້ທັງໝົດນັ້ນມາຄົນໃຫ້ເຂົ້າກັນ ແລະໃຫ້ ມີຄວາມຊຸ່ມປະມານ 60-65% ແລ້ວນຳໄປໃສ່ໃນຖົງຢາງທີ່ທົນຄວາມຮ້ອນຂະໜາດ 17,5-30 ຊັງຕີແມັດ ແລະຢັດໃຫ້ແໜ້ນໂດຍປະລິມານຕໍ່ຖົງແມ່ນ 600 ກຣາມ (ວິທີບັນ ຈຸຄືກັນກັບການກຽມຖົງ ເພາະເຫັດທົ່ວໄປ)  ໃສ່ຄໍພລາສ ຕິກປິດຈຸກສໍາລີແລ້ວຫຸ້ມດ້ວຍເຈ້ຍ ເພື່ອປ້ອງກັນສຳລີປຽກ 2) ພາຍຫຼັງທີ່ນຳເອົາສ່ວນອາຫານຂີ້ເລື່ອຍປະສົມໃສ່ຖົງຢາງເປັນທີ່ຮຽບຮ້ອຍແລ້ວກໍເອົາຖົງຢາງນັ້ນໄປໜຶ້ງໃນໝໍ້ໜຶ້ງບໍ່ອັດຄວາມດັນ, ອຸນຫະພູມປະມານ 100 ອົງສາເຊ ເປັນເວລາ 1-2 ຊົ່ວໂມງ 3) ຖົງອາຫານຂີ້ ເລື່ອຍປະສົມທີ່ຜ່ານການໜຶ້ງແລ້ວປະໄວ້ໃຫ້ເຢັນລົງແລ້ວຈຶ່ງໃສ່ຫົວ ເຊື້ອເຫັດເຂັມທີ່ງອກໃນເມັດເຂົ້າ ປະລິມານຖົງລະ 15-20 ເມັດ 4) ນຳຖົງອາຫານຂີ້ເລື່ອຍປະສົມທີ່ໃສ່ຫົວເຊື້ອເຫັດເຂັມແລ້ວບົ່ມໄວ້ໃນຫ້ອງອຸນຫະພູມປະມານ 20-26 ອົງສາເຊ 5) ເມື່ອເສັ້ນໃຍຂອງເຫັດເຂັມຈະ ເລີນເຕັມຖົງໃຫ້ຍ້າຍຖົງເພາະລ້ຽງໄປຫ້ອງເປີດດອກໄຟອຸນຫະພູມ 13-15 ອົງສາເຊ, ຄວາມຊື້ນ 80-85% ແລ້ງເປີດຈຸກສຳລີອອກ.  

  ໃນເມື່ອເກີດດອກເຫັດນ້ອຍໆຄວນໃຫ້ແສງ ແລະຖອດຄໍພລາສຕິກອອກແລ້ວປະໃຫ້ດອກສູງປະມານ 2-3 ຊັງຕີແມັດຈຶ່ງມ້ວນເຈ້ຍສວມຄອບຖົງຢາງເຫັດຈາກນັ້ນກ້ານດອກເຫັດຈະຊູຫາແສງສະຫວ່າງເຮັດໃຫ້ກ້ານຍາວ ແລະໃບດອກເຫັດໃຫຍ່, ແຕ່ໄລຍະນີ້ຄວນປັບອຸນຫະພູມໃຫ້ສູງຂຶ້ນເປັນ 16-18 ອົງສາເຊກ້ານດອກເຫັດຍາວປະມານ 9-13 ຊັງຕີແມັດ, ດອກຈະມີຂະໜາດ 1-2 ຊັງຕີແມັດ,ສ່ວນວິທີໃນການເກັບເຫັດໂດຍການດຶງກຸ່ມດອກເຫັດທັງໝົດ, ດອກເຫັດເຂັມສາມາດເກັບຮັກສາທີ່ອຸນຫະພູມ 4-5 ອົງສາ ໄດ້ເປັນເວລາປະມານ 7 ມື້ ທີ່ຍັງຄົງຄວາມສົດຂອງດອກ ແລະສີບໍ່ປ່ຽນ.

ໂດຍ: ປັອກ

แชร์